Bakıda "Gənclər siyasətinin Azərbaycan modeli" konfransı keçirildi - FOTO

Bakıda "Gənclər siyasətinin Azərbaycan modeli" konfransı keçirildi - FOTO

Konfrans iki gün davam edəcək

Bakucity.az xəbər verir ki, ötən gün Bakı Konqres Mərkəzində Azərbaycan Gənclər Fondu və Gənclər və İdman Nazirliyinin maliyyə dəstəyi ilə Azərbaycan-Amerika Gəncləri İctimai Birliyi tərəfindən təşkil olunan "Gənclər siyasətinin Azərbaycan modeli" adlı beynəlxalq konfrans öz işinə başlayıb. Açılış mərasimində millət vəkilləri Ağacan Abıyev, Musa Qasımlı, Azərbaycan Gənclər Fondunun sektor müdiri Seymur Hüseynov, Bolqarıstan, Rumuniya, Macarıstan, Türkiyə, Ukrayna, Belarusiya, Rusiya və Gürcüstandan olan iştirakçılar iştirak edib.

Məlumat verilib ki, Gənclər Günü ərəfəsində konfransın keçirilməsində əsas məqsəd son illərdə Azərbaycanda gənclər siyasətinin inkişafında əldə olunan nəaliyyətlərin müzakirəsi və beynəlxalq ictimaiyyətə çatdırılmasıdır. Konfransın qarşıya qoyduğu əsas hədəf Azərbaycanda gənclər siyasəti və gənclər işində baş verən yenilikləri, eləcə də bu sahədə mütəəqqi islahatları və yeni qəbul edilən Azərbaycan gəncliyi dövlət proqramını beynəlxalq ictimaiyyətin diqqətinə çatdırmaqdır.

Qeyd edək ki, iki gün davam konfransda "Azərbaycanda gənclər təşkilatları üçün mövcud olan imkanlar və resurslar", Azərbaycanda gənclər siyasətinin effektiv həyata keçirilməsində cari tədbirlər" və bu kimi mövzularda panel sessiyalar təşkil ediləcək. Yerli və beynəlxalq tərəfdaşları bir araya gətirərək qrup işləri və müzakirələr vasitəsilə Azərbaycan və Avropa proqramları arasında mübadilə və iştirakı genişləndirməyə yönələn müzakirələr aparılacaq. Konfrans zamanı təqdimatlar vasitəsilə iştirakçılar beynəlxalq proqramda iştirak, Azərbaycanda gənclər işi və gənclər siyasəti, tərəfdaş ölkələrlə ortaq layihələrin icrası məsələsi müzakirə olunacaq.

İştirakçılar Azərbaycanda gənclər sahəsində fəaliyyət göstərən müxtəlif təşkilatlara tanışlıq səfərləri edərək ölkəmizdə bu sahədə görülən işlərlə əyani tanış olmaq fürsəti əldə edəcəklər.

Konfransın qarşısında duran əsas vəzifələr gənclər işinin təşkili ilə bağlı beynəlxalq tərəfdaşlarla fikir və təcrübə mübadiləsi aparmaq, Azərbaycanda gənclər təşkilatlarının beynəlxalq proqramlarda iştirakını artırmaq və onların beynəlxalq əməkdaşlığını gücləndirməkdir. Konfrans ölkədə gənclərin inkişafına və gənclər sahəsində yeni sosial xidmətlərin yaranmasına, gənclər arasında könüllülük fəaliyyətinin genişləndirilməsinə təkan verəcəkdir. Konfrans çərçivəsində gənclər siyasəti ilə bağlı müxtəlif panel sessiyalar keçiriləcəkdir və gənclər sahəsində mövcud olan imkanlar, yeni əməkdaşlıq perspektivləri və qarşıda duran hədəflər iştirakçıların müzakirə mövzusu olacaqdır. 

Fevralın 1-də iştirakçılar Azərbaycanda gənclər sahəsində fəaliyyət göstərən müxtəlif təşkilatlara tanışlıq səfərləri edərək ölkəmizdə bu sahədə görülən işlərlə əyani şəkildə tanış oldular, qrup işlərində gənclər siyasəti sahəsində beynəlxalq əməkdaşlığa dair öz ideya və təkliflərini irəli sürdülər. Konfrans öz işini işçi qrupları ilə yekunlaşdırdı.  

Bakucity.az

"Gənclər siyasətinin Azərbaycan modeli" konfransı
Əgər səhv görmüsünüzsə, mətndə səhvi seçin və Ctrl+Enter sıxaraq redaksiyaya göndərin
Şərhlər