Bakının geyim bazarı: satılan paltar brendləri həqiqidirmi? – AÇIQLAMA

Bakının geyim bazarı: satılan paltar brendləri həqiqidirmi? – AÇIQLAMA

Bakıya geyim məhsulları ən çox hansı ölkələrdən gətirilir?

Bakıda demək olar ki, hər markada paltar tapmaq mümkündür. Şəhərin vitrinlərini yerli və xarici brendlər bəzəyir, amma bu paltarların keyfiyyəti ilə bağlı tez-tez suallar yaranır.  Bu geyimlər hansı ölkələrdən gətirilir, geyimlərin keyfiyyət göstəricisi nədir, ölkədə tekstil sənayesinin inkişafı nə yerdədir kimi suallar bir çoxlarını maraqlandırır.  Bakucity.az bu sualların cavablarını tapmaq üçün iqtisadçı-ekspert Vüqar Bayramovla söhbətləşib. Materialı oxucularımıza təqdim edirik.

Bakıya geyimlər daha çox Çin və Türkiyədən gətirilir 

İqtisadçı-ekspert Vüqar Bayramov deyir ki, Azərbaycanda yüngül məhsullara olan təlabatın ödənilməsində daha çox idxala üstünlük verilir. Bu məhsullar paytaxta müxtəlif ölkələrdən gətirilir:

Bakının geyim bazarı: satılan paltar brendləri həqiqidirmi? – AÇIQLAMA, fotoşəkil-1

“Dövlət Statistika Komitəsinin məlumatına görə, ölkəyə il ərzində 400 milyon dollarlıq yüngül sənaye məhsulları idxal edilir ki, bunun da böyük bir qismi məhz geyim məhsullarından ibarətdir. Geyimlər daha çox Çin və Türkiyədən gətirilir. Çin Xalq Respublikası geyim məhsullarının idxalında Azərbaycan üçün əsas tərəfdaş rolunu qoruyub saxlayır. Bununla belə, Avropa ölkələrindən də Azərbaycana geyim məhsullarının idxalı həyata keçirilir. Bu ölkələrin sırasında İtaliya birincidir. Mərkəzi Şərqi Avropa ölkələrindən də Azərbaycana geyim məhsulları gətirilir. Bakıya Avropa və Asiya ölkələrindən, bəzi hallarda isə ABŞ-dan 2-ci əl geyimlər də gətirilir və ucuz qiymətə satılır. İnkişaf etmiş ölkələrdə əsas məqsəd həmin məhsulların ölkədən ixracatına nail olmaqdır. Cəmiyyətdə bu geyimlərə marağın azalmasına baxmayaraq, sahibkarlar onların ölkəyə keçirilməsinə nail olurlar. Həmin məhsulların keyfiyyəti ilə bağlı isə ciddi narahatçılıqlar var".

Ekspert qeyd edib ki, geyim məhsullarının Çindən gətirilməsi az xərc tələb edir və ucuz başa gəlir:

“Eyni zamanda və çox təəssüf ki, azərbaycanlı iş adamları tərəfindən adətən Çindən aşağıkeyfiyyətli geyim məhsullarının idxalı həyata keçirilir. Bu da istehlak bazarında Çin Xalq Respublikasının məhsullarına inamsızlığın yaranmasına gətirib çıxarır". 

Türkiyədən gətirilən geyimlər orta keyfiyyətlidir

İstehlakçılar orta keyfiyyətli mal axtaranda, Türkiyədə istehsal edilən məhsullara üz tuturlar, – V. Bayramov fikrinə davam edib: Türkiyədən idxal edilən məhsulların qiyməti nisbətən baha olsa da, təbii ki, keyfiyyət baxımından Azərbaycanın istehlak bazarında Çin məhsullarından daha üstün hesab olunur. 

Bakının geyim bazarı: satılan paltar brendləri həqiqidirmi? – AÇIQLAMA, fotoşəkil-2

"Avropadan gətirilən və xüsusilə də İtaliyadan birbaşa idxal edilən geyim məhsulları daha keyfiyyətli hesab olunur və onların qiyməti daha yüksəkdir. Nəticədə Avropa ölkəyə daha keyfiyyətli və eyni zamanda daha qiymətli məhsulların idxalını həyata keçirir", - deyəb ekspert bildirib.  

Yerli sexlərdə tikilən paltarlar xarici marka adı ilə satılır

Vüqar Bayramov Bakıda tekstil sənayesinin inkişafı barədə də fikirlərini açıqlayıb. Onun sözlərinə görə, yerli istehsal daha çox ənənəvi məhsul istehsalı üzərində formalaşıb:

“Bu, məktəb, hərbi və müxtəlif geyim dəstləridir. Gündəlik istifadə olunan geyimlər və ya dünya bazarına çıxarılacaq geyim məhsulları isə bizdə hələlik istehsal olunmur. Qeyri-leqal olaraq bəzi geyim  və ayaqqabı məhsullarının yerli sexlərdə istehsalı təşkil edilir. Hətta bəzi hallarda yerli saxta məhsullar Türkiyə, Çin, hətta bəzən İtaliya malı adı ilə bazara çıxarılır. Bu, gizlin iqtisadiyyatın təzahürü kimi xarakerizə oluna bilər. Amma ölkə prezidenti 2018-ci ildə keçirilən müşavirədə gizlin iqtisadiyyata qarşı mübarizənin gücləndirilməsi ilə bağlı öz tövsiyyə və tapşırıqlarını verdi. Bu baxımdan da vergi məcəlləsinə edilən dəyişikliklər kölgə iqtisadiyyatda dövriyyənin azalmasına gətirib çıxaracaq. Belə olduğu halda gözlənilir ki, saxta mal və brend adı ilə bazara daxil olunan məhsulların növbəti illərdə sayının azalması müşahidə olunacaq". 

Bakının geyim bazarı: satılan paltar brendləri həqiqidirmi? – AÇIQLAMA, fotoşəkil-3

Yerli istehsalın potensialı böyükdür

Ekspert sonda yerli məhsulların istehsalını leqallaşdırmağı təklif edib:

“Nəzərə alsaq ki, pambıq istehsalının artımı yerli istehsal üsullu xam mal bazasını formalaşdırır, deməli, sahibkarların yerli geyim məhsullarının istehsalı üzrə ixtisaslaşdırılması vacibdir. Bazarda tələbin yüksək olması sahibkarlar üçün əlverişlidir. Yerli istehsal bir tərəfdən sahibkarlığın inkişafına, yeni iş yerlərinin yaradılmasına, məşğulluğun artırılmasına, büdcəyə daha çox vəsaitin ödənilməsinə gətirib çıxarar, digər tərəfdən idxaldan asılılığın aradan qaldırılması ilə valyutanın ölkədə qalmasına səbəb ola bilər. Bu baxımdan idxalın həcmini və bazarın miqyasını nəzərə alsaq, Azərbaycanda geyim məhsullarının istehsalı üzrə yerli istehsalın təşkil edilməsi potensialı kifayət qədər böyükdür. Dövlətin bu sahəyə dəstəyini nəzərə alanda, sahibkarların bu sektorda daha fəal olması məqsədəuyğundur”. 

Ramilə Qardaxanqızı

Bakucity.az

Geyim markaları
Əgər səhv görmüsünüzsə, mətndə səhvi seçin və Ctrl+Enter sıxaraq redaksiyaya göndərin
Şərhlər