Bakı məzarlıqlarındakı dəfn problemi həll olunacaqmı? - ARAŞDIRMA

Bakı məzarlıqlarındakı dəfn problemi həll olunacaqmı?  - ARAŞDIRMA, Javid

Yeni qəbul olunan qərarlar məzarlıqlara necə təsir göstərəcək?

Bakıda dəfn mərasimlərinin baha başa gəlməsi, qəbirlərin standartlara uymaması kimi mövzular artıq uzun müddətdir ki, gündəmi zəbt edib. Bu problemlərin həllinə dəstək olmaq üçün bir müddət əvvəl “Qəbiristanlıqların salınması və idarə olunması qaydaları"na dəyişikliklər edildi. Yeni qaydalar problemin həllində nə dərəcə rol oynayacaq?  Köklü problemlər həllini tapa biləcəkmi? Bakucity.az Bakı qəbirisitanlıqlarındakı problemləri araşdırıb və məsələ barəsindəki bir çox suallara cavab tapmağa çalışıb. Materialı təqdim edirik.  

Dəfn mərasimlərində vətəndaşlardan əlavə ödəniş alınır? 

Bakı Şəhər İcra Hakimiyyətinin Mənzil Kommunal Təsərrüfat Departamentinin Əhaliyə Vətəndaşlıq Xidməti Trestinin (ƏVXT) baş mühəndisi Sabir Həsənov Bakucity.az-a açıqlamasında deyib ki, vətəndaşlardan əlavə pul alınması ilə bağlı Trestə şikayət daxil olmayıb:

 “Qəbiristanlıqların salınması və idarə olunması barədə 4 dekabr 2018-ci ildə Nazirlər Kabineti tərəfindən təsdiqlənən yeni qərara görə, cavabdehlik əsasən bələdiyyələrin üzərinə düşür. Bakıda olan 100 qəbristanlığın cəmi 32-si Trestə məxsusdur, qalanları barədə gəzən söhbətlərin bizə heç bir aidiyyatı yoxdur. Həmçinin ölkə qanunvericiliyində qəbir yerləri üçün təyin olunmuş dövlət rüsumu da var. Rüsum müsəlmanlar üçün 63, qeyri-müsəlmanlar üçün 79 manat təşkil edir. Amma bu məzarın qazılması, əməkhaqqı və s. üçündür. Ola bilsin, vətəndaşlar bu barədə məlumatlı deyil. Bizim məzarlıqlar yoldan çox uzaqda olur və işçilər uzun məsafədən daş, qum, sement və s. kimi materiallar daşıyırlar. Tikinti materiallarını ölü sahibi özü almayanda biz alırıq. Yəni, ölü sabibi məzarı özü qazarsa, tikinti materiallarını pulla alırsa torpaq vətəndaşa pulsuz verilir”.

Vətəndaşlardan əlavə pul istənilsə, tədbirlər görüləcək

“Bizim qəbristanlıqlarda vətəndaşdan dövlət rüsumundan əlavə pul istənilmir” – Trestin rəsmisi deyib və əlavə edib:

Bakı məzarlıqlarındakı dəfn problemi həll olunacaqmı?  - ARAŞDIRMA, fotoşəkil-1

“Dövlət rüsumu, xidmətlər və tikinti materiallarına edilən qanuni ödənişlərdən başqa, istənilən digər ödəniş qanunvericiliyə ziddir. Ümumiyyətlə, bu günə kimi Trestə vətəndaşlardan məsələ ilə bağlı heç bir şikayət daxil olmayıb. Əgər bununla bağlı bizə hansısa şikayət daxil olarsa, araşdıracağıq. Hansı qəbiristanlıqda bu hal baş veribsə, kim vətəndaşdan rüsumdan artıq pul istəyir və ya alırsa, tədbir görəcəyik. Vətəndaşlara media vasitəsi ilə dəfələrlə müraciət etmişəm, yenə deyirəm, tabeliyimizdə olan məzarlıqlarda rüşvət halları ilə rastlaşsalar, qaynar xətt vasitəsi ilə (012) 510-83-08 bizi məlumatlandırsınlar”.

S.Həsənov sonda qeyd edib ki, Hövsan, Şüvəlan, Mərdəkan, Buzovna qəbiristanlıqları, Qaraçuxur, Əhmədli kənd qəbiristanlığı, biləcəridə 3 qəbiristanlıq, Xırdalan qəbiristanlığı, Qurd qapısı qəbiristanlığı, Dağüstü 1, Dağüstü 2 və s. kimi qəbiristanlıqları Trestə məxsusdur və bu məzarlıqlarla bağlı istənilən şikayəti qəbul edirlər.

“Standartlaşdırma ilə bağlı qanun qəbul olunsa belə, problem qalacaq” 

Bakucity.az-a mövzu ilə bağlı fikir bildirən Milli Məclisin İctimai Birliklər və Dini Qurumlar Komitəsinin üzvü millət vəkili Fazil Mustafanın fikrincə, dövlət qurumlarının əksəriyyətində qaynar xətt sisteminə məsuliyyətsiz yanaşılır:

Bakı məzarlıqlarındakı dəfn problemi həll olunacaqmı?  - ARAŞDIRMA, fotoşəkil-2

“Bizdə əksər dövlət qurumlarında sadəcə qaynar xətt yox, başqa prinsiplər də yaxşı işləmir və bu sistemlərə məsuliyyətlə yanaşılmır. Təbii ki, qəbiristanlıq məsələsində ən azından vətəndaşa hörmət göstərilməlidir, insanlar aldadılmamalıdır, onlara konkret informasiya verilməlidir. Ümumiyyətlə, bu sahədə problemlər çoxdur. Məzarlıqların məsələsi daha fərqli şəkildə həll olunmalıdır, ancaq hələ də konkret standartlaşdırılma ilə bağlı qanun qəbul olunmur, qəbul olunmasına da kifayət qədər maneələr var. Çünki burada xüsusi korporativ maraqlar güdülür ki, bu da məsələnin həll olunmamasına gətirib çıxarır”.

Millət vəkili məzarlıqlarla bağlı təkliflərin yeni qanunda nəzərdə tutulduğunu, lakin konkret standartlaşdırmanın olmadığını bildirib:

“Avropada, mədəni ölkələrdə eyni standartda olan qəbirlər salınır və özbaşınalıqlara yol verilmir. Bizdə təəssüf ki, insanların şöhrətpərəstliyi də müəyyən məsələlərin həllinə imkan vermir. Hətta qəbirlər mövzusunda belə fərqlilik istəyi kimi bir problem var. Hər kəs dünyadan köçən yaxınlarına sayğını bu yolla göstərmək istəyir və bir də başqalarına demək istəyir ki, bizim qəbrimiz sizinkindən daha gözəldir. Bu da təkcə dövlətə bağlı olan məsələ deyil, cəmiyyətin ümumi sağalmaz problemidir. Yoxsa standartlaşdırma ilə bağlı qanun qəbul olunsa, belə problem eyni qalacaq”.

F. Mustafa sonda bələdiyyələrin məzarlıqlarla bağlı yeni öhdəlikləri barədə də fikir bildirib:

“Təbii ki, bələdiyyələr işlərini düzgün yerinə yetirsələr, məzarlıqlarda nizam-intizam qaydalarını formalaşdırsalar, vətəndaşlar da neqativ hallar baş verən zaman konkret olaraq hansı quruma müraciət etməli olduqlarını biləcəklər”, - deyə millət vəkili fikrini tamamlayıb.  

Bakı məzarlıqlarındakı dəfn problemi həll olunacaqmı?  - ARAŞDIRMA, fotoşəkil-3

Qeyd edək ki, Nazirlər Kabineti tərəfindən "Qəbiristanlıqların salınması və idarə olunması qaydaları"na edilən dəyişikliklərə əsasən, bu ildən etibarən yeni salınan qəbiristanlıqlar bundan sonra yerli bələdiyyələr tərəfindən idarə ediləcək. Normativlərə görə isə hər məzara onun ətrafında 5 kv. m. torpaq düşür. Əlavə olaraq həyat yoldaşı üçün daha 5 kv.m. götürmək olar. Mərhum üçün yerin ayrılmasına görə vətəndaşlar qəbiristanlığın direktoruna müraciət etməli, vətəndaşın ölümü haqda tibbi arayışı ona təqdim etməlidirlər. Bu sənəd olmadan dəfn mümkün deyil. Vətəndaşlara boş yerlər göstərilir, onlar dövlət rüsumunu (müsəlman üçün 63, qeyri-müsəlman üçün 79 manat) və əgər istəsələr əlavə xidmətlərə görə haqq ödəyirlər sonra dəfn həyata keçirilir.

Hazırladı: Ramilə Qardaşxanqızı

Bakucity.az

Araşdırma
Əgər səhv görmüsünüzsə, mətndə səhvi seçin və Ctrl+Enter sıxaraq redaksiyaya göndərin

Şərhlər