“BakıFilEkspo” V Milli Filateliya sərgisi işə başlayıb - FOTO

“BakıFilEkspo” V Milli Filateliya sərgisi işə başlayıb - FOTO

Sərgidə 19 kolleksiya, 34 çap işi nümayiş etdirilir

Bakucity.az xəbər verir ki, Nəqliyyat, Rabitə və Yüksək Texnologiyalar Nazirliyi, “Azərmarka” MMC  və Azərbaycan Filatelistlər İttifaqının təşkilatçılığı ilə Xalça Muzeyində “BakıFilEkspo” V Milli Filateliya sərgisinin açılışı olub.

Sərgidə Nəqliyyat, rabitə və yüksək texnologiyalar nazirinin müavini Elmir Vəlizadə, Dənizkənarı Bulvar İdarəsinin sədrinin müavini Elşən İsgəndərov, “Azərmarka” MMC-nin direktoru Leyla Güləliyeva, Azərbaycan Filatelistlər İttifaqının sədr müavini Rövşən Əhmədov, filatelistlər, numizmatlar və digər kolleksiyaçılar iştirak edib. 

Sərgidə çıxış edən nazir müavini Elmir Vəlizadə qeyd edib ki, Azərbaycan Dövlət Bayrağının 100 illiyi kimi əlamətdar günün astanasında belə tədbirin keçirilməsi xüsusi əhəmiyyət daşıyır. Onun sözlərinə görə, 2018-ci il Azərbaycan üçün əlamətdar hadisələrlə zəngin olub. Azərbaycan Xalq Cümhuriyyətinin, Milli Ordumuzun, Azərbaycan Qadınına səsvermə hüququnun verilməsinin 100 illiyinin qeyd edilməsi  də bu qəbildəndir. 

Azərbaycan Filatelistlər İttifaqının sədr müavini Rövşən Əhmədov  məlumat verib ki, sərgidə 7 nominasiyada müsabiqələrin keçirilməsi planlaşdırılır. Onun sözlərinə görə, ümumiyyətlə, sərgidə bütün nominasiyalarda 19 kolleksiya, 34 çap işi nümayiş etdirilir.

“Bunlardan 4 toplu rəsmi dərəcədə, 20 çap işi müsabiqədən kənar dərəcəsində, 8 toplu filateliya sinfində, 3 toplu filokartiya və fuluminiya sinfində, 4 toplu numizmatika sinfində və 14 çap işi ədəbiyyat sinfində təqdim edilir. Müsabiqə dərəcəsində göstəriləcək 19 topludan 13-ü isə ilk dəfə nümayiş etdirilir” – deyə o vurğulayıb.

“Azərmarka” MMC və “Num.az”  MMC-nin köşklərində filateliya və numizmatika üzrə materialların və  aksesuarların da  satışı təşkil edilib.

V Milli Filateliya sərgisində nümayiş etdikləri kolleksiyalara görə Nəqliyyat, Rabitə və Yüksək Texnologiyalar Nazirliyi “Azərmarka” MMC tərəfindən 7 nəfər xatirə qızıl medalı ilə, 5 nəfər xatirə gümüş medalı ilə, 5 nəfər xatirə bürünc medalı, 3 nəfər isə diplomla təltif olunub. 

Sərgi 9 noyabr tarixinədək davam edəcək. 

“BakıFilEkspo” V Milli Filateliya sərgisi işə başlayıb - FOTO, fotoşəkil-1 “BakıFilEkspo” V Milli Filateliya sərgisi işə başlayıb - FOTO, fotoşəkil-2 “BakıFilEkspo” V Milli Filateliya sərgisi işə başlayıb - FOTO, fotoşəkil-3 “BakıFilEkspo” V Milli Filateliya sərgisi işə başlayıb - FOTO, fotoşəkil-4 “BakıFilEkspo” V Milli Filateliya sərgisi işə başlayıb - FOTO, fotoşəkil-5

Bakucity.az

“BakıFilEkspo” V Milli Filateliya sərgisi
Əgər səhv görmüsünüzsə, mətndə səhvi seçin və Ctrl+Enter sıxaraq redaksiyaya göndərin
Şərhlər