Bakıda köhnə "Sovetski"dəki bu layihə tıxaclara son qoyacaq - ARAŞDIRMA

Bakıda köhnə "Sovetski"dəki bu layihə tıxaclara son qoyacaq - ARAŞDIRMA, Javid

"Sovetski"də yenidənqurma işləri nə yerdədir?  

Bakının köhnə “Sovetski” kimi tanınan ərazisində tikinti-quruculuq işləri davam edir. Hazırda ərazinin bəzi hissələrindəki hasarlar sökülüb və burada yaradılan parkın sərhədləri artıq sezilir. Bundan başqa, Şıxəli Qurbanov küçəsi ilə Azərbaycan prospektindən Nəriman Nərimanov prospektinə qədər geniş avtomobil yolunda tikinti işlərinin əksəriyyəti başa çatdırılıb. Aidiyyatı dövlət qurumundan bildirilib ki, bu ərazinin yenidən qurulması may ayına qədər tamamlanacaq. Bakucity.az bu genişmiqyaslı layihə barədə araşdırma aparıb, materialı oxucularımıza təqdim edirik. 

Dar küçələr genişləndirilib, yeni işıqlandırma sistemi quraşdırılıb

Bakucity.az-a açıqlama verən Azərbaycan Avtomobil Yolları Dövlət Agentliyinin mətbuat xidmətinin rəhbəri Anar Nəcəfli bildirib ki, ərazidə yol infrastrukturunun tikintisi tamamilə tamamlanıb:

Bakıda köhnə "Sovetski"dəki bu layihə tıxaclara son qoyacaq - ARAŞDIRMA, fotoşəkil-1

“Bölgədə avtomobil yolunun yenidən qurulması başa çatıb və gələcəkdə heç bir dəyişiklik gözlənilmir. Yeraltı keçid artıq işləyir. Tezliklə Füzuli və Mirzə Əliyev küçələri arasında 112 metr uzunluğunda, 52 metr genişliyi olan piyada keçidinin tikintisi də başa çatacaq. İşıqlandırma sisteminin quraşdırılması isə davam edir”.

Mətbuat katibinin sözlərinə görə, bu layihənin əsas üstünlüyü ondan ibarətdir ki, xüsusilə də pik saatlarda sürətlə hərəkət etmək mümkün olmayan dar küçələr genişləndirilib. Məsələn, uzunluğu 440 metr olan B.Məcidov küçəsi 7 metrdən 15 metrədək genişləndirilib və 3 zolaqlı edilib. A. Şaiq küçəsi 5 metrdən 9-15 metr arasında genişləndirilərək 2 və 4 zolaqlı edilib.

“Burada da işıqlandırma sistemi quraşdırılıb. Ərazidə bütün zəruri kommunikasiyalar təşkil edilib. Pavyonlar, keçidlər tikilib. Əvvəllər burada çox dar küçələr var idi. Axşam saatlarında burda həmişə tıxaclar olurdu. İndi yolda hərəkət etmək həm sürücülər, həm də piyadalar üçün rahatdır”, - deyə Anar Nəcəfov açıqlamasında qeyd edib.

Layihənin tarixi ötən əsrə gedib çıxır

“Azəravtoyol”un mətbuat katibi xatırladıb ki, bu layihə hələ ötən əsrin 1980-ci illərində planlaşdırılıb:

“O zaman Füzuli küçəsi və Nərimanov prospektinə qədər ərazidə yolları genişləndirmək zərurəti barədə söz düşüb və yolların kənarında ağacların əkilməsi təklif olunub, amma müəyyən səbəblərdən plan həyata keçirilməyib. Sonra ümummilli lider Heydər Əliyev bu planın həyata keçirilməsinə ehtiyac duyub. Daha sonra Füzuli küçəsi genişləndirilib, “Qış Parkı” inşa edilib və küçə Nərimanov prospektinə doğru uzadılıb. Yenidənqurma işləri Mirzəağa Əliyev, Balababa Məcidov, Abdulla Şaiq və Dram Teatrı binasının yaxınlığına qədər aparılıb”.

A. Nəcəflinin sözlərinə görə, ərazidə yolların kənarında sökülən evlərin yerində parklar salınacaq. 

Bakıda köhnə "Sovetski"dəki bu layihə tıxaclara son qoyacaq - ARAŞDIRMA, fotoşəkil-2

Artıq bölgədə böyük tıxaclar müşahidə olunmur

Mətbuat katibinin sözlərinə görə, layihə artıq öz müsbət nəticələrini göstərir:

“Yadınızdadırsa, Füzuli və M.Əliyev küçəsində həmişə tıxaclar olurdu. Nərimanov abidəsi və Dövlət Statistika Komitəsinin binası yaxınlığında bəzi dəyişikliklər edilib. İndi orada dairəvi hərəkət var və əvvəlki kimi böyük tıxaclar müşahidə olunmur. Əlbəttə ki, pik saatlarda müəyyən qədər avtomobil sıxlığı olur, amma bütün bu dəyişikliklər digər küçələrə əhəmiyyətli dərəcədə təsir göstərir", - deyə A. Nəcəfli fikrini tamamlayıb.

Beləliklə, biz araşdırmamız zamanı öyrəndik ki, bu genişmiqyaslı layihə artıq öz müsbət nəticələrini verir. Avtomobil yolları genişləndirilib, tıxaclar azalıb, yolların işıqlandırılması, dayanacaqlar və piyada keçidləri isə öz yerində. Çox tezliklə köhnə "Sovetski" ərazisində çox böyük parklar salınacaq ki, burada Bakı sakinləri və paytaxt qonaqları rahat istirahət edə biləcəklər.

Züleyxa İsmayılova

Bakucity.az

köhnə "Sovetski"
Əgər səhv görmüsünüzsə, mətndə səhvi seçin və Ctrl+Enter sıxaraq redaksiyaya göndərin

Şərhlər