Cəfər Cabbarlının nəvəsi Bakıdakı ev muzeyinin sökülməsinə münasibət bildirdi

Cəfər Cabbarlının nəvəsi Bakıdakı ev muzeyinin sökülməsinə münasibət bildirdi, Javid

C.Cabbarlının nəvəsi Bəhlul Abbasov mətbuata açıqlama verib

Bir müddət əvvəl Bakucity.az-ın Cəfər Cabbarlının ev muzeyinin baxımsız vəziyyətdə olması və evin söküləcəyi ilə bağlı silsilə materiallarından sonra, xəbər ictimaiyyət arasında geniş rezonans doğurub. Sosial şəbəkələrdə bir çox istifadəçilər məsələyə aydınlıq gətirilməsini tələb ediblər, Çingiz Abdullayev və Vahid Mustafayev kimi ictimai xadimlər ev muzeyinin söküləcəyi məsələsinə etiraz ediblər. Bu gün mədəniyyət naziri Əbülfəs Qarayev də məsələyə münasibət bildirib. 

Nəhayət, C.Cabbarlının nəvəsi Bəhlul Abbasov da mətbuata açıqlama verib. O, bildirib ki, məsələnin mahiyyətinə varmadan muzeyin sökülməsi ilə bağlı yanlış informasiya yayılıb. B. Abbasovun sözlərinə görə, muzeyin sağında, solunda 17 mərtəbəli binalar ucaldılıb və muzey ciddi zərər görüb: “Evdə mənim anam yaşayırdı, 1 il əvvəl vəfat edib. Həmin ərazi özəldir, anamın adınadır, şəxsi mülkiyyətdir. Orada 11-12 sot torpaq var. Bir hissəsində bacımgil yaşayır, digər hissəsi muzeydir. 

Biz orda göydələn tikmək istəmirik. Uşaqlarımız, yaşayış üçün bir-iki mərtəbəli ev tikmək istəyirik. Bu xəbər yayılandan sonra hər kəs bizi tənqid etməyə başladı. Muzeyin bir metrliyində olan şirkətlərə bina tikməyə icazə verdilər, bizə isə yox. Muzey köhnəlib, bərbad vəziyyətə düşüb və təmir edən də yoxdur. Divarlar elə çatlayıb ki, içəridən baxanda çöl görünür”.

Ərazinin satılması haqda xəbərləri təkzib edən B.Abbasov bildirib ki, tikintini Cabbarlı ailəsi aparmaq istəyir: “Deməli ərazidə bina tikmək hər kəsə olar, bizə yox. Rəhmətlik anam dəfələrlə müraciət etmişdi ki, muzey çökür, heç reaksiya verən olmadı. Amma bu xəbər yayılandan sonra hər kəs bizi naxələf övlad çıxartdı”. 

B.Abbasov bildirib ki, etdikləri heç bir müraciət aidiyyatı ünvanına çatmayıb: “Gəlib baxan yox idi ki, muzey nə gündədir. İndi biz addım atanda isə qınaq obyektinə çevrilmişik. Deyirlər ki, guya muzey söküləcək üstündə 17 mərtəbəli bina tikiləcək, altında da muzey olacaq. Belə bir şey yoxdur, bizdən heç nə soruşulmur. Biz həyətimizdə ev tikmək istəyirik, amma heç nə soruşmadan hamı bizi günahkar çıxarır. Heç kimin heç nədən xəbəri yoxdur, üstümüzə düşüblər. İllərlə o muzeydən heç xəbərləri olmayıb, oranı biz qorumuşuq. Bizim də övladlarımız var. Heç kimə ağız açmırıq. Cəfərin ailəsi səsini çıxarmır deyə, heç bir tədbir görülməməlidir? Amma indi hay-küyə başlayıblar. 

Tutaq ki, muzey şəxsi mülkdədir, bəs o heykələ niyə baxan yoxdur? Hər tərəfini dayanacaq ediblər. O ki şəxsi deyil. Ətrafında hər yer işıqlandırılıb, o heykəl üçün iki projektor yoxdur qoymağa? Rayonun başçısı hara baxır? Artıq həmin muzeyi təmir etsən də, işə yaramır, dağılacaq. Mütəxəssislər də baxıb və bildiriblər ki, muzey sökülməlidir. Biz heç bir səhv iş görməmişik. Əslində, bu yayılan informasiya doğru da deyil. Dövlət Şəhərsalma və Arxitektura Komitəsi də xəbər verib ki, orada bina tikilməsi ilə bağlı bizə müraciət daxil olmayıb”. (“Yeni Sabah”)

Bakucity.az

Bəhlul Abbasov Cəfər Cabbarlının ev muzeyi
Əgər səhv görmüsünüzsə, mətndə səhvi seçin və Ctrl+Enter sıxaraq redaksiyaya göndərin
Şərhlər