Bakı növbəti film festivalına hazırlaşır

Bakı növbəti film festivalına hazırlaşır

Filmlər ingilis dilində subtitrlə və ya səsli tərcümə olunmalıdır

Noyabrın 14-dən 17-dək Bakıda IX “START” Beynəlxalq Qısa Filmlər Festivalı keçiriləcək. Artıq ekran əsərlərinin qəbuluna start verilib.

“Sinema” Gənc Kinematoqrafçılar Mərkəzinin təsis etdiyi festivala Mədəniyyət, Gənclər və İdman nazirlikləri tərəfindən dəstək verilir.

Filmlər iki əsas – Beynəlxalq və yerli müsabiqə proqramlarında, eyni zamanda, ilk dəfə keçirilən “Cinemobil” adlı mobil filmlərin müsabiqəsində yarışacaq.

Yerli müsabiqəyə yalnız Azərbaycan Respublikasının vətəndaşı olan gənclər qoşula bilər. Beynəlxalq müsabiqədə isə əcnəbi müəlliflərlə yanaşı, yerli rejissorlar da iştirak edə bilər.

Festivalın müsabiqə bölmələrinə 35 yaşa qədər olan rejissorlar oktyabrın 5-dək bədii, sənədli, cizgi və eksperimental filmlərini təqdim edə bilərlər. Filmlər 2017- 2018-ci illərdə istehsal olunmalı, xronometrajı 35 dəqiqədən çox olmamalıdır. Yerli müsabiqədən fərqli olaraq beynəlxalq müsabiqəyə filmlər ingilis dilində subtitrlə və ya səsli tərcümə ilə göndərilməlidir.

Onlayn rejimdə aparılacaq “Cinemobil” müsabiqəsinə yalnız mobil telefonla çəkilən filmlər qatılacaq. Bundan başqa , festival kinematoqrafçılara ideyalarını reallaşdırmağa kömək məqsədilə ilk dəfə “Pitçinq” elan edir.

Festivalın əsas nominasiyalarından əlavə yerli müsabiqədə “Ən yaxşı prodüser”, “Ən yaxşı rejissor”, “Ən yaxşı ssenari”, “Ən yaxşı operator” nominasiyaları da yer alır.

Bu ildən etibarən festivalın qalibləri “Qızıl nar” mükafatı ilə təltif olunacaqlar. Mükafat uğrunda yarışacaq filmləri yerli və xarici mütəxəssislərdən ibarət peşəkar kino xadimləri təyin edəcək.

Müsabiqədə iştirak etmək istəyənlər qaydalar və şərtlər barədə www.filmfestival.az saytından məlumat əldə edə bilər.

Bakucity.az

Əgər səhv görmüsünüzsə, mətndə səhvi seçin və Ctrl+Enter sıxaraq redaksiyaya göndərin
Şərhlər