Bakıda kitab mağazası uğurlu biznesdirmi? - ARAŞDIRMA

Bakıda kitab mağazası uğurlu biznesdirmi? - ARAŞDIRMA

Bakucity.az Bakıdakı kitab biznesi barədə araşdırmasını təqdim edir

Paytaxtda son illərdə kitab biznesinin çiçəkləndiyini görməmək mümkün deyil. Biz şəhərin istənilən künc-bucağında kitab və dəftərxana ləvəzimatı satan obyektlər görürük. Bununla yanaşı, dəbdəbəli kitab mağazalarının da sayı artır. Bakının mərkəzində, "mall"arda və ticarət mərkəzlərində yeni-yeni mağazalar açılır və açılması planlaşdırılır. Belə görünür, bu sahəyə maraq artmaqdadır. Amma bununla yanaşı, kitab satışının ürəkaçan səviyyədə olmaması barədə şikayətlər də yetərincədir. Bu barədə yerli yazıçılar, nəşriyyat rəhbərləri  və tərcüməçilər vaxtaşırı gileylənirlər. Bakucity.az mövzu barədə araşdırma aparıb. Sualların ətraflı cavabını bu araşdırmada tapa bilərsiniz. 

Nəşriyyatlar

Bakıda hazırda çox sayda nəşriyyatlar və mətbəə evləri fəaliyyət göstərir. Bu nəşriyyatların bəziləri dövlət sifarişi ilə elmi əsərlərin, dərs vəsaitlərinin çapını həyata keçirir, bəziləri isə xarici tərcümələrin və Azərbaycan ədəbiyyatı nümunələrinin nəşri ilə məşğuldur. Məsələn, “Qanun” nəşriyyatının satış təmsilçisi Aynur Əvəzova bizimlə söhbət zamanı qeyd etdi ki, nəşriyyatda ay ərzində 7-8 yerli müəllifin kitabı, 30-31 isə xarici tərcümələrdən ibarət kitablar çapdan çıxır.

Bakıda kitab mağazası uğurlu biznesdirmi? - ARAŞDIRMA, fotoşəkil-1

“Qədim Qala” nəşriyyatının redaktoru Şöhlət İxtiyaroğlu isə nəşriyyatın həm kitab çapı, həm də satışını həyata keçirdiyini bildirdi: “Nəşriyyatda il ərzində nəşriyyatın kitabı silsiləsindən, 6-ya yaxın kitab çap edilir və satışı həyata keçirilir. Biz bunların tərcümə versiyalarının satışını xaricdə də təşkil edirik. Ən çox satdığımız kitablar isə Rövşən Abdullaoğlunun əsərləridir. “Bu şəhərdə kimsə yoxdur” əsərini 14 dəfə çap etmişik, 15-ci çapa hazırlanır. “Reyslər üzərinə uzanmış adam” isə 5-ci dəfə çapdan çıxıb. Bu kitabların tirajı isə 1500-2500 civarında dəyişir. Bəzən daha çox olur”.

Kitab evləri

Bakıda yerləşən kitab mağazalarından, kitaba marağın azlığından çox danışılıb. Lakin son 5 ildə “Kitabevim.az”, “Libraff”, “Bakı Kitab Mərkəzi”, “Azərkitab”, “Hüquq ədəbiyyatı” kimi kitab evləri açılıb. Bu kitab bizneslərinin nə qədər stabil olacağını isə zaman göstərəcək. 

Bununla belə təcrübə göstərir ki, Bakı bir çox kitab biznesləri bir müddət fəaliyyət göstərəndən sonra dayanıb. Məsələn, şair-Jurnalist Zahir Əzəmət “Zero” adlı kitab mağazası açmışdı, lakin qısa müddət sonra bağlamalı oldu. Məsələ ilə bağlı Zahir Əzəmətin özündən soruşduq.

Bakıda kitab mağazası uğurlu biznesdirmi? - ARAŞDIRMA, fotoşəkil-2

"Bakıda kitab mağazasının uğurlu biznes olması üçün şərtlər ağırdır, - Zahir Əzəmətaçıqlamasında qeyd etdi: İnsanlar əsasən şəhərin mərkəzində vaxt keçirir. Mərkəzdə isə kitab mağazası üçün lazım olan geniş yerlərin icarə haqqı fantastikdir. Üstəlik kitab çeşidləri az, hədəf kütləsi dardır. Hazırda Bakıda kitabla bağlı uğurlu biznes qurmaq üçün milyonların olmalıdır. Gərək öz yerin ola, bir neçə mərtəbəli Mall tikəsən, orada insanlar hər cür kitab, ofis-dəftərxana ləvazimatları, uşaqlar üçün oyuncaqlar – hər şey əldə edə bilsin, mağazanın öz kafe və restoranları, kinoteatrı və təqdimat zalı olmalıdır. Sadəcə ənənəvi mall-lardan fərqli olaraq, burada vurğu və aura kitabın üzərində olmalıdır”.

Araşdırma zamanı söhbətləşdiyimiz əksər biznes nümayəndələrini maliyyə məsələlərini sirr saxlamaq istədilər. 

Ümumi mənzərədən belə görünür ki, Bakıda kitab biznesinin müəyyən müsbət və mənfi tərəfləri var. Ümumiyyətlə isə, əksər oturuşmuş biznes sahələrində olduğu kimi kitab bazarında da bazara daxil olmaq üçün yaxşı investisiya tələb olunur. Hazırda belə güclü investisiya ilə bazarda fəaliyyət göstərən kitab biznesləri var, onların nə qədər uğurlu olacağını isə zaman göstərəcək.

Hazırladı: Ramilə Qardaşxanqızı 

Bakucity.az

Kitab
Əgər səhv görmüsünüzsə, mətndə səhvi seçin və Ctrl+Enter sıxaraq redaksiyaya göndərin
Şərhlər