Bakıda Cəfər Cabbarlının ev muzeyi baxımsız vəziyyətdədir - ARAŞDIRMA

Bakıda Cəfər Cabbarlının ev muzeyi baxımsız vəziyyətdədir - ARAŞDIRMA

Acınacaqlı vəziyyətdə olan muzeyin aqibəti necə olacaq?

Bu ilin mart ayında Azərbaycan ədəbiyyatının görkəmli nümayəndəsi, böyük şair, yazıçı və dramaturq Cəfər Cabbarlının anadan olmasının 120 illiyi tamam olur. Görkəmli ədibin yubileyi münasibətilə artıq dövlət səviyyəsində bir çox layihələrin keçirilməsi planlaşdırılıb, müvafiq qurumlar bununla bağlı tədbirlər planı hazırlayıblar. Ancaq maraqlıdır ki, ədibin paytaxtın mərkəzində yerləşən ev muzeyi hələ də baxımsız vəziyyətdədir. Bakucity.az mövzu ilə bağlı araşdırma aparıb və sənətkarın ev muzeyinin niyə baxımsız vəziyyətdə qaldığını aydınlaşdırmağa çalışıb. 

Bu muzey hələ Sovet dövründə qurulub

Cəfər Cabbarlının Yasamal rayonu, İsmayıl bəy Qutqaşınlı 44 ünvanında yerləşən, vaxtı ilə yaşayıb-yaratdığı ev 1979-cu ildən ədibin ev muzeyi kimi fəaliyyət göstərib. Muzeydə 10.000-dən çox eksponat – yazıçının həyat və yaradıcılığını əks etdirən sənədlər və fotoşəkillər, nadir əlyazmalar, yazıçının sağlığında istifadə etdiyi, özünə və ailəsinə aid şəxsi əşyalar, ayrı-ayrı dram əsərlərinə hazırlanmış səhnə maketləri, tamaşalardan afişa və proqramlar, maraqlı rəsm əsərləri, görkəmli şəxsiyyətlərin dramaturqa bağışladıqları hədiyyələr, C.Cabbarlı ədəbi irsini tədqiq edən maraqlı elmi əsərlər, mətbuat nümunələri qorunub.

Ancaq xeyli müddətdir ki, muzeyi ziyarət etmək istəyən kəslər “muzey təmirə bağlanıb” cavabını alaraq içəri buraxılmırlar. Bu hal 2015-ci ildən keçərli idi. Binanın təmirinə gəlincə, hələ 10 il əvvəl (2009), görkəmli şəxsiyyətin 110-illik yubileyi zamanı muzeyin baxımsız vəziyyətdə olması, burada nəinki təmirə, hətta yenidənqurmaya ehtiyac olduğu bildirilirdi. Bugünlərdə biz məsələni aydınlaşdırmaq üçün bir daha muzeyin qapısını döydük və yenidən eyni cavabı aldıq: “muzey təmirə bağlanıb!”

Özümüzü təqdim edib sadə ziyarətçi olmadığımızı, mətbuatdan gəldiyimizi və təmir prosesi ilə maraqlandığımızı, bir neçə foto çəkib gedəcəyimizi bildirəndə isə, vəziyyət gərginləşdi. Xanım işçilərdən biri “muzey pis vəziyyətdədir, tavandan başınıza nəsə düşsə, bir hadisə baş versə, cavabdeh biz olacağıq”, - deyib qapını üzümüzə bağladı. Təəssüf ki, burada vəziyyət illər öncəkindən daha da acınacaqlı görünürdü.

Rəsmi qurumlar hansı tədbirləri görür?

Məsələ ilə bağlı Mədəniyyət Nazirliyinin İnformasiya və ictimaiyyətlə əlaqələr şöbəsi ilə əlaqə saxladıq. Buradan isə bizə bildirdilər ki, böyük dramaturqun yubileyi ilə əlaqədar sərəncama uyğun olaraq işlər görülür, ev muzeyinin vəziyyətinin yaxşılaşdırılması məsələsi də nazirliyin diqqətindədir. 

Sonda qeyd edək ki, şəhərin mərkəzinə yaxın yerləşən Cabbarlının ev muzeyinin hal-hazırda baxımsız, uçulub-dağılmaq üzrə olduğunu, burada heç bir təmir-tikinti prosesinin getmədiyini binanın yaxınlığından keçənlər öz gözlərilə şahid ola bilərlər. Görkəmli ədibin yubileyinə artıq bir neçə ay qalıb, o zamana qədər ev muzeyinin əsaslı təmir ediləcəyi inandırıcı görünmür. Amma ümid edirik ki, yaxın zamalarda Cəfər Cabbarlının adına layiq bir ev muzeyi görə biləcəyik. Cəfər Cabbarlı Azərbaycan ədəbiyyatının parlaq nümayəndələrindən biri, müasir dilimizi və kimliyimizi formalaşdıran şəxsiyyətlərindən biridir. Ona qarşı etinasızlığa yol verilməyəcəyinə ümid edirik. Sonda oxucularımıza baxımsız vəziyyətdə olan ev muzeyinin fotolarını təqdim edirik. 

Bakıda Cəfər Cabbarlının ev muzeyi baxımsız vəziyyətdədir - ARAŞDIRMA, fotoşəkil-1 Bakıda Cəfər Cabbarlının ev muzeyi baxımsız vəziyyətdədir - ARAŞDIRMA, fotoşəkil-2 Bakıda Cəfər Cabbarlının ev muzeyi baxımsız vəziyyətdədir - ARAŞDIRMA, fotoşəkil-3 Bakıda Cəfər Cabbarlının ev muzeyi baxımsız vəziyyətdədir - ARAŞDIRMA, fotoşəkil-4 Bakıda Cəfər Cabbarlının ev muzeyi baxımsız vəziyyətdədir - ARAŞDIRMA, fotoşəkil-5 Bakıda Cəfər Cabbarlının ev muzeyi baxımsız vəziyyətdədir - ARAŞDIRMA, fotoşəkil-6 Bakıda Cəfər Cabbarlının ev muzeyi baxımsız vəziyyətdədir - ARAŞDIRMA, fotoşəkil-7 Bakıda Cəfər Cabbarlının ev muzeyi baxımsız vəziyyətdədir - ARAŞDIRMA, fotoşəkil-8 Bakıda Cəfər Cabbarlının ev muzeyi baxımsız vəziyyətdədir - ARAŞDIRMA, fotoşəkil-9 Bakıda Cəfər Cabbarlının ev muzeyi baxımsız vəziyyətdədir - ARAŞDIRMA, fotoşəkil-10

Hazırladı: Ramilə Qardaşxanqızı

Bakucity.az

Cəfər Cabbarlı ev muzeyi
Əgər səhv görmüsünüzsə, mətndə səhvi seçin və Ctrl+Enter sıxaraq redaksiyaya göndərin
Şərhlər