Bakıda "Nataşa, mı prişla!" tamaşası nümayiş olunacaq - VİDEO

Bakıda "Nataşa, mı prişla!" tamaşası nümayiş olunacaq - VİDEO

Pərəstişkarlar "Planet Parni iz Baku"nu Nataşa ilə nəhayət  görəcəklər

Tamaşaçılar "Planet Parni iz Baku " KVN teatrının ənənəvi aprel konsertlərinin yaxınlaşmasını gözləyir. Heydər Əliyev Sarayında 19, 20, 21, 22 aprel tarixlərində keçiriləcək "Nataşa, mı prişla” tamaşasında bu dəfə pərəstişkarları əsl yumor və sürprizlər gözləyir.    

"Planet Parni iz Baku" KVN teatrının bədii rəhbəri, əməkdar artist Tahir İmanov Bakucity.az-a yaxınlaşan konsert barədə məlumat verib:

“Həmişə olduğu kimi, bu dəfə də cəmiyyətdə vaxtaşırı müzakirə olunan aktual məsələlərə müraciət edəcəyik. Bu mövzulardan biri də məşhur robot Sofiyanın Azərbaycana səfər etməsidir. Biz Sofiyanı real həyatda qarşılaşmadığı bir vəziyyətə salmışıq. Səhnəcikdə həm yumor, həm də satira var, güldürərkən də düşündürək deyə”.

Т.İmanovun sözlərinə görə, tamaşanın ən böyük və əsas səhnəsində söhbətin nədən gedəcəyini konsertin adından da təxmin etmək olar:

“Təbii ki, bu tamaşada da biz Rusiyada yaşayan məşhur azərbaycanlı qəhrəmanlarımızın sərgüzəştlərini davam etdirəcəyik. Amma, bu dəfə biz mütləq Nataşanın üzünü də göstərəcəyik. Hansı ki, baş qəhrəmanın telefon danışıqlarında adını eşitmisiniz. Hamı ancaq bu obrazın adını bilir, özünü isə heç kim görməyib. Ona görə də, bu dəfə, tamaşaçılarımızı onunla tanış edərək sevindirəcəyik. 

Nataşa rolunu kimin ifa edəcəyi isə hələlik sirrdir". 

 "Yeganə onu deyə bilərəm ki, - teatrın bədii rəhbəri davam edib; bu möhtəşəm aktrisa bizim teatrdan deyil, dəvətlidir. Düşünürəm ki, onda hər şey alınacaq”.

Tahir İmanov tamaşaçıları çoxlu yumorun və sürprizlərin gözlədiyini bildirib:

 "Harada ki, KVN, yumor var, orada sürprizlər həmişə var! Bu il tamaşaçılarımızı tamamilə yeni parodiyalar gözləyir. Orijinal yanaşma bu parodiyalara öz rolunu oynayacaq və insanların xoşuna gələcək.Onlar həmişə parodiya etdiyimiz ulduzlar və tamamilə yeni simalar olacaq. Belə deyək də, biz o artistləri göstərəcəyik ki, onlar özlərini ulduz sayırlar və el arasında onlara məşhurlar deyilir”. 

Məlum olduğu kimi, "Planet Parni iz Baku" KVN teatrı artıq uzun müddətdir ki, konsertlərində “Məhəllə” səhnəsi ilə çıxış etmirlər. Aktyorun dediyinə görə, bu il filmin üçüncü hissəsi buraxılacaq deyə, bu dəfə də "Məhəllə" səhnədə yer almayacaq.  

“2012-ci ildən etibarən konsertlərimizdə "Məhəllə"ni göstərməmişik. Bu vaxt ərzində isə böyük bir film çəkmişik və 3 martda təqdimatını da keçirmişik. Belə alındı ki, bu il “Məhəllə-3” kinoteatrlarda konsertimizlə paralel olaraq göstəriləcək. Ona görə də, KVN-i canlı izləmək istəyənlər Heydər Əliyev Sarayına gələcək, filmə baxmaq istəyənlər isə kinoteatrlara gedəcəklər". 

Nə demək olar, yeni tamaşanın premyerasına az qalıb. Tamaşaçılar yenidən sevilən sənətkarları, KVN qəhrəmanları - Tahir İmanov, Cabir İmanov, Bəhram Bağırzadə, Ələkbər Əliyev, Azər Məmmədzadə və başqalarını gözləsinlər.

Şübhəsiz ki, tamaşaçılar həmişə olduğu kimi bu tamaşada da xoş sürprizlərə, güclü satira və müsbət emosiyalara sahib olacaqlar!

Züleyxa İsmayılova

Bakucity.az

KVN
Əgər səhv görmüsünüzsə, mətndə səhvi seçin və Ctrl+Enter sıxaraq redaksiyaya göndərin

Şərhlər