Bakıda 20 gün əvvəl azadlığa çıxan direktor yenə məhkəməlik oldu

Bakıda 20 gün əvvəl azadlığa çıxan direktor yenə məhkəməlik oldu

Vəzifə saxtakarlığında təqsirləndirilən Sahil Cahangirlinin məhkəməsi başlayıb

Bu gün Bakı Ağır Cinayətlər Məhkəməsində vəzifə səlahiyyətlərindən sui-istifadə, vəzifə saxtakarlığı və dələduzluqda təqsirləndirilən Sahil Cahangirlinin məhkəməsi başlayıb. 

"Qafqazinfo"nun verdiyi xəbərə görə, hakim Azad Məcidovun icraatında olan prosesdə baxış iclası baş tutub. 

Prokuror çıxış edərək ittiham aktını elan edib. 

İttihama görə, S. Cahangirli "Real" MTK-nın direktoru olanda Nərimanov rayonunda tikilən binada olan bir mənzili əvvəlcə Bəylər Abdullayeva, sonra isə Rauf Abdullayevə satıb. 

Hazırda evdə Rauf Abdullayev yaşayır, sənədlər isə Bəylər Abdullayevin adınadır. İstintaq R. Abdullayevə 150 min manat ziyan dəyməsi qərarına gəlib. 

Məhkəmədə ifadə verən S.Cahangirli özünü qismən təqsirli bildiyini deyib:  "2006-cı ildə əvvəlki direktor İslam Qasımov mənzili Bəylər Abdullayevə satıb, 2013-cü il sentyabr ayında mən direktor təyin olundum. Mən də eyni ölçüdə, eyni formada olan amma bir mərtəbə yuxarıda olan mənzili Rauf Abdullayevə satdım. Amma komendat Rauf müəllimə səhvən aşağı mərtəbədəki mənzili göstərib. Yuxarı mərtəbədəki evlə bağlı da hazırda məhkəmə gedir, həmin ev Raufa veriləcəkdi. Həmin evə aid sənədi Raufa makler Vahid Qasımov vermişdi. İndi Rauf Abdullayevə dəyən ziyanı ödəmək istəyirəm". 

İslam Qasımov hazırda həbsdə olan İlham Qasımovun qardaşıdır. S.Cahangirli isə onların bacısı oğludur. 

"Real" MTK-nın sahibi İ.Qasımov milyonçu şair Gülağa Tənhanın şikayəti əsasında həbs edilib. O, şairin 19,5 milyon manatını mənimsəməkdə ittiham edilib. 

Bakı Ağır Cinayətlər Məhkəməsinin hökmü ilə İ.Qasımov 15 il müddətinə azadlıqdan məhrum edilib. Bakı Apellyasiya Məhkəməsi cəzanı 12 ilə endirib. 

İ.Qasımov  "MTN işi"ndə general Akif Çovdarovun zərərçəkmişi kimi tanınıb. 

Sahil Cahangirli bundan əvvəl  şirkətin icraçı direktoru Anar Əşrəfovla birgə təqsirləndirilib və 2018-ci il sentyabrın 19-da Bakı Ağır Cinayətlər Məhkəməsinin hökmü ilə hər ikisini şərti cəza verilərək azadlığa buraxılıblar. Həmin işin istintaqı zamanı S. Cahangirli həbsdə olsa da, bu işdə azadlıqdadır. 

Makler Vahid Qasımov da eyni məhkəmədə 6 il müddətinə azadlıqdan məhrum edilib. 

Bakucity.az

Əgər səhv görmüsünüzsə, mətndə səhvi seçin və Ctrl+Enter sıxaraq redaksiyaya göndərin
Şərhlər