Bakıda keyfiyyətli oyuncaqları haradan almaq olar? - ARAŞDIRMA

Bakıda keyfiyyətli oyuncaqları haradan almaq olar? - ARAŞDIRMA, Javid

Uşaqlara oyuncaq seçərkən nələrə diqqət edilməlidir?

Bir çox valideynlər övladlarına oyuncaq alarkən, seçdikləri məhsulun keyfiyyətinə o qədər də diqqətli yanaşmırlar. Halbuki oyuncağın keyfiyyəti və harada istehsal olunması böyük əhəmiyyət daşıyır. Həssas uşaq vücudu keyfiyyətsiz oyuncaqlardan bakteriya qapa, bu isə sonda xoşagəlməz hallarla nəticələnə bilər. Bakıda satılan uşaq oyuncaqları standartlara cavab verirmi, yaxşı oyuncaqları haradan almaq olar, mütəxəssislər nələri məsləhət görürlər? Bakucity.az-ın növbəti araşdırması bu mövzu ətrafındadır. Məsələyə dair mütəxəssis rəyi almaq üçün biz əvvəlcə "Avrasiya Hospital"ın həkim-pediatrı Tərlan Əyyubova müraciət etdik.

Pediatr: "Ən aşağı keyfiyyətli oyuncaqlar Çin istehsalıdır"

Həkimin sözlərinə görə, uşaq oyuncaqları alarkən hər detala diqqət yetirmək, seçimə ciddi yanaşmaq lazımdır: 

"Açığı, mən şəhərimizdə satılan oyuncaqların əksəriyyətinin  keyfiyyətindən narazıyam. Onlarda kəskin və xoşagəlməz qoxu var, xüsusilə ucuz plastmastdan düzəldilən oyuncaqlarda.  Çin istehsalı olan oyuncaqlar almağı valideynlərə məsləhət görmürəm, çünki ən aşağı keyfiyyətli oyuncaqlar Çin istehsalıdır".

T.Əyyubov qeyd edib ki, bu məhsulların istehsalı zamanı çox ucuz zərərli maddələrdən istifadə olunduğundan uşağın sağlamlığına xələl gələ bilər.

Bakıda keyfiyyətli oyuncaqları haradan almaq olar? - ARAŞDIRMA, fotoşəkil-1

"Yaxşı brendlərdə adətən məhsulun tərkibi öz əksini tapır, ona görə də imkan daxilində bu detalı diqqətlə öyrənməyə çalışın. Çindən fərqli olaraq, Türkiyə və Avropadan bizim bazara idxal olan  oyuncaqlar kifayət qədər keyfiyyətlidir", - deyə həkim bildirib.

Pediatr vurğulayır  ki, oyuncaqların istehsalında keyfiyyətsiz rənglərdən də istifadə oluna bilər:

"Əgər siz uşağın əllərinin və  paltarının oynadığı  oyuncağın rənginə bulaşdığını aşkar etsəniz, dərhal o  oyuncağı bir kənara atın. Bundan başqa, uşaq  keyfiyyətsiz oyuncaqlarda  asanlıqla qırılan xırda parçaları uda bilər və nəticədə onun tənəffüs yolunda tıxanma (respirator traktının keçilməzliyi sindromu) yarana bilər". 

Həkim bildirib ki, yumşaq oyuncaqların seçiminə də diqqətlə yanaşmaq lazımdır:

“Keyfiyyətsiz, yumşaq oyuncaqların tükü tez tökülür və bu çox vaxt  allergik reaksiyalara səbəb olur.  Belə oyuncaqları çoxlu toz topladığına görə dezinfeksiyaedici maddələrlə müntəzəm təmizləmək lazımdır”. 

Bakıda keyfiyyətli oyuncaqları haradan almaq olar? - ARAŞDIRMA, fotoşəkil-2

Oyuncaqları necə yumaq lazımdır?

Həkim  oyuncaqları axar su ilə yumağı  tövsiyə edir. Oyuncaq çox çirklənibsə, adi sabundan istifadə etmək olar:

"Tərkibində həlledicilər olan yuyucu vasitələrdən  istifadə etmək olmaz. Birincisi, onlar rəngə çox ziyan vuracaqlar, ikincisi də bu uşaq sağlamlığı üçün zərərlidir".

Oyuncaqların hazırlandığı materiallara gəlincə, pediatrın sözlərinə görə, daha təhlükəsiz materiallar taxtadan olanlar sayılır, amma onlarda lak örtüyü olmamalıdır:

"Məlumdur ki, uşaq əlinə düşən hər şeyi ağzına aparır. Bəzi oyuncaqların tərkibində çoxlu kimyəvi maddələr var, ona görə də onların uşaq orqanizminə düşməsi olduqca arzuolunmazdır".

Oyuncaq seçirik

Bu gün Bakıda dünyada ən tanınmış brendlərin oyuncaqlarını satan və kifayət qədər geniş seçim imkanları təklif edən mağazalar mövcuddur. Belə məhsulların keyfiyyəti qiymətə uyğundur, bundan başqa, onların sertifikatları da var.

Söhbətləşdiyimiz “Gallery 4 kids” uşaq mağazasının meneceri valideynlərə keyfiyyətinə əmin olmadıqları ucuz oyuncaqları almağı məsləhət görmür:

"Demək olmaz ki, ən yaxşı oyuncaqları hansısa müəyyən bir istehsalçı buraxır. İstehsalçıdan istehsalçıya fərq var. Hansısa şirkətin qurğuları yaxşıdır, bir başqasının avtomobili və ya kuklaları. Biz yalnız sertifikatlı mal almağa çalışırıq. Bizdə əsasən Almaniyadan, Belçikadan, BƏƏ-dən və digər ölkələrdən gətirilən oyuncaqlar satılır".

“The Toy Story” mağazasının meneceri Salman Əsədov isə açıqlamasında qeyd edib ki, onlarda “LEGO”dan, həmçinin müxtəlif firmalardan olan qurğulara və pazllara tələbat daha çoxdur:

"Əlbəttə, oyuncaq avtomobillər və kuklalar da çox populyardır, ancaq əksərən stolüstü oyunlar və  qurğular alırlar. Ən keyfiyyətli oyuncaq istehsalçısı zənnimcə “LEGO”dur.  Bu şirkətin oyuncaqları azyaşlı və daha böyük uşaqlar üçün münasibdir. Qiymətlər  25 manatdan başlayır".

Bakıda keyfiyyətli oyuncaqları haradan almaq olar? - ARAŞDIRMA, fotoşəkil-3

Mağaza əməkdaşının sözlərinə görə, oyuncaqlar əsasən, karton, plastik, rezin, taxtadan istehsal olunur. Amma bu materialların keyfiyyəti heç də həmişə lazımi səviyyədə  olmur. Bir qayda olaraq, keyfiyyətli məhsulları tanınmış brendlər istehsal edirlər. Ona görə də onların mallarının həmişə sertifikatı olur”.

“Kids Smart Baku” mağazasının əməkdaşı saytımıza açıqlamasında bildirib ki, onlar da firma mallarının keyfiyyəti barədə sertifikatları təqdim etməyə hazırdırlar:

"Oyuncaqların istehsalı üzrə ən keyfiyyətli firmalardan biri -  “Chicco”dur. Həmçinin “INTEX” və ya “Playgro” firmalarının da adlarını çəkə bilərəm. Bizdə müştərilər Türkiyə, Çin, İtaliya, ABŞ və s. kimi ölkələrin istehsalı olan  malları tapa bilərlər".

“Early Learning Centre”in satış üzrə məsləhətçisi isə bildirdi ki,  onlar yalnız brend firmalarla işləyirlər:

"Biz yalnız Böyük Britaniyanın oyuncaq istehsalçı şirkəti "ELC" ilə işləyirik. Bu brendin bütün oyuncaqları ekoloji təmiz materiallardan hazırlanır".

Nəticə

Oyuncaqlar uşağın inkişafında mühüm rol oynayırlar. Buna görə də onların  seçiminə xüsusi diqqətlə yanaşmaq lazımdır. Keyfiyyətli oyuncaq uşağın sağlamlığına zərər vermədən, onun təfəkkür və təxəyyülünün formalaşmasına səbəb olur. 

Sonda oxucularımıza Bakı mağazalarında satılan bəzi oyuncaqların ortalama qiymətlərini təqdim edirik:

Mağaza

Konstuktor

Yumşaq oyuncaqlar

Kuklalar

Maşınlar

“Gallery 4 kids”

14-105AZN

10-49 AZN

18-86 AZN

12-92 AZN

“The Toy Store”

10-25 AZN

6-45 AZN

6-75 AZN

3-30 AZN

“Imaginarium”

15-199 AZN

17-119 AZN

22-169 AZN

13,30-199,20 AZN

“Kid Smart Baku”

10-50 AZN

5-50 AZN

5-60 AZN

5-61 AZN

“Early Learning Centre”

51-71 AZN

49-15 AZN

18-86 AZN

12-92 AZN

Züleyxa İsmayılova

Bakucity.az

Uşaq oyuncaqları
Əgər səhv görmüsünüzsə, mətndə səhvi seçin və Ctrl+Enter sıxaraq redaksiyaya göndərin

Şərhlər