Yeni İldə Bakını Suriyaya çevirən kimlər oldu? - Rəsmi açıqlama

Yeni İldə Bakını Suriyaya çevirən kimlər oldu? - Rəsmi açıqlama, Javid

“Pirotexniki vasitələr ölkəyə qaçaq yolla  gətirilib”

Bakı yeni il gecəsi Suriyanı xatırladırdı. Bir-birini əvəzləyən, hər partlayışda ayaqlar altında yeri lərzəyə gətirən qulaqbatırıcı səs-küy səngimək bilmirdi. Elə bu günün özündə də ara-sıra partapart səsləri eşidilməkdədir. Bayramdan əvvəl rəsmilərin dilindən səslənən pirotexniki vasitələrlə bağlı hökmlü açıqlamalar da artıq eşidilməz olub.

Halbuki Yeni il öncəsi rəsmilər növündən asılı olmayaraq pirotexniki vasitələrin ölkə ərazisinə gətirilməsi və satışının qanunla qadağan olunması haqda ağızdolusu danışırdılar. Yeni ilə bir neçə gün qalmış ölkənin müxtəlif yerlərində, xüsusən də paytaxt Bakıda bu vasitələrin açıq-aşkar satışı o qədər də nəzərə çarpmasa da, dekabrın 31-də hər tində-bucaqda pirotexniki vasitələr satılan piştaxtalar peyda olmuşdu. Yeni il gecəsi isə şəhərin mərkəzindəki partlayışlar hətta bulvarda düzənlənən atəşfəşanlığı kölgədə qoymuşdu.

BŞİH: “Qadağandır və Bakı şəhərində satışı yolverilməzdir”

Bakı Şəhər İcra Hakimiyyətinin mətbuat xidmətinin rəhbəri İsrafil Kərimov “Qaynarinfo”ya açıqlamasında qurumun bu məsələyə münasibətinin birmənalı olaraq mənfi olduğunu bildirib: “Pirotexniki vasitələrin satışına icazə verilməsi Bakı Şəhər İcra Hakimiyyətinin səlahiyyətinə aid məsələ deyil. Onu satanlar bu məhsulları qeyri-leqal yollarla gətiriblər. Bakı Şəhər İcra Hakimiyyətinin pirotexniki vasitələrlə bağlı bir mövqeyi var: onlar qadağandır və Bakı şəhərində satışı yolverilməzdir. Bunun qarşısını da hüquq-mühafizə orqanları almalıdır. Bakı Şəhər Ticarət Departamenti Yeni il yarmarkaları təşkil etmişdi və həmin yarmarkalarda da yeni ilə aid ləvazimatlar, yolkalar, cürbəcür bəzək əşyaları satılırdı. Orada hər hansı pirotexniki vasitənin satışı yolverilməzdir və buna icazə də verilməyib. Mən özüm də şahidi olmuşam ki, metroların qarşısında səyyar şəkildə pirotexniki vasitələr satılırdı. Buna Bakı Şəhər İcra Hakimiyyəti yox, birbaşa hüquq mühafizə orqanları cavabdehdirlər. Dənizkənarı bulvarın ərazisində atəşfəşanlıq zamanı olan vəziyyəti hamımız gördük. Buna münasibətimiz çox mənfidir, hüquq-mühafizə orqanları tərəfindən bu problem aradan qaldırılmalıdır”.

Yeni İldə Bakını Suriyaya çevirən kimlər oldu? - Rəsmi açıqlama, fotoşəkil-1

Daxili İşlər Nazirliyinin mətbuat xidmətinin əməkdaşı Orxan Mansurzadə “Qaynarinfo”ya açıqlamasında hüquq-mühafizə orqanlarının bu barədə reydlər keçirdiyini deyib: “Biz bunun qarşısının alınması məqsədilə keçirilən reydlərlə bağlı gündəlik olaraq məlumat vermişik. Dəqiq deyə bilmərəm, amma bunların satışında müəyyən texniki parametrlər olmalıdır. Onu ekspertlərin biri ilə dəqiqləşdirə bilərsiniz. Eləsi var ki, adi bir partlayışdı. Deyirlər ki, o da yığışdırılmalıdır, lakin eləsi də var ki, güclü səsyayma qabiliyyətinə malikdir. Dediyim kimi, müəyyən texniki göstərici var ki, həmin həddə qədər yəqin ki, satışına icazə verilir. Bəziləri deyir ki, bu qədər vasitə necə gətirilib və s. Bu, bizim işimiz deyil, amma bütün hallarda polis orqanları tərəfindən müvafiq tədbirlər görülüb”.

Dövlət Gömrük Komitəsinin mətbuat xidmətinin  rəhbəri Natiq Axundov “Yeni Müsavat”ın əməkdaşına bildirib ki, statistik məlumatları dəqiqləşdirəndən sonra bu haqda rəsmi açıqlama veriləcək.

Bakucity.az

Pirotexniki vasitələr
Əgər səhv görmüsünüzsə, mətndə səhvi seçin və Ctrl+Enter sıxaraq redaksiyaya göndərin
Şərhlər