Bakıda "Klaustrafoblar" filminin qapalı premyerası keçirildi - FOTO

Bakıda "Klaustrafoblar" filminin qapalı premyerası keçirildi - FOTO

Filmin nümayişi premyeradan 2 gün əvvəl baş tutub.

Bakucity.az xəbər verir ki, fevralın 5-də “Gənclik Mall”da yerləşən "CinemaPlus"da uzun müddətdən bəri gözlənilən filmin nümayişi baş tutub. “Klaustrafoblar" psixoloji trilleri premyeradan 2 gün əvvəl nümayiş olunub. 

Kinoteatr növbəti dəfə öz dekorasiyası ilə qonaqları təəccübləndirib. Dekorasiya filmdəki qapalı məkanı imitasiya edib. 

Qonaqlar arasında olan müğənni Dilarə Kazımova Bakucity.az-a filmdə baş verənlərə bənzər qorxunu o da bəzən şəxsi həyatında yaşadığını bildirib:

“Səmimi desəm, qapalı məkanda çox qalanda bəzən məndə də klostrofobiya halları baş verir. Buna görə də bu filmi seyr edərkən ürəyimin tez-tez döyünəcəyini düşünürəm (gülür). Mən neqativ hisslər doğuran filmləri yox, komediyaları daha çox sevirəm, çünki gülmək istəyirəm. Amma “CinemaPlus” komandası mənim dostlarımdır, xeyli birgə layihələrimiz var. Onlar məni bu filmə baxmağa dəvət edəndə, filmin adı mənə maraqlı gəldi”. 

Qonaqlar arasında olan məşhur qadın sahibkar Nərminə Zeynalzadə də fikirlərini bizimlə bölüşüb: 

“Məncə, film çox maraqlı olacaq. Çünki onun çox emosional, psixoloji, təsirli süjeti var. Premyeranın isə mükəmməl şəkildə təşkil olunduğunu qeyd etmək istəyirəm! Qonaqlara xüsusi kuponlar təqdim olunub. Ümumiyyətlə, mən bütün film janrlarını bəyənirəm, amma dəhşət və triller filmlərini daha çox sevirəm”.

Filmin rejissoru Adam Robitel "Klaustrafoblar"da əsas rollardan birini oynayıb. Filmdə həmçinin Debora Enn Uoll, Taylor Labin, Teylor Rassel, Loqan Miller, Nik Dodani, Cessika Satton, Cey Ellis, Ceymi-Li Mani və Vere Tindale rol alıb. 

Süjetin mərkəzində bir-birlərini tanımayan 6 gəncin hekayəsi dayanır. Onlara 1 milyon dollar mükafatı olan yarışda iştirak təklif olunur. İştirakçılar qapalı otaqdan çıxmamalıdırlar. Onlar tezliklə anlayırlar ki, yüksək texnoloji tələlər ilə dolu labirintə düşüblər. Qəhrəmanlar indi öz fərasətlərini, dözümlülüklərini göstərməlidirlər, çünki mərcə onların həyatı qoyulub. Nəticədə sağ qalmaq uğrunda  təsəvvür olunmaz bir döyüş başlayır. 

Qeyd edək ki, tədbirin təşkilinə “Claustrophobia Baku” və “Red bull” dəstək göstərib. 

Bakıda "Klaustrafoblar" filminin qapalı premyerası keçirildi - FOTO, fotoşəkil-1 Bakıda "Klaustrafoblar" filminin qapalı premyerası keçirildi - FOTO, fotoşəkil-2 Bakıda "Klaustrafoblar" filminin qapalı premyerası keçirildi - FOTO, fotoşəkil-3 Bakıda "Klaustrafoblar" filminin qapalı premyerası keçirildi - FOTO, fotoşəkil-4 Bakıda "Klaustrafoblar" filminin qapalı premyerası keçirildi - FOTO, fotoşəkil-5 Bakıda "Klaustrafoblar" filminin qapalı premyerası keçirildi - FOTO, fotoşəkil-6

Züleyxa İsmayılova

Bakucity.az

Primyera
Əgər səhv görmüsünüzsə, mətndə səhvi seçin və Ctrl+Enter sıxaraq redaksiyaya göndərin
Şərhlər