Bakıda velosiped yolları salınacaq: işlər aparılır - ARAŞDIRMA

Bakıda velosiped yolları salınacaq: işlər aparılır - ARAŞDIRMA, Javid

Bakucity.az velosiped yolları ilə bağlı hazırladığı araşdırmanı oxuculara təqdim edir

İlk baxışda bir şəhərin velosiped yollarına sahib olub-olmaması əhəmiyyətsiz məsələ kimi görünə bilər. Amma bu düşünüldüyündən də ciddi mövzudur. Bir şəhərin velosiped yolları varsa, deməli, o şəhərdə ətraf mühitin, infrastrukturun, mədəniyyətin və alternativlərin qayğısına qalınır.Üstəlik tıxaclarla zəngin şəhərdə velosiped yolları əksər şəhər sakinlərinə hərəkət azadlığı verərdi. Bütün bu səbəblərə görə, Bakı şəhərinin saytı - Bakucity.az saytı vaxtaşırı qaldırılan “bizdə nə vaxtsa velosiped yolları” olacaqmı sualına bir daha cavab tapmağa çalışıb. Vacib fikirlərin öz əksini tapdığı araşdırmanı oxucularımıza təqdim edirik.  

Rəsmi: “Şəhərdə velosipedçilər üçün yolların yaradılması və onların təhlükəsizliyinini təmin etmək üçün işlər aparılır”

Bakucity.az saytına açıqlamasında Bakı Nəqliyyat Agentliyinin (BNA) mətbuat katibi Mais Ağayev deyib ki, Bakı şəhərində ümumiyyətlə yol infrastrukturu təşkil edilərkən, kütləvi velosiped yolları nəzərdə tutulmayıb: 

“Lakin “BNA” bununla bağlı bir yenilik edib. Hazırda şəhərin müxtəlif küçə və yollarında təhlillər aparılır. Bilmək istəyirik, harda velosiped yolları inşa etmək olar, harda yox” – Mais Ağayev bildirib və əlavə edib: 

“Gələcək layihələr üçün də ilkin ideya kimi düşünürük ki, Bakı Olimpiya Stadionu, Koroğlu Nəqliyyat Mübadilə Mərkəzi və Atletlər kəndini əlavə eləməklə, belə bir velosiped yolunu təşkil edək. Bundan əlavə, bir saylı velosiped yolu olan Mənzil İnşaat Dövlət Agentliyinin Yasamalda yerləşən Sosial Mənzillər Kompleksinin nəqliyyat şəraiti ilə bağlı BNA-nın hazırladığı layihədə velosiped yollarının təşkil edilməsi nəzərdə tutulub. Ümumi olaraq, şəhərdə velosipedçilər üçün yolların yaradılması və onların təhlükəsizliyinini təmin etmək üçün işlər aparılır”.

Bakıda velosiped yolları salınacaq: işlər aparılır - ARAŞDIRMA, fotoşəkil-1

Ekspert: “Cəmiyyətimiz xüsusilə velosipedçiyə aid qaydalar barədə çox məlumatsızdır”

Bakının velosiped yolları məsələsini tez-tez qaldıran hüquqşünas Ərşad Hüseynov paytaxtda indiyədək velosiped yollarının olmamasını bunun cəmiyyət üçün maraqlı olmaması ilə izah edib: 

“Almaniya və digər bir çox inkişaf etmiş ölkələrdə velosiped nəqliyyat növü kimi istifadə edilir, çünki insanlar belə istəyir. Ölkəmizdə bu minik növünün indiyə qədər real nəqliyyat növü kimi populyar olmamasının səbəbi cəmiyyətimizin ona yalnız idman aləti və uşaq əyləncə vasitəsi kimi baxmasıdır. Hazırda insanlarımız velosipeddən heç bir formada kütləvi surətdə istfadə etmirlər. Üstəlik velosiped yollarının olmadığı halda velosipedlə yola çıxmaq da çox təhlükəlidir. Xüsusilə avtomobil sürücülərinin velosipedlə yanaşı hərəkətə hazır olmaması əsas səbəblərdəndir. Bütün bu səbəblər bir-biriylə qarşılıqlı bağlıdır. Cəmiyyətimiz xüsusilə velosipedçiyə aid qaydalar barədə çox məlumatsızdır”, - deyə ekspert fikrini tamamlayıb.

“Ölkədə velosiped yollarının olmaması velosipedin satışına da ciddi təsir göstərir”

Mövzunun davamı olara Bakucity.az Bakı bazarında velosipedlərin qiymətləri ilə də maraqlanıb. Məlum olub ki, alıcılar velosipedləri keyfiyyətinə görə yox, daha çox qiymət əsasında seçməyə üstünlük verirlər. Məsələ ilə bağlı “Synergy Group”un əməkdaşı, biznesin inkişafı deportamentinin direktoru Pərviz İlyasov bunları deyib:

“Azərbaycanın ilk və hələlik yeganə milli velosiped brendi olan “Isma Bikes” velosiped zovodu iki ildir ki, fəaliyyət göstərir. Bakıda 20 yanvar metrostansiyasının yaxınlığında yerləşən “Velotrek”də və daha bir neçə ünvanda brendlərimiz satılır. Şəhər, dağ velosipedi, şosse, trikinq, qadın, uşaq, e-bike, BMX modellərinin satışı 98 manatla 1986 manat arasında dəyişir. Velosipedlərimiz həm qiymətdə, həm də keyfiyyətdə xarici markalardan üstündür. Biz cəmi iki ildir istehsalata başlamışıq, hələlik yerli bazarda möhkəmlənmək istiqamətində düşünürük. Ancaq ölkədə velosiped yollarının olmaması velosipedin satışına da ciddi təsir göstərir”.

Bakıda velosiped yolları salınacaq: işlər aparılır - ARAŞDIRMA, fotoşəkil-2

Qeyd edək ki, “Isma Bikes” velosiped zovodu 2016-cı ildə fəaliyyətə başlayıb və zavod “Synergy Group” şirkətlər qrupuna daxildir.

Sonda

Araşdırmalara görə dünyada istehlak edilən enerjinin və kükürd qazı tullantısının 20-25 faizi nəqliyyat sektorunun payına düşür. Əvvəlcə qeyd etdiyimiz kimi ətraf mühitin qorunması baxımından velosiped yollarının əhəmiyyəti böyükdür. Buna görə, dünyanın bir çox ölkələrində bu istiqamətdə ciddi işlər aparılır. Bakının da bu trenddə təmsil olunması həm paytaxt infrastruktu, həm də sakinlərin rahatlığı baxımından irəliyə atılmış addım olardı. 

Hazırladı: Ramilə Qardaşxanqızı

Bakucity.az

Velosiped yolu Bakı Isma Bikes
Əgər səhv görmüsünüzsə, mətndə səhvi seçin və Ctrl+Enter sıxaraq redaksiyaya göndərin

Şərhlər