Bakıda yeni sosial layihəyə start verildi - FOTO

Bakıda yeni sosial layihəyə start verildi - FOTO

"TOM"un təqdimatı keçirilib

Bakucity.az xəbər verir ki, İsrail Səfirliyi, “Azercell Telekom” və Barama İnnovasiya və Sahibkarlıq Mərkəzinin birgə həyata keçirdiyi “TOM” ("Tikkun Olan Makers" -Dünyanı təmir etmək) layihəsinin təqdimatı bu gün saat 11:00-da Heydər Əliyev Mərkəzində gerçəkləşib.

Layihənin əsas məqsədi xüsusi qayğıya ehtiyacı olan insanların gündəlik problemlərinə həllər tapmaq məqsədilə ixtiraçılarla ehtiyac sahiblərini əlaqələndirməkdir.

Təqdimat mərasimi "Azercell", Regional İnkişaf İB, Paşa Bank, "JOY" Uşaq İnkişaf Mərkəzi, Bakı Mühəndislik Universiteti, Azərbaycan Dövlət İdman Akademiyasının Media Mərkəzi və digər qurumların dəstəyi ilə baş tutub.

Tədbiri İsrailin Azərbaycandakı Səfirinin müvəqqəti işlər vəkili Avital Rozenberq açaraq bildirib ki, azərbaycanlılara olan inam bu tədbirin Bakıda baş tutmasına səbəb olub:

""TOM" gündəlik problemlərin texnoloji həlli yollarını tapmaq məqsədilə istehsalçıları, dizaynerləri, developerləri və mühəndisləri sağlamlıq imkanları məhdud insanlarla bir araya gətirən hərəkatdır və bu hərəkatın Azərbaycanda keçirilməsi buradakı insanlara inamdan irəli gəlir. Tədbir Bakı sakinlərinin yaradıcılığını, qayğıkeşliyini və komanda işini göstərəcək".

Tədbirdə həmçinin, Barama İnnavasiya və Sahibkarlıq Mərkəzinin rəhbəri İmran Bağırov, Əmək və Əhalinin Sosial Müdafiəsi Nazirliyi yanında Dövlət Sosial Müdafiə Fondunun Sosial xidmətlər və proqramlar şöbəsinin müdiri Vüqar Behbudov, Azərbaycan Respublikası Ailə, Qadın və Uşaq məsələləri üzrə Dövlət komitəsinin baş məsləhətçisi Məftunə İsmayılova çıxış ediblər.

İstedadlı şəxslər üçün elan olunmuş çağırışdan sonra, potensial ixtiraçılara iştirak üçün qeydiyyatdan keçməyə 28 fevral tarixinədək vaxt veriləcək. 

"TOM" çağırışında komanda şəklində iştirak edən yarışçıların adları mart ayında açıqlanacaq. Onlar "Pre-Tom" tədbirində bir-biri ilə tanış olacaq və birlikdə çalışmağa başlayacaqlar. Komandalar təxminən 1 ay ərzində qoyulmuş problemə həll yolu tapmalıdırlar. Layihə dövründə komandalara "Schwatech" MMC tərəfindən dəstək göstəriləcək. 

Komandaların yekun məhsulları 17 aprel 2019-cu ildə keçiriləcək "TOM" tədbirində təqdim olunacaq və bütün ideyalar ictimaiyyətə açıq olacaq.

Qeyd edək ki, "TOM" Beynəlxalq Qeyri Kommersiya hərəkatı olan "Reut Group" tərəfindən təşkil olunan və fiziki məhdudiyyətli insanların həyatlarını asanlaşdırmaq üçün innovativ texnologiyaların tətbiqini stimullaşdıran beynəlxalq layihədir. Əsas məqsədi isə dünyada olan 1 milyarddan çox fiziki məhdudiyyətli insanların hər gün üzləşdiyi problemlərin aradan qaldırılması üçün əlçatan həllər yaratmaqdır.

Layihəyə ilk dəfə 2014-cü ildə Arnon Zamir və Josh Gottesman "ROI Schusterman Connection Points" proqramı çərçivəsində start verib.

Tədbirdə həmçinin "TOM"un Azərbaycandakı veb səhifəsi təqdim olunub. Səhifədə fiziki məhtudiyyətli şəxslərin gündəlik üzləşdikləri çətinliklər, həm də ixtiraçılara müraciət əks olunacaq.

Ramilə Qardaşxanqızı

Bakucity.az

TOM
Əgər səhv görmüsünüzsə, mətndə səhvi seçin və Ctrl+Enter sıxaraq redaksiyaya göndərin
Şərhlər