Bakıda niyə bütün avtobuslar kart sisteminə keçmir? - ARAŞDIRMA

Bakıda niyə bütün avtobuslar kart sisteminə keçmir? - ARAŞDIRMA

2019-cu il Bakı nəqliyyatında böyük yeniliklər olacaq

Bakı Nəqliyyat Agentliyi (BNA) sərnişin daşıyan şirkətlər qarşısında kart sisteminə keçidlə bağlı tələb qoyub. Amma tələbdən xeyli müddət keçsə də, hələ də sərnişin avtobuslarının əksəriyyəti bu sistemdən kənar fəaliyyət göstərirlər. Niyə bəzi daşıyıcı şirkətlər kart sisteminə keçmirlər, niyə bu problem birdəfəlik həllini tapmır? Bakucity.az bu kimi suallara cavablar axtarıb. Materialı oxucularımıza təqdim edirik. 

Kart sisteminə tam keçid üçün avtobus parkı yenilənməlidir

BNA-nın mətbuat katibi Mais Ağayev saytımıza açıqlamasında bildirdi ki, Bakıda kart sisteminə tam keçid üçün avtobus parkı yenilənməlidir: 

Bakıda niyə bütün avtobuslar kart sisteminə keçmir? - ARAŞDIRMA, fotoşəkil-1

“Kart sisteminə keçidi ləngidən ən əsas məsələ avtobus parkının yenilənməsi ilə bağlıdır. Yəni, avtobuslar baza, texniki baxımdan yenilənməlidirlər. Müntəzəm marşrut xətti üzrə istismarda olan avtobusların böyük əksəriyyəti, xüsusilə də Bakıətrafı kəndlər və qəsəbələr istiqamətində hərəkətdə olan avtobuslar texniki baxımdan qoyulan tələblərə cavab vermirlər. Bizim də əsas məqsədimiz kart sisteminə keçmək üçün ilk növbədə bu avtobusları yeniləməkdir. Müasir komfortlu avtobuslar alındıqdan sonra kart sisteminə keçid tam təmin ediləcək. Ötən il müxtəlif daşıyıcılar tərəfindən yeni nəqliyyat vasitələri gətirilib və xəttlərə buraxılıb. Cənab prezidentin sərəncamına əsasən, bu il Bakı Nəqliyyat Agentliyi tərəfindən gətiriləcək 300 avtobus da kart sisteminə keçid prosesindən sonra xəttə buraxılacaq”. 

Daşıyıcılar kart sisteminə qoşulmaqdan yayınır

“Bakı şəhərinin inzibati ərazisində müntəzəm sərnişindaşıma ilə bağlı müəyyən olunmuş tələblər var və o tələblərdən biri də nağdsız ödəniş sisteminə keçiddir”, -  deyən M.Ağayev daşıyıcıların bu sistemdən yayındığını vurğulayıb: 

Bakıda niyə bütün avtobuslar kart sisteminə keçmir? - ARAŞDIRMA, fotoşəkil-2

“Kart sisteminə keçid əslində həmin avtobusları idarə edən sürücülərin rahatlığı baxımından da əhəmiyyətlidir. Çünki kart sisteminə keçən daşıyıcıların sürücüləri gündəlik plan sistemi ilə çalışmırlar. Plan sistemi ilə çalışan sürücülər hər gün ən az 14-15 saat sükan arxasında olurlar. Həmçinin “BakuBus”da çalışan sürücülərin əməkhaqları bugünkü iqtisadi şərtlərə də tam uyğundur və ilin axırında da “BakuBas MMC”da sürücülərin əməkhaqları artırılıb. Buna baxmayaraq, daşıyıcıların böyük əksəriyyəti kart sistemindən kənarda qalıb. Həmin daşıyıcılar tərəfindən “sistem aparatları bahalıdır” kimi fikirlər eşidirik, bunlar sadəcə kart sizteminə keçməkdən yayınmaq üçün uydurulan bəhanələrdir. Hal-hazırda “BakıKART” sisteminə qoşulan 500 avtobus var ki, bu da mövcud  avtobusların hardasa 25%-dir, qalan 75% sistemdən kənarda qalıb”. 

“Bu daşıyıcıların ömrünə az qalıb” - BNA xəbərdarlıq edib!

M.Ağayev sürücülərin səhlənkarlığı ilə qarşılaşan sərnişinlərdən qarşılaşdıqları hadisələrin foto və ya video görüntülərini BNA-ya yollamalarını xahiş edib və bildirib ki, alınan məlumatlara əsasən ciddi tədbirlər görülür: 

“Sadəcə gündəlik plan üzrə hərəkətdə olan avtobusların deyil, kart sistemi ilə hərəkət edən avtobusların da sərnişinlərindən müxtəlif xarakterli şikayətlər alırıq. Hər bir müraciət, şikayət əsasında BNA öz üzərinə düşən xüsusi tədbirləri görür, daşıyıcıların üzərinə düşən məsuliyyətlə bağlı isə onlara xəbərdarlıq edilir. Marşrut xəttində nadir hallarda belə olsa, sürücü problem yaradırsa, bu, həmin sürücünün problemidir, bir marşrut xətti üzrə mütəmadi olaraq sürücülərdə problem müşahidə olunursa (avtobusu idarə etməsində, sərnişinlərlə münasibətində və s.), bu artıq o deməkdir ki, daşıyıcı işinə məsuliyyətsiz yanaşır. Bu cür daşıyıcıların da ömrünə az qalıb. Çünki avtobus parkının yenilənməsi nəticəsində bu kimi bir çox problemlər öz həllini tapacaq.  İşinə məsuliyyətsiz yanaşan, qoyulan tələblərə əməl etməyən, edilən xəbərdarlıqlara məhəl qoymayan, sürücüləri işə götürərkən məsuliyyətsizlik edən daşıyıcılara qarşı daha ciddi tədbirlər görüləcək”, -  deyə M. Ağayev bildirib.

Bakıda niyə bütün avtobuslar kart sisteminə keçmir? - ARAŞDIRMA, fotoşəkil-3

Bakıda nəqliyyatla bağlı irimiqyaslı layihələr gerçəkləşəcək

Mətbuat katibi BNA-nın gələcək maarifləndirici layihələri barədə də məlumat verib:

“2019-cu il Bakı şəhər nəqliyyatının tarixində əhəmiyyətli il olacaq.  Qeyd etdiyimiz kimi yeni avtobuslar gətiriləcək və kartlaşma sisteminin əhatə dairəsi genişlənəcək. Sərnişindaşıma sahəsində “Koroğlu Nəqliyyat Mübadilə Mərkəzi”nin tam, müasir bir infrastruktur olaraq istifadəyə verilməsi isə Bakı şəhəri üçün ilk olacaq. Avtobuslar üçün xüsusi istiqamət zolaqlarının təşkili istiqamətində ciddi işlər, tədbirlər  görüləcək - təxminən 30-a yaxın yerlərdə xüsusi hərəkət zolaqlarının çəkilməsi planlaşdırılır. Yol hərəkətinin təşkili ilə bağlı ciddi tədbirlər nəzərdə tutulur - müxtəlif küçə və prospektlərdə nəqliyyat hərəkətinin yaxşılaşdırılması ilə bağlı layihələr işlənib hazırlanıb, onlar icra ediləcək. Misalçün, Yusif Səfərov küçəsi istiqamətində yeni giriş-çıxış dəhlizlərinin açılması, parklanma yerlərinin idarəolunması ilə bağlı tam yeni bir siyasət işlənib hazırlanıb ki, icrası həyata keçiriləcək. Daha sonra dayanma-durma qaydalarına riyayət edlilməsi ilə bağlı ciddi addımlar atılır”, - deyə mətbuat katibi fikrini tamamlayıb.

Agentliyin rəsmisinin açıqlamasından belə qənaətə gəlmək mümkündür ki, bütün sərnişin daşıyan avtobusların ən azı şəhərdaxili fəaliyyət göstərən avtobuslar qədər yaxşı idarə edilməsinə az qalıb. Bizə sadəcə gözləmək və vəd edilən bütün bu yenilikləri görmək qalır.   

Hazırladı: Ramilə Qardaşxanqızı

Bakucity.az

Araşdırma Bakı sərnişin avtobusu
Əgər səhv görmüsünüzsə, mətndə səhvi seçin və Ctrl+Enter sıxaraq redaksiyaya göndərin
Şərhlər