Bakıda Cavad Cavadzadənin musiqi axşamı keçirildi - FOTO/VİDEO

Bakıda Cavad Cavadzadənin musiqi axşamı keçirildi - FOTO/VİDEO

Gənc kontrabas  ifaçısı “YARAT”da səhnə alıb 

Bakucity.az xəbər verir ki, yanvarın 31-ində “YARAT" Müasir İncəsənət Mərkəzində istedadlı kontrabas ifaçısı Cavad Cavadzadə 1 saatlıq konsert proqramı ilə çıxış edib. Axşamın xüsusi qonağı isə fleyta ifaçısı Nicat Salmanov olub.

Musiqi axşamında Hana Ajiaşvilinin “Contrabass Contra”,  Yelena Firsovanın “Slavanın xatirəsinə”, Məmməd Quliyevin “Fleyta pikkolo və kontrabas üçün sonata”, Rəhilə Həsənovanın “Kölgə oyunu” əsərləri səsləndirilib. 

"Musiqiçi üçün asan əsər olmur"

Bakucity.az-a gecə ilə bağlı təəssüratlarını bölüşən Cavad Cavadzadə konsertdə ifa etdiyi sonuncu əsər barədə məlumat verdi:

“Bəstəkar Rəhilə Həsənova bu əsəri 1990-cı ildə 20 Yanvar faciəsinə həsr edib. Bu konsertin baş tutmasını isə mən məhz “Kölgə oyunu”na görə istəyirdim, layihə sırf bu əsər üzərində qurulmuşdu. Çünki bu əsərin başlaması ilə bitməsini bir çox fəlsəfi məqamlarına görə insan həyatı ilə müqayisə etmək olar. Əslində musiqiçi üçün asan əsər olmur, bütün əsərlərin cürbəcür – texniki və ya mənəvi çətinlikləri olur. Bu əsərin həm texniki ağırlığı çoxdur, həm də onu səhnədə dayanmadan 20 dəqiqə ifa etmək işgəncədir.  Onun əsas özəlliyi isə ondadır ki, səhnədə ifa edəndə hiss edirsən ki, o səni alıb aparır və geri qaytarmaq istəmir. Amma ifanı bitirdikdən sonra bəstəkarın bütün hisslərini ifadə etdiyini biləndə, xoş hislər yaşayırsan. Ötən 28 ildə bu əsər heç yerdə, heç bir səhnədə ifa olunmayıb. Mən belə notların olduğunu öyrənəndə, axtarmağa başladım və çox çətinliklə tapdım. Bəstəkarla əlaqə saxladım, məlum oldu ki, Rəhilə xanım notlarını hər kəsə vermir, o, bu mövzuda çox qısqancdır və mənim haqqımda kifayət qədər məlumat əldə etdikdən sonra buna razılaşdı. Sonra notun yeni versiyasını hazırladım və bu gün səhnələşdirmək mənə qismət oldu. Ümüd edirəm bəstəkar da bəyənəcək”, - Cavad Cavadzadə deyib. 

Musiqiçi sonda “YARAT”da keçən konsertlərin özəl və maraqlı olduğunu, bu gecədən isə xoş təəssüratlarla ayrıldığını bildirib. 

Gecənin qonağı fleyta ifaçısı Nicat Salmanov da öz növbəsində konsertdən böyük zövq aldığını bildirib:

“Cavadla ilk dəfə bu gecədə 1986-cı ildə, kifayət qədər çətin notlarda yazılan əsəri ifa edərək səhnə bölüşdüm və bu eksperiment şəxsən mənim üçün maraqlı oldu. Alqışlardan da hiss etdim ki, bütün konsert iştirakçıları üçün maraqlı olub. Davamlı olmasını arzulayıram”. 

Qeyd edək ki, Cavad Cavadzadə "Metamorphosis" kamera ansamblının bədii rəhbəridir. O, Cəlal Abbasov, Rüfət Ramazanov, Xədicə Zeynalova, Rəhilə Həsənova, Dmitri Smirnov, Yelena Firsova, Hana Ajiaşvili, Məmməd Quliyev kimi müasir bəstəkarların əsərlərinin ilk ifaçısıdır və maestro Rauf Abdullayev, Nikoloz Raçveli, Lev Markiz, Ennio Morrikone, Maksim Vengerov, Loren Peticerard, Peter Rundel, İqnat Soljenitsın, Sir Neville Marriner və başqa dirijorların rəhbərliyi altında müxtəlif tədbirlərdə çıxış edib. 

Ramilə Qardaşxanqızı

Bakucity.az

Bakıda Cavad Cavadzadənin musiqi axşamı keçirildi - FOTO/VİDEO, fotoşəkil-1 Bakıda Cavad Cavadzadənin musiqi axşamı keçirildi - FOTO/VİDEO, fotoşəkil-2 Bakıda Cavad Cavadzadənin musiqi axşamı keçirildi - FOTO/VİDEO, fotoşəkil-3 Bakıda Cavad Cavadzadənin musiqi axşamı keçirildi - FOTO/VİDEO, fotoşəkil-4 Bakıda Cavad Cavadzadənin musiqi axşamı keçirildi - FOTO/VİDEO, fotoşəkil-5 Bakıda Cavad Cavadzadənin musiqi axşamı keçirildi - FOTO/VİDEO, fotoşəkil-6
YARAT
Əgər səhv görmüsünüzsə, mətndə səhvi seçin və Ctrl+Enter sıxaraq redaksiyaya göndərin
Şərhlər