"Neftçi"nin uğurlu çıxışının əsas səbəbi açıqlandı

"Neftçi"nin uğurlu çıxışının əsas səbəbi açıqlandı

Qapıçı Azərbaycan yğmasının Millətlər Liqasındakı çıxışı barədə fikir bildirməyib

“Qalib gəlsək də, çətin görüş idi. Rəqibdən bu cür oyun gözləyirdik, lakin istədiyimiz oyunu sərgiləyib, qələbə qazandıq”.

Səlahət Ağayev Azərbaycan Premyer Liqasının XII turunda “Səbail”i səfərdə 2:0 hesabı ilə məğlub etdikləri oyun barədə danışarkən belə deyib:

“Neftçi”də birlik-bərabərlik var, yaxşı heyətə malikik. Nəticələrdə öz əksini tapan əsas səbəb budur. Oyundan-oyuna daha yaxşı çıxış etməyə çalışırıq. Hələ mövsümün başa çatmasına çox var. Hər matça qələbə üçün çıxırıq”.

27 yaşlı qolkiper matçın 52-ci dəqiqəsində “Səbail”in qapısına təyin edilən penalti epizoduna meydan sahiblərinin futbolçularının etiraz etməsinə də münasibət bildirib:

“Dəqiq söz deməkdə çətinlik çəkirəm, çünki həmin epizod məndən uzaqda idi. Amma qapısına penalti təyin edilən komandanın oyunçuları referiyə həmişə etiraz edir”.

Ağayev 89-cu dəqiqədə oyunun bərpasını ləngitdiyinə görə sarı vərəqə ilə cəzalandırılıb. Qərarla razılşmadığını deyir:

“Həmin epizodda niyyətim vaxt uzatmaq yox, topu mərkəzə çəkib, oyuna daxil etmək idi. Referi bunu fərqli dəyərləndirdi və “sarı” verdi”.

“Neftçi” dekabrın 1-də XIII tur çərçivəsində “Sabah”ın qonağı olacaq. Qolkiper buna da fikir bildirib:

“Sabah” debütant sayılsa da, 4-cü pillədədir. Ötən tur “Qarabağ”la 1:1 hesablı heç-heçə ediblər. Bu görüşdə də müsbət nəticə üçün əlimizdən gələni edəcəyik”.

Ağayev üzvü olduğu Azərbaycan yığmasının UEFA Millətlər Liqasında Kosovoya 4 cavabsız qolla məğlub olması və bu görüşdən sonra komanda ətrafında gəzən söz-söhbət barədə fikir bildirməyib.

"Səbail" üzərində qələbədən sonra xallarını 29-a çatdıran "Neftçi" liderliyini daha da möhkəmləndirib. 

Bakucity.az

Neftçi Səlahət Ağayev
Əgər səhv görmüsünüzsə, mətndə səhvi seçin və Ctrl+Enter sıxaraq redaksiyaya göndərin

Şərhlər