Bakı merinin həll etməli olduğu 5 ən vacib problem - ARAŞDIRMA

Bakı merinin həll etməli olduğu 5 ən vacib problem - ARAŞDIRMA, Javid

Paytaxt sakinlərinin yeni rəhbərlikdən gözləntiləri böyükdür.

Eldar Əzizov bir müddət əvvəl Bakı Şəhər İcra Hakimiyyətinin yeni başçısı vəzifəsinə təyin edildi. Bundan başqa, icra hakimiyyətində struktur dəyişiklikləri də baş tutub. Bakı sakinlərinin şəhərin yeni rəhbərliyindən gözləntiləri böyükdür. Çünki paytaxtda bir sıra problemlər var ki, mütləq həllini tapmalıdır. 

Bakucity.az Bakıda həlli vacib olan 5 problem barədə araşdırma aparıb. Beləliklə, sual budur: Bakının yeni meriyasının həll etməli olduğu 5 ən vacib problem hansılardır? Materialı oxucularımıza təqdim edirik. 

1. Komunal xidmətlərin vaxtında və keyfiyyətli şəkildə həyata keçirilməsi

Bakucity.az məsələni araşdırarkən, iqtisadçı-ekspert Vüqar Bayramova müraciət edib. Mütəxəssis açıqlamasında Bakının ən ciddi problemlərindən biri kimi kommunal xidmətlər sahəsindəki boşluğu misal göstərib:

“Həll edilməsi lazım olan 5 vacib problemdən danışarkən qeyd etmək lazımdır ki, bunların bir qismi birbaşa İcra hakimiyyətindən asılı deyil, amma dolayısı ilə onun səlahiyyətlərinə daxildir. Ən birinci problemə qaldıqda isə, mövsümdən asılı olaraq kommunal xidmətlərin vaxtında və keyfiyyətli formada həyata keçirilməsi ən labüd məsələdir. Xüsusilə qış  mövsümündə istiliyin verilməsi sahəsindəki problemlər aradan qalxmalıdır”.

Bakı merinin həll etməli olduğu 5 ən vacib problem - ARAŞDIRMA, fotoşəkil-1

2. Köhnə liftlər dəyişdirilməlidir

Ekspert Bakıda həll edilməsi 2-ci ən vacib problem kimi köhnə binalardakı liftləri göstərib:

“Həm mətbuatda verilən informasiyalar, həm apardığımız monitorinqlər onu göstərir ki, binalarda liftlərin işləməsilə bağlı ciddi problemlər var. Nəticədə vətəndaşlar liftlərdə köməksiz vəziyyətdə qalırlar, bəzi hallarda isə 9 mərtəbəli binalarda liftlər günlər boyu işləmir. Bu da yaşlı, xəstə, fiziki imkanları məhdud olan vətəndaşlarımız üçün çətinliklər yaradır”.

3. Bakının genişləndirilməsi planı pozulmamalıdır

Digər spesifik problemə misal kimi ekspert Bakının genişləndirilməsi planındakı pozuntuları göstərib, onun fikrincə, planlama düzgün aparılmır: 

“Təəssüf ki, son illərdə Bakının genişləndirilməsi planı pozulur. Xüsusilə 5 mərtəbəli binaların yanında hündürmərtəbəli binaların inşa edilməsi düzgün deyil. Bakının planlı şəkildə genişləndirilməsi, inkişaf etdirilməsi lazımdır. Bu plan çərçivəsində inşa edilən binaların həyətindən istifadə, parking yerləri sahəsindəki problemlər aradan qaldırılmalıdır”.

Bakı merinin həll etməli olduğu 5 ən vacib problem - ARAŞDIRMA, fotoşəkil-2

4. Şəhərin təmizliyinə riayət edilməlidir

 “Son illər şəhərin təmizlənməsi sahəsində xeyli işlər görülüb, amma bunlar azdır, - deyə ekspert vurğulayıb və davam edib: çünki Bakı bu məsələdə xüsusilə Avropa şəhərlərindən geri qalır. Bakı Şəhər İcra Hakimiyyəti bu məsələ ilə bağlı təbliğatını gücləndirməlidir. Buraya binaların üz örtüyünün təmiz saxlanılması, yollarda təmizliyə riayət edilməsi, zibil yeşiklərinin vaxtında götürülməsi və s. kimi məsələlər daxildir”. 

5. Sahibkarlığa qarşı maneələr aradan qaldırılmalıdır

Vüqar Bayramov nəhayət, Bakıda həll olunması vacib olan 5-ci problemə misal kimi sahibkarlığa maneələri göstərib:

“Paytaxtda sahibkarların biznes şəraitinin yaxşılaşdırılması mühüm məsələdir. Xüsusən də yerli məmurların sahibkarlıq fəaliyyətinə qarşı maneələri tamamilə aradan qaldırılmalıdır. Çünki paytaxtda biznesin inkişafı sahibkarlıq fəaliyyətinin inkişafından asılıdır”, - deyən Vüqar Bayramov sonda qeyd edilən 5 məsələnin ümumilikdə Bakı üçün vacib olduğunu və buna görə də yeni icra başçısının sözügedən problemlərin həllinə daha diqqətlə yanaşmalı olduğunu bildirib. 

Hazırladı: Ramilə Qardaşxanqızı

Bakucity.az

Eldar Əzizov BŞİH
Əgər səhv görmüsünüzsə, mətndə səhvi seçin və Ctrl+Enter sıxaraq redaksiyaya göndərin

Şərhlər