"İçərişəhər"də böyük dəyişikliklər olacaq - AÇIQLAMA

"İçərişəhər"də böyük dəyişikliklər olacaq - AÇIQLAMA

Bakı Xanlarının Evinin bərpası da layihəyə daxildir

Məlum olduğu kimi, "İçərişəhər" Dövlət Tarix-Memarlıq Qoruğu İdarəsi "İçərişəhər"in  maddi-mənəvi dəyərlərinin qorunmasını əsas vəzifəsi hesab etdiyinə görə, diqqətini tarixi və memarlıq abidələrinin bərpasına ayırır.  Bununla əlaqədar, tarixi əhəmiyyətli daha bir mühüm obyektin, Bakı Xanlarının Evinin bərpası haqqında qərar qəbul edilib. Tam yenidənqurmadan sonra bura muzey olacaq. Bakucity.az "İçərişəhər"də baş verəcək dəyişikliklərlə bağlı araşdırmasını oxuculara təqdim edir. 

İnqilabi dəyişikliklər

"İçərişəhər"də Qız Qalası, Şirvanşahlar Sarayı kompleksi, Məhəmməd məscidi, Cümə məscidi, Bəylər məscidi, Hacı Banu hamamı kimi bir çox başqa tarixi əhəmiyyətli memarlıq abidələrinin bərpası işləri artıq başa çatıb. Bununla "İçərişəhər"in görkəmi  xeyli dəyişib. Nəhayət, növbə məhşur Bakı Xanlarının Evinə gəlib.

"İçərişəhər" Tarix-memarlıq qoruğunun əməkdaşı Zeynəb Cahan Bakucity.az-a açıqlamasında yeni layihə barədə danışıb:

"İçərişəhər"də böyük dəyişikliklər olacaq - AÇIQLAMA, fotoşəkil-1

"Tarixi-monumental abidələrin konservasiya-bərpa işləri "İçərişəhər" Dövlət Tarix-Memarlıq Qoruğu İdarəsinin fəaliyyətində prioritet istiqamətlərdən biridir. Böyük Qala küçəsi 44, 46, 48, 50 ünvanlarında yerləşən Bakı Xanlarının Evi kompleksi bu sahədə yeni layihədir".

Zeynəb xanımın vurğuladığı kimi XVIII əsrə aid bu kompleks mədəni irs abidəsi sayılır, 4500 kvadratmetr sahəni əhatə edən kompleks beş binadan ibarətdir. 

"Bu evin Azərbaycan tarixində əhəmiyyətli yeri var, – deyə Zeynəb xanım açıqlamasına davam edib: ХIХ əsrin sonu XX əsrin əvvəllərində Bakı Xanlarının Evi fəaliyyətinə fasilə verdi  və bu fasilə çox uzun çəkdi. Bildiyiniz kimi, "İçərişəhər" Tarix-Memarlıq Qoruğu 2018-ci ildə bərpa layihəsi çərçivəsində elmi-arxeoloji tədqiqatlara, habelə "İçərişəhər"in vəziyyətinin yaxşılaşdırılması və təmizlənməsi işlərinə başlayıb. Bu proqrama əsasən ərazidə aşkar edilmiş su anbarı və təndir də bərpa ediləcək".

"İçərişəhər"də böyük dəyişikliklər olacaq - AÇIQLAMA, fotoşəkil-2

Əməkdaşın sözlərinə görə, əsas məqsəd bu qocaman abidənin təmir işləri başa çatdıqdan sonra muzeyə çevrilməsi və  arxeoloji kompleks, hamam və parkla birlikdə böyük bir kompleksin bir hissəsi olmasıdır. Parkın yaradılması üçün həyətyanı sahənin tamamilə abadlaşdırılması planlaşdırılır. Ehtimal olunur ki, "İçərişəhər"də yaradılacaq yeni bağ bakılıların və paytaxtın qonaqlarının istirahəti üçün sevimli yerə çevriləcək.

Keçmişə aparan gələcəyin texnologiyası

Zeynəb Cahanla söhbət zamanı öyrəndik ki, gələcək muzeyin qonaqlarını tarixi kompleksdə çox maraqlı şeylər gözləyir:

"Bakı xanları muzeyi müasir, ən yeni avadanlıqlarla təchiz olunacaq və bu da ziyarətçilərdə Bakının orta əsr dövrünə səyahət etmək imkanı yaradacaq. Sərgi salonunda o dövrün mədəniyyəti haqqında tarixi məlumatlarla tanışlıq mümkün olacaq".

"İçərişəhər"də böyük dəyişikliklər olacaq - AÇIQLAMA, fotoşəkil-3

Müsahibimiz qeyd etdi ki, bu texnologiya şəhərin orta əsrlər tarixi barədə ətraflı məlumat verəcək. Sərgi salonu, kompleksdə 1 və 2 saylı binalarda təşkil olunacaq. Bu zallarda həmin dövrün ab-havası yaradılcaq. Bundan başqa, xüsusi otaqlarda  klassik orta əsrlər tarixiylə, sakinlərin dini görüşləri, ticarəti və  mətbəxi ilə tanışlıq mümkün olacaq.

Sonda qeyd edək ki, rekonstruksiya işləri zamanı "İçərişəhər"in bu hissəsində yaşayan sakinlər kirayə ödənişləri dövlət hesabına olmaqla, başqa yerlərə köçürülüblər.

 Züleyxa İsmayılova

Bakucity.az

İçərişəhər
Əgər səhv görmüsünüzsə, mətndə səhvi seçin və Ctrl+Enter sıxaraq redaksiyaya göndərin
Şərhlər