Məktəbəqədər hazırlıq qruplarına elektron qeydiyyatın vaxtı uzadılıb

Məktəbəqədər hazırlıq qruplarına elektron qeydiyyatın vaxtı uzadılıb

Məktəblərdə sənəd qəbulu isə sentyabrın 29-dək davam edəcək

Bakı Şəhəri üzrə Təhsil İdarəsinin (BŞTİ) tabeliyindəki ümumi təhsil müəsisələrində elektron qeydiyyatın vaxtı uzadılıb. 

Bu barədə Bakucity.az-a Bakı Şəhəri üzrə Təhsil İdarəsindən məlumat verilib.

Belə ki, 2018-2019-cu dəris ili üçün məktəbəhazırlıq qruplarına elektron qeydiyyat prosesinin vaxtı sentyabrın 28-dək davam edəcək. 

Elektron ərizəsi qeydiyyata alınan şəxslərin məktəbəhazırlıq qruplarına məktəblərdə sənəd qəbulu isə sentyabrın 29-dək davam edəcək. Vətəndaşlar həftənin III, IV, V, VI günləri saat 10:00-dan 16:00-dək müraciətlərini edə bilərlər. 

Paytaxt məktəblərindəki məktəbəhazırlıq qruplarına uşaqların qəbulu üçün elekton sistemdə 21803 ərizənin onlayn qeydiyyatı isə, 25.09.2018-ci il tarixinə saat 11:00-a olan məlumata əsasən aparılıb.  

Məktəbəhazırlıq qruplarına şagird qəbulu www.mektebeqebul.edu.az elektron sistemi vasitəsi ilə aparılır.

Məktəbəhazırlıq qruplarının yaradılmasında məqsəd 5 yaşlı uşaqların məktəb təlim-tərbiyyəsinə hazırlığı ilə əlaqədar uşaqlarda psixoloji dayanıqlığı artırmaq, əhatə olunduqları aləmə, təhsil mühitinə uyğunlaşmaq, ünsiyyət və birgə fəaliyyət bacarıqlarına yiyələnməni təmin etməkdən ibarətdir.

Məktəbəhazırlıq qruplarına qəbulun elektron sistem vasitəsilə həyata keçirilməsi şəffaflığın təmin edilməsi, vaxt itkisinin aradan qaldırılması, informasiya texnologiyalarından

istifadə vərdişlərinin aşılanması baxımından olduqca əhəmiyyətlidir.

Məktəbəhazırlıq qrupları üçün tələb olunan sənədlərə uşağın şəxsiyyətini təsdiq edən

sənədin əsli və surəti (şəxsiyyət vəsiqəsi olmadıqda, doğum haqqında şəhadətnamə), uşağın mübadilə vərəqi (sağlamlıq haqqında arayış-forma 26U), 2 (iki) ədəd

3x4 ölçüdə rəngli fotoşəkil və məktəb direktorunun adına ərizə (qəbulu elektron sistem keçirilən rayon və şəhərlərdə valideynin

nümayəndənin) www.mektebeqebul.edu.az saytında yaradılmış “Şəxsi Kabinet”indən çap olunmuş “Ərizə” daxildir.

Azərbaycanda vətəndaşlığı olmayanlardan isə əlavə olaraq

müvəqqəti və ya daimi yaşamaq üçün icazə vəsiqəsi (olduğu təqdirdə), Birləşmiş Millətlər Təşkilatının Qaçqınların İşləri üzrə Ali Komissarlığının Himayə Sənədi, xarici doğum haqqında

şəhadətnamə tələb olunur. Sənədlər Azərbaycan dilinə tərcümə olunmalıdır. 

Qeyd edək ki, dövlət ümumi təhsil məktəblərində yaradılmış məktəbəhazırlıq qruplarına 5 yaşı həmin il tamam olmuş uşaqlar qəbul olunurlar.

Məktəbəhazırlıq qruplarında gün ərzində 3 məşğələ, həftədə 4 gün olmaqla, ümumilikdə 12 məşğələ keçirilir. Bir məşğələnin müddəti 30 dəqiqə, məşğələlərarası fasilə 10 dəqiqə olmaqla müəyyənləşdirilib. Qruplarda “Ətraf aləmlə tanışlıq”, “Savad təliminə hazırlıq və nitq inkişafı”, “Bədii təfəkkürün inkişafı”, “Məntiqi və riyazi təfəkkürün inkişafı”, “Təsviri fəaliyyət”, “Musiqi”, “Fiziki mədəniyyət” məşğələləri keçirilir.

Dövlət ümumi təhsil məktəblərində yaradılan məktəbəhazırlıq qruplarında dərs ili iki yarımilə bölünür və məşğələlər 1 oktyabr, 31 may dövrünü əhatə edir.

Xatırladaq ki, Azərbaycanda 2015-2016-cı tədris ilində məktəbəhazırlıq proqramı bütün 5 yaşında olan uşaqların 24, 2016-2017-ci dərs ilində 55, 2017-2018-ci tədris ilində isə 65 faizini əhatə edib.

2018-2019-cu dərs ilində həmin göstəricinin 75, 2019-2020-ci tədris ilində isə 90 faizə çatdırılması nəzərdə tutulur.

Ramilə Qardaşxanqızı

Bakucity.az

Əgər səhv görmüsünüzsə, mətndə səhvi seçin və Ctrl+Enter sıxaraq redaksiyaya göndərin

Şərhlər