Xalça Muzeyi üçün 2018-ci il uğurlu olub

Xalça Muzeyi üçün 2018-ci il uğurlu olub

Azərbaycan Xalça Muzeyinin fəaliyyəti bu il bir sıra yeniliklərlə yadda qalıb.

Xalça Muzeyindən Bakucity.az-a verilən məlumata görə bu il ərzində muzeyin kolleksiyaları yenilənib, beynəlxalq səviyyəli tədbirlər, sərgilər, treninqlər keçirilib və bu səbəbdən də ziyarətçilərin sayı artıb. Bu il ziyarətçilərin sayı 110 minə çatıb.

Heydər Əliyev Fondu muzeyin ən qiymətli eksponatlarına çevrilmiş XVII əsrin nadir xalçaları olan “Xətai” (Əjdahalı), “Naxçıvan” və italiyalı kolleksioner Mirko Kattai XIX əsrə aid Qubanın “Hacıqayıb” xalçasını muzeyə hədiyyə edib. Həmçinin, xaricdən qaytarılan iki xalça - XIX əsrə aid Quba qrupuna aid “Sırt-Çiçi” və Bakı qrupuna aid “Xilə-buta” satın alınaraq muzeyin kolleksiyasına daxil edilib.

Muzey müxtəlif yerli və xarici təşkilatlarla birlikdə sərgilər təşkil edib. 

Azərbaycan Xalça Muzeyi Topkapı Sarayı Muzeyi, Türk və İslam Əsərləri Muzeyi, Rusiya Dövlət Şərq Xalqları İncəsənəti Muzeyi və Rusiya Etnoqrafiya Muzeyi kimi xarici muzeylərlə işgüzar əməkdaşlığı genişləndirib. Muzeyin əməkdaşları Hindistan, Gürcüstan, ABŞ və Çində keçirilən elmi konfranslarda iştirak ediblər.

Bu il Xalça Muzeyində iki böyük beynəlxalq tədbir keçirilib. 

Bu ildə muzeyin peşəkarları üçün xarici mütəxəssislər tərəfindən treninqlər və mühazirələr keçirilib. Həmçinin tələbələr üçün könüllü proqramı və muzey təcrübəsi də davam etdirilib. Muzey kiçik ziyarətçilər üçün yeni ekskursiya və ustad dərslərindən ibarət “Art şənbə” layihəsi hazırlayıb, kvestlər (komanda yarışları) təşkil edib.

Muzeyin fəaliyyəti həmçinin beynəlxalq muzey təşkilatları tərəfindən də yüksək qiymətləndirilib. Azərbaycan Xalça Muzeyi Beynəlxalq Muzeylər Şurasının (ICOM) Beynəlxalq Sənədləşmə Komitəsi (CIDOC) tərəfindən qeyri-maddi mədəni irs məlumat bazası üzrə ən yaxşı təcrübəyə layiq görülüb.

Bakucity.az

Xalça muzeyi uğur
Əgər səhv görmüsünüzsə, mətndə səhvi seçin və Ctrl+Enter sıxaraq redaksiyaya göndərin

Şərhlər