Bakıda qeyri-iş günlərinin sayı azaldılacaq? - AÇIQLAMA

Bakıda qeyri-iş günlərinin sayı azaldılacaq? - AÇIQLAMA, Javid

"Qeyri-iş günlərinin çoxluğu işin keyfiyyətinə mənfi təsir göstərir"

2019-cu ildə beşgünlük iş həftəsinə 242 iş günü, 103 istirahət günü və iş günü hesab edilməyən 18 bayram, 1 səsvermə, 1 də hüzn günü var. Bəzi ekspertlərin fikrincə, ölkədə qeyri-iş günlərinin sayı çoxdur. Azərbaycanda neft gəlirlərinin bol olduğu dövrdə əhalinin rahatlığı üçün çox sayda qeyri-iş günü müəyyən edilmişdi. Amma artıq ölkədə iqtisadiyyat sahəsində köklü dəyişikliklər baş verir. İndi əhalinin işləməsi və vergi ödəməsi təşviqatı aparılır. Bu amilləri nəzərə alanda, ölkədə qeyri-iş günlərinin sayı azaldıla bilərmi? Bakucity.az mövzu ilə bağlı iqtisadçı-ekspert Vüqar Bayramovun fikirlərini öyrənib. 

Azərbaycan bayram günlərindəki qeyri-iş günlərinin sayına görə dünya rekordçularındandır

Vüqar Bayramov hesab edir ki, qeyri-iş günlərinin çoxluğu dövlət və özəl setorda işin keyfiyyətinə mənfi təsir göstərir:

“Azərbaycan dünyada bayramlardakı qeyri-iş günlərinin sayına dünya liderlərindəndir və praktiki olaraq bizdə il ərzində qeyri-iş günlərinin çox olması, o cümlədən həm dövlət, həm də özəl sektorda işçinin işləmədiyi günlərinin sayının kəskin artımına gətirib çıxarır. O baxımından təbii ki, qeyri-iş günlərinin sayına nazirlik tərəfindən baxılması və qeyri-iş günlərinin sayının beynəlxalq standartlara uyğunlaşdırılmasına ehtiyac var. Sözsüz, qeyri-iş günlərinin sayı ilə bağlı qəbul edilmiş və ya hamı tərəfindən qəbul edilən beynəlxalq standart hələlik yoxdur, amma beynəlxalq standart deyəndə biz daha çox inkişaf etmiş ölkələrdə tədbiq edilən qeyri-iş günlərinin sayını nəzərdə tuturuq. Azərbaycanda  bu günlərin sayı həmin ölkələrlə müqaisədə 2 dəfəyə yaxın çoxdur, yəni bizdə daha çox qeyri-iş günləri var". 

Bakıda qeyri-iş günlərinin sayı azaldılacaq? - AÇIQLAMA, fotoşəkil-1

Qeyri-iş günlərinin azaldılması əməkhaqlarına təsir edə bilər

Ölkədə qeyri-iş günlərinin sayının azaldılmasını təklif edən ekspert bildirir ki, belə olarsa, vergi ödəyicilərinin sayı artacaq: 

“Qeyri iş günlərinin sayının azaldılması vergi ödəyicilərinin sayına təsir göstərəcək. Çünki həm dövlət, həm özəl sektorda nə qədər çox iş olursa nəticə etibarilə bu o qədər çox yerli dəyərin yaranmasına imkan verir. Belə ki, vergiyə cəlb edilən dövriyyə genişlənir.  Dövlət müəssisələrində ödənişlər adətən aylıq olur, bu səbəbdən güman etmirəm ki, bu məsələ əmək haqlarının məbləğinə bütövlükdə ciddi təsir göstərsin, amma özəl sektorda və bir sıra müəsisələrdə ödənişlər işlənən günün və saatların sayına görə hesablanır. Yəni qeyri-iş günlərinin sayı azaldılarsa, bu müəssisələrdə əmək haqqlarının artırılması mümkündür”, - deyə Vüqar Bayramov fikrini tamamlayıb. 

2019-cu ilin qeyri-iş günləri

Yeni il bayramı üçün hesablanan qeyri-iş günlərini artıq geridə qoymuşuq, qarşıdan isə 20 Yanvar – Ümumxalq hüzn günü gəlir. Ardınca isə:  8  Mart – Qadınlar günü, 20, 21, 22, 23, 24 mart – Novruz bayramı, 9 May – Faşizm üzərində Qələbə günü, 28 May – Respublika günü, 5, 6 iyun – Ramazan  bayramı, 15 İyun – Milli Qurtuluş  günü, 26 İyun – Silahlı Qüvvələri  günü, 12, 13 avqust – Qurban bayramı,  9 noyabr – Dövlət Bayrağı günü, 31 Dekabr – Dünya Azərbaycanlılarının Həmrəyliyi günü ölkədə qeyri-iş günləridir.

Bakıda qeyri-iş günlərinin sayı azaldılacaq? - AÇIQLAMA, fotoşəkil-2

Rəsmi açıqlama

Əmək və Əhalinin sosial müdafiəsi nazirliyindən Bakucity.az-a qısaca bildirilib ki, hazırda qeyri-iş günlərinin sayına baxılması və azaldılması məsələsi müzakirə olunmur. Nə bu gün, nə də yaxın zamanlarda mövzu ilə bağlı dəyişikliklər də gözlənilmir. Buna görə də qurum əlavə açıqlama verməyə ehtiyac duymayıb. 

Hazırladı: Ramilə Qardaşxanqızı

Bakucity.az

Qeyri-iş günləri
Əgər səhv görmüsünüzsə, mətndə səhvi seçin və Ctrl+Enter sıxaraq redaksiyaya göndərin

Şərhlər