Bakıda liftin nəyə görə qadının başına düşdüyü məlum oldu - TƏFƏRRÜAT

Bakıda liftin nəyə görə qadının başına düşdüyü məlum oldu - TƏFƏRRÜAT

Bir nəfər şübhəli qismində istintaqa cəlb olunub

Bakucity.az-ın xəbərinə görə, 4 Oktyabr tarixində Bakıda Nəsimi rayon ərazisində, 44 A ünvanında yerləşən binada baş verən faciəvi hadisənin təfərrüatları bəlli olub. 

Nəsimi rayon prokurorluğundan verilən məlumata görə, binadakı liftin qırılaraq xadimə kimi çalışan qadının başına düşməsi nəticəsində qadın yerindəcə həlak olub. 

Artıq faciənin hansı səbəbdən baş verdiyi dəqiqləşib. Araşdırmalar nəticəsində aşkarlanıb ki, 2016-cı ildə istismara verilən liftin trosları nasaz vəziyyətdə olub. “Nəsimi-3” Mənzil Mülkiyyətçilərinin Müştərək Cəmiyyəti tərəfindən idarə olunan 10 mərtəbəli yaşayış binasında cəmiyyətin idarə heyətinin sədri Soltanməcid Əzizovun texniki təhlükəsizlik qaydalarına əməl etmədiyi müəyyənləşdirilib. Belə ki, Əzizov liftin təmiri üçün peşəkar mütəxəssisləri dəvət etmək əvəzinə, bu sahədə heç bir təcrübəsi olmasa da, özü liftin troslarını dəyişmək qərarına gəlib. Nəticədə də o, texniki xətalara yol verib. 

Sonra o, binada xadimə kimi çalışan M. Yusifovadan liftin şaxtasına yığılan tör-töküntünü yığışdırmağı tapşırıb. Özü isə təmiri davam etdirmək məqsədiylə lifti çalışdırıb. Elə bu zaman troslarında nasazlıq olan lift böyük sürətlə aşağıya düşüb. Nəticə etibarilə də şaxtada çalışan xadimə liftin altında qalaraq faciəvi şəkildə həlak olub. 

Fakt barəsində Nəsimi rayon prokurorluğunda Cinayət Məcəlləsinin 314.2-ci (Səhlənkarlıq, ehtiyatsızlıqdan zərərçəkmiş şəxsin ölümünə və ya digər ağır nəticələrə səbəb olduqda) maddəsi ilə cinayət işi başlanıb, müvafiq ekspertizalar təyin edilib.

S.Əzizov isə iş üzrə şübhəli şəxs qismində tutularaq istintaqa cəlb edilib.

Hazırda iş üzrə zəruri istintaq tədbirləri davam etdirilir.

Bakucity.az

Əgər səhv görmüsünüzsə, mətndə səhvi seçin və Ctrl+Enter sıxaraq redaksiyaya göndərin
Şərhlər