Milli Kitabxana Bakı sakinləri üçün möhtəşəm yeniliklər edəcək - AÇIQLAMA

Milli Kitabxana Bakı sakinləri üçün möhtəşəm yeniliklər edəcək - AÇIQLAMA, Javid

Bakıda kitabxanaya qayıdış var

Dünyanın ən böyük milli kitabxanalardan biri, Azərbaycanın isə ən iri kitabxanası olan M.F.Axundov adına Milli Kitabxana düz Bakının mərkəzində yerləşir. Sovet dövründə kitabxana Bakı sakinləri arasında kifayət qədər populyar olub. Mütaliə və tədqiqat aparmaq istəyənlər bir qayda olaraq bura üz tuturdular. Azərbaycan müstəqillik qazanandan sonra bir sıra problemlərə görə, kitabxananın populyarlığı Bakı sakinlər arasında azaldı. Bəs hazırda vəziyyət necədir, kitabxananın nüfuzu varmı, ora oxucuların qayıdışı müşahidə olunurmu? Bakucity.az mövzu ilə əlaqədar araşdırma aparıb, materialımızı təqdim edirik. 

Nəsimininin 800 səhifəlik biblioqrafiyası hazırlanır

Milli Kitabxananın direktoru Kərim Tahirov Bakucity.az-a açıqlamasında ilk olaraq Nəsimi ili ilə bağlı hazırlanan xüsusi tədbirlər planı barədə danışıb:

“Bu il Azərbaycanda ilk dəfə Nəsiminin əsərlərini əhatə edən 800 səhifəlik fundamental biblioqrafiyanı həm elektron, həm də kağız versiyada tərtib edəcəyik. Onun bütün əsərlərini əldə edə bilmək üçün dünya kitabxanalalarına sorğu göndərmişik. Nəsimi barədə azərbaycan, rus və ingilis dillərində tam şəkildə elektron məlumat bazası yaradılacaq. 

K.Tahirli martın 5-də baş tutacaq Türkiyə səfəri barədə də məlumat verib:

“Mədəniyyət naziri Əbülfəz Qarayev başda olmaqla, böyük bir nümayəndə heyətilə birlikdə Beynəlxalq Türk Mədəniyyəti Təşkilatının (TÜRKSOY) elan etdiyi “İmadəddin Nəsimi ili - 2019” tədbirinin açılışında iştirak etmək üçün Türkiyənin Ankara şəhərinə gedəcəyik. Orada böyük bir sərgi həyata keçirmək üçün özümüzlə 150 adda kitab aparacağıq. 

Milli Kitabxana Bakı sakinləri üçün möhtəşəm yeniliklər edəcək - AÇIQLAMA, fotoşəkil-1

Nəsiminin irsinin təbliği ilə əlaqədar növbəti layihəmiz isə Azərbaycanın Macarıstandaki səfirliyi ilə birlikdə aprel ayında Budapeştdə həm kitab sərgisi, həm də ədəbi-bədii tədbirdən ibarət olacaq. Bu kompleks layihəni (sərgi, musiqi, şeir) təbii ki, il ərzində bölgələrimizdə də həyata keçirmək fikrimiz var”. 

Növbəti  biblioqrafiya 900 səhifəlik olacaq

Kitabxananın direktoru ilin ikinci böyük layihəyə misal kimi Cəlil Məmmədquluzadənin 150 illiyinə həsr olunan tədbirlər planını qeyd edib:

“Cəlil Məmmədquluzadənin yubileyi ilə əlaqədar hardasa 900 səhifəlik fundamental biblioqrafiya həm eloktron, həm kağız versiyada olacaq. Eyni zamanda TURKSOY, Mədəniyyət nazirliyi və Milli Elmlər Akademiyası ilə birlikdə həm Türkiyədə, həm də Bakıda (Milli Kitabxanada) böyük elmi konfrans keçirəcəyik.

Nəinki elektron kataloq, elektron kitabxanamız da formalaşıb. Artıq 2-ci mərhələdəyik. Elektron kataloqlarla elektron kitabxananı birləşdirib vahid bir portalda təqdim edirik. Sadəcə müəyyən yazıçılar var ki, onlar əsərlərinin internet üzərindən yayımlanmasını istəmirlər deyə, kitabları tam açılmır". 

Milli Kitabxana Bakı sakinləri üçün möhtəşəm yeniliklər edəcək - AÇIQLAMA, fotoşəkil-2

Yerli oxucular arasında kitabxanaya qayıdış var

Kərim müəllim deyir ki, Milli Kitabxana bir neçə formada oxuculara xidmət göstərir:

“Burada elektron oxu, elektron resurslardan istifadənin təşkili, elektron dissertasiya fondu və dünya kitabxanalarına çıxış imkanları var. Kitabxanada ölkədə dərc olunan bütün qəzetlərin mövzular üzrə aylıq elektron bazası belə öz əksini tapır. Bütün bunların nəticəsidir ki, bu gün kitabxananın 162 min nəfər real, illik 4 milyona yaxın isə virtual oxucusu var. Real oxucularımızın 80%-i gənclərdir. KİV-lə birlikdə çaldığımız həyəcan təbili öz nəticəsini verir. Son 5 ildir ki, yerli oxucular arasında kitabxanaya qayıdış var. Kifayət qədər xarici oxucularımız da var. Bizim vəzifəmiz milli sərvəti hamı üçün əlçatan etməkdir”.

Milli Kitabxananın direktoru K.Tahirov sonda “Qayıdış” layihəsi barədə də məlumat verib:

“Mədəniyyət Nazirliyi ilə Milli Kitabxanan birlikdə həyata keçirəcəyi bu böyük layihə 5 il üçün nəzərdə tutulub. Azərbaycanın dünya kitabxanalarında, muzeylərində olan əlyazmalarının surətlərinin və elektron versiyalarının Milli Kitabxanada bazasını yaratmaq üçün vaxtı ilə dünyaya səpələnən külli miqdarda əlyazmalarımızı toplayacağıq”.

Sonda Milli Kitabxananın tarixi barədə

İlk dəfə 1922-ci ildə Azərbaycan Elmlər Akademiyasının binasında yaradılan və rəsmi açılışı 1923-cü ilin may ayında baş tutan kitabxananın oxu zalı 1927-ci ildə açılıb. O zaman kitabxananın fondunda cəmi 5000 nüsxə kitab olub. 13 nəfər işçisi olan bu kitabxananın ilk direktoru isə M.Səlimov olub. 1928-ci ildə kitabxana 6 şöbə: Şərq, Rus, Qərbi Avropa, Xüsusi şöbə, Xidmət və Biblioqrafiya bürosu fəaliyyət göstərib. M.F.Axundovun adı kitabxanaya 1938-ci ildə verilib. Milli Kitabxananın fondu hal-hazırda 4 604 133 nüsxədən ibarətdir və burada 24 şöbə fəaliyyət göstərir.

Ramilə Qardaşxanqızı

Bakucity.az

Milli Kitabxana
Əgər səhv görmüsünüzsə, mətndə səhvi seçin və Ctrl+Enter sıxaraq redaksiyaya göndərin
Şərhlər