Bakıda iş yerlərində ən çox tələb olunan mütəxəssislər – Top 10

Bakıda iş yerlərində ən çox tələb olunan mütəxəssislər – Top 10

Bakucity.az şəhərimizdə ən çox hansı peşələrə tələbatın olduğunu aydınlaşdırmağa çalışıb

Biz müasir texnologiyanın iş həyatında inqilab etdiyi bir dövrdə yaşayırıq. Sürətli kompüterləşmə və yüksək texnologiyanın ortaya çıxması bir çox peşələrin tarixə qovuşmasına, bəzilərinin isə meydana gəlməsinə səbəb olub. Əksər insanları maraqlandıran sual budur: hansı peşəni seçsək, özümüzü maddi cəhətdən daha yaxşı təmin edə, uğurlu karyera qura bilərik? Bakucity.az oxucuların marağını nəzərə alaraq, şəhərimizdə ən çox hansı peşələrə tələbatın olduğunu aydınlaşdırmağa çalışıb.

  • Əmək bazarında reklam və İT mütəxəssislərinə tələbat çoxdur

“DSG” işəgötürmə agentliyinin nümayəndəsi Zaur Alxasov Bakucity.az-a açıqlamasında bu gün ən çox tələb olunan peşə sahələrinin adlarını açıqlayıb:

"Ən çox axtarılan peşəkarlar qismində biznesin təşviqi sahəsində çalışan mütəxəssisləri qeyd etmək olar. Bu sahədə çalışan əməkdaş Azərbaycan Respublikasının qanunvericiliyini və hüquqi bazasının biznes və kommersiya fəaliyyətini yaxşı bilməldir. Onun əsas vəzifələrinə şirkətin məhsullarını təşkil etmək və satışını həyata keçirmək daxildir. Şirkətlər reklam işinin təşkili və təşviqi üçün  SMM menecerlərinə (sosial media meneceri), reklam işini, brendin təşviqini həyata keçirən mütəxəssislərə böyük ehtiyac duyurlar. Bu peşələrin əsas məğzi brendlər üçün hədəf kütlələri tapmaq, prosesə dair "feedback" verməkdən ibarətdir".

Bakıda iş yerlərində ən çox tələb olunan mütəxəssislər – Top 10, fotoşəkil-1

Zaur bəy iş bazarında ən çox ehtiyac duyulan sahələrdən birinin İT texnologiyalar olduğunu deyir. O, gələcəkdə bu sahəyə tələbatın daha da artacağına əmindir.

"Qrafik dizaynerlərə də böyük tələbat var, bir qayda olaraq bu sahənin mütəxəssislərinə yüksək əməkhaqqı verilir. Qrafik dizayner bir çox işləri yerinə yetirir, amma onun əsas vəzifəsi şirkətin korporativ üslubunu yaratmaqdan ibarətdir. Təbii ki, bu gün bu sahədə çalışmaq üçün təkcə rəsm bacarıqları kifayət etmir. Siz “QuarkXPress”, “Photoshop”, “Illustrator”, “CorelDraw” kimi dizayn proqramlarını bilməlisiniz, - Alxasov bildirir və əlavə edir: reklam agentinə də böyük təlabat var. Bu mütəxəssis potensial reklamçılar tapmalı və onlara KİV-də yer satmalıdır". 

Kadr mütəxəssisinin sözlərinə görə, import-menecerliyi də tez-tez tələb olunan sahələrdəndir, amma digər bəzi ənənəvi sahələr hələ də populyar olmaqda davam edir. “Mühasiblər, mühəndislər, hüquqşünaslar hələ də ən çox ən çox tələb olunan mütəxəssislər qismində qalırlar”, - Alxasov fikrini tamamlayarkən deyib

  • İxtisas seçərkən nələrə diqqət etmək lazımdır?

Zaman hər şeyi sürətlə dəyişir. Bəzən isə insanların dəyişikliklərə uyğunlaşmaq üçün vaxtı çatmır. Əvvəldə qeyd edildiyiz kimi, bu amil peşə həyatının bəzi sahələrində də müşahidə olunur. Bəzən universitetdə istədiyin fakültə olur, bəzənsə harada təhsil alacağını bilmirsən. 

“The HR” şirkətində işəgötürmə şöbəsinin nümayəndəsi kimi çalışan Səbinə Ağayevadeyir ki, alternativ təhsil yolları tapmaq imkanı həmişə var: "Məsələn, logistika sahəsində mütəxəssis olmaq istəyirsinizsə, onda təhsil aldığınız yerli iqtisadiyyat fakültəsində 3-cü ildən sonra ixtisasınızı Rusiya və ya xarici universitetlərdə logistika bölməsinə dəyişə bilərsiniz. Bu ölkələrdə artıq yeni fakültələr mövcuddur". 

Bakıda iş yerlərində ən çox tələb olunan mütəxəssislər – Top 10, fotoşəkil-2

Beynəlxalq sertifikat ala bilmək üçün isə xarici şirkətlərin birində təcrübə keçmək lazım gəlir. Bu sahədə arzulanan təcrübə 3 ildən 5 ilə qədərdir. 

"SMM mütəxəssislərinə gəldikdə isə, hər şey bir qədər sadədir, - Sabina Ağayeva deyir: Filologiya fakültəsini bitirən mütəxəssislər bu peşə üçün uyğundurlar. Bu vakansiyaya müraciət edənlər bir qayda olaraq, qrammatika və oxunaqlı mətn yaratmaq sınağından keçirlər". 

İşəgötürmə departamentinin nümayəndəsinin sözlərinə görə, əgər sizi İT-texnologiyalar sahəsi maraqlandırırsa, onda proqram təminatı ixtisası üzrə təhsil ala bilərsiniz. Bundan əlavə, proqramlaşdırma dillərini hərtərəfli öyrənə biləcəyiniz “onlayn” proqramlaşdırma kurslarına da yazıla bilərsiniz. "İnsan resursları" vakansiyasına gəldikdə isə, mütəxəssisin sözlərinə görə, burada heç bir xüsusi təhsil tələb olunmur: "Adətən iqtisadiyyat və psixologiya sahəsini bilən mütəxəsislər bu vakansiyaya uyğun gəlirlər. Xarici dilləri bilmək arzuolunandır. İş yerlərində Beynəlxalq İnsan Resursları İdarəetməsi istiqamətində sertifikatı olan namizədlərə üstünlük verilir".

  • Nəticə

Araşdırmalardan və mütəxəssis rəylərindən belə nəticəyə gəlmək olar ki, hansısa sahədə tələb olunan mütəxəssisə çevrilmək üçün yalnız müvafiq təhsil diplomuna sahib olmaq kifayət etmir. Bugünkü əmək bazarı çox rəqabətlidir və bu rəqabətin daha da artacağı gözlənilir.  Bir sözlə, mütəxəssislər öz bacarıqlarını artırmaq üçün və lazımi texnologiyanı mənimsəmək üçün daim öz üzərlərində işləməlidirlər. Bakucity.az oxucularına paytaxtımızda ən çox tələb olunan peşələri təxmini əməkhaqlarıyla birlikdə təqdim edir:

İxtisas

Təxmin olunan maaş

1

Satış və biznesin inkişafı üzrə mütəxəssis

600-1500

2

Mühasiblər və hesabdarlar

400-1500

3

İnsan resursları

500-1500

4

IT proqramçı

600-2500

5

Mühəndis

1000-2500

6

Logistika mütəxəssisi

350-2000

7

Resepşn, ofis administratoru

300-1000

8

Marketoloq (marketinq analizi)

500-2500

9

Elektrik mühəndisi

450-2500

10

Vergi konsultantı

400-1000

Hazırladı: Züleyxa İsmayılova 

Bakucity.az

Biznes mütəxəssis peşə
Əgər səhv görmüsünüzsə, mətndə səhvi seçin və Ctrl+Enter sıxaraq redaksiyaya göndərin
Şərhlər