Təmir edilən yolda ödəniş tətbiq ediləcək

Təmir edilən yolda ödəniş tətbiq ediləcək

"İlin sonunadək Azərbaycanda ilk ödənişli yol sistemi işə düşəcək"

Bakucity.az xəbər verir ki, bu ilin sonunadək Ələt-Astara yolunun 31-204-cü kilometri ödənişli olacaq. Bunu “RealTV”yə müsahibəsində Azərbaycan Avtomobil Yolları Dövlət Agentliyinin sədri Saleh Məmmədov bildirib.

S. Məmmədov bildirib ki, bu ilin sonunadək Azərbaycanda ilk ödənişli yol sistemi işə düşəcək.

Qurum sədrinin sözlərinə görə, ödənişli giriş Ələt-Astara magistralının 31-204-cü kilometrinə tətbiq ediləcək.

Məsələ ilə bağlı Bizimyol.info-ya açıqlama verən yol nəqliyyat eksperti Elməddin Muradlı pulsuz yolun da pullu yol kimi təmir edildikdən sonra ödənişin tətbiq edilməsinin məqbul olduğunu vurğulayıb:

“Cənub istiqamətində salınan həmin yol beynəlxalq əhəmiyyət daşıyır, digər ölkələrdən gələn yük maşınlarının rahat şəkildə bir istiqamətdən digər istiqamətə hərəkətini təmin edəcək ki, bu da ölkəyə xeyli sayda vəsait gətirə bilən bir addımdır, strateji əhəmiyyətli bir layihədir. Bizim Yol Hərəkəti Haqqında qanuna görə ödənişli yol o vaxt ola bilər ki, onün mütləq alternativi də olsun. Alternativ olduqda isə pullu yoldan fərqlənməməlidir. Fərqlilik yalnız məsafənin qısalığında ola bilər. Təhlükəsizlik baxımından pullu yolla pulsuz yol bir-birindən fərqlənə bilməz. Kimsə özünü diskomfort hiss etməməlidir ki, kimsə pullu yolda konfortla gedir, mən isə pulsuz diskomfort.

Pullu yolun bir üstünlüyü var ki, həmin yolda kəsişmələr və birləşmələr yoxdur. Bu gün isə həmin istiqamətdə olan köhnə yol o qədər bərbad vəziyyətdədir ki, bu yolu pullu edib insanları köhnə yola yönləndirsələr çox əcaib bir mənzərə ortaya çıxacaq. Mən düşünürəm ki, bu yolda ödəniş o halda tətbiq oluna bilər ki, pulsuz olan yol ən azı bu səviyyədə təmir edilsin, istifadəyə verilsin. O yolun indidən pullu edilməsi heç bir ölçüyə sığan bir addım deyil, yəqin ki aidiyyatı qurumlar buna getməyəcəklər.

Bu Azərbaycan üçün bir ilkdir, yenilikdir ona görə də buna çox da baha qiymət tətbiq etmək olmaz., bu insanlar tərəfindən əks-reaksiya verə bilər. Ola bilər xaricə yük daşıyanlıar üçün, başqaları üçün tətbiq edilsin. Ola bilsin bu yerli sakinlər üçün tətbiq edilməsin. Hələ ki, bu barədə şərtlər açıqlanmayıb, açıqlandıqdan sonra bu haqda geniş danışmaq olar.

Azərbaycan Avtomobil Yolları Dövlət Agentliyi köhnə yolu təmir edib yeni yol səviyyəsinə gətirəndən sonra bu barədə danışmaq olar. Dünya praktikasına gəlincə isə orada müəyyən qaydalar var. Belə ki, həmin yolların giriş-çıxış nöqtələrində terminallar quraşdırılır və yaxud da müasir texnologiyalardan istifadə edilməklə mobil telefonlardan da, internetdən də ödənişimizi edib yararlana bilərik. Dünyanın heç bir ölkəsində yol çəkib ondan qazanc götürmək məqsədi güdülmür. Sadəcə insanların təhlıükəsizliyi üçün, rahat və daha tez mənzil başına çatması üçün bu addım atılır, ödəniş isə həmin yolda cari təmir işlərinin aparılması üçün yığılır”.

Bakucity.az

Əgər səhv görmüsünüzsə, mətndə səhvi seçin və Ctrl+Enter sıxaraq redaksiyaya göndərin
Şərhlər