Bakıda ərəb turistlər azalıb: 200 min çinli gələcək – AÇIQLAMA

Bakıda ərəb turistlər azalıb: 200 min çinli gələcək – AÇIQLAMA, Javid

Ərəb turistlər doğrudanmı Bakıya gələ bilmir?

Bir müddət əvvələ qədər paytaxt küçələrində, xüsusilə mərkəz ərazilərdə çoxluq təşkil edən ərəb turistlər indi o qədər də gözə dəymirlər. Yeni bağlanmış müqaviləyə əsasən isə qarşıdaki illərdə Bakıya 200 min çinli turistin gələcəyi gözlənilir. Bu dəyişiklik nə ilə nəticələnəcək? Çinli turistlər ölkə turizminə necə faydalı ola bilərlər? Qarşıdakı illərdə ölkədə turizm bazarı genişlənəcəkmi? – bu kimi sualları Bakıda Sağlamlıq və Termal Turizmə Dəstək Assosiasiyasının sədri, iqtisadçı Ruslan Quliyev cavablandırıb. Bakucity.az materialı oxuculara təqdim edir.

Çin bazarını fəth etmək üçün hansı işlər görülməlidir?

Saytımıza açıqlama verən Ruslan Quliyev qeyd edib ki, ölkə turizmində və beynəlxalq bazarlarla münasibətlərdə sadəcə bir istiqamətli fəaliyyət göstərmək olmaz:

“Diversifikasiya vacib məsələdir. Bu səbəbdən də fəaliyyətimizdə hər ölkə turistinə, hər bazara uyğun turizm məhsullarını artırmalıyıq. Beynəlxalq təcrübəni nəzərə alaraq dünyada hansı xidmətlərdən istifadə olunursa, dünya turistləri daha çox hansı ölkələrə gedir və daha çox hansı məhsulları alır, hansı xidmətlərdən istifadə edirsə, bunun kompleks şəkildə araşdırılması, sorğuların keçirilməsi lazımdır. Hal-hazırda bizim üçün Çin bazarı ilə yanaşı, Hindistan, Koreya, Yaponiya və s. kimi bütün bazarlar maraqlıdır. Bu turistlərin digərlərindən fərqi də ondan ibarətdir ki, bunlar uzunmüddətli səyahətlərə, yəni, gecələmə sayı artıq olan ölkələr siyahısına daxildirlər. Regionlara səyahət edərkən isə, əsasən bir neçə ölkəni əhatə edən səfərlər planlaşdırırlar və bu da onların "İpək Yolu" layihəsilə müxtəlif  marşrutlara cəlb olunmalarının vacibliyini göstərir. Əgər biz Çin bazarını fəth etmək istəyiriksə, bu istiqamətdə sistemli iş görülməli – mütəmadi təqdimatlar, tədbirlər, seminarlar, ikitərəfli görüşlər və təqdimatlar və s. keçirməliyik". 

Bakıda ərəb turistlər azalıb: 200 min çinli gələcək – AÇIQLAMA, fotoşəkil-1

“Ərəb turistlər spesifik turistlərdir” 

 Ölkədə bazar iqtisadiyyatını daha mükəmməl şəkildə formalaşdırmalıyıq. - Ruslan  Quliyev açıqlamasına davam edib:  Bizim üçün MDB məkanı, qonşu dövlətlər və təbii ki, ortaq tarixlərə malik olduğumuz xalqlara olan turların satılması önəmlidir. Bunlar “Alman məskənləri” marşrutu, “Aleksandr Düma Qafqazda” marşrutudur ki, sona çatdırmaq lazımdır. Azərbaycanda “Uzunömürlülər marşrutu” və s. kimi marşrutlar da maraqlıdır. Ərəb turistlər isə spesifik turistlərdir, amma Azərbaycana yalnız ərəb və ya çin turustləri lazım deyil. Bizim üçün gecələmə sayını çoxaltmağa istiqamətlənmiş məhsulların təklif olunması vacibdir. Qafqazda kombinə olunmuş turların həyata keçirilməsinə çox böyük ehtiyacımız var. Əgər hansısa turizm bazarını cəlb etmək istəyiriksə, bu iş sistematik görülməlidir. Yəni bir bazarda fəaliyyət göstərib başqa bazarlara keçmək olmaz”.  

Ərəblər doğrudanmı Bakıya gələ bilmir?

İraq vətəndaşlarına “ASAN viza”nın verilməməsi ölkədə ərəb turistlərin kütləvi azalmasına səbəb ola bilməz deyən ekspert, yayılan məlumatları təkzib edib: 

“İraq vətəndaşlarına sərhəddə viza verilməməsinin ölkəyə gələn turistlərin kütləvi azalması ilə heç bir əlaqəsi ola bilməz. Bəzi risk daşıyan ölkələr var ki, həmin ölkələrin vətəndaşlarına müəyyən məhdudiyyətlər qoyula bilər, amma  bu hal ölkəyə axın edən turistlərin sayında ciddi azalma ilə nəticələnə bilməz, bu doğru deyil. Çünki gəlmək istəyən hansı yolla olur olsun, gələcək”, deyə ekspert fikrini tamamlayıb. 

Bakıda ərəb turistlər azalıb: 200 min çinli gələcək – AÇIQLAMA, fotoşəkil-2

Qeyd edək ki, bu il martın 1-də Pekində “Azərbaycan Respublikası Dövlət Turizm Agentliyi və Çin Xalq Respublikası Mədəniyyət və Turizm Nazirliyi arasında çinli turistlərin Azərbaycan Respublikasına qrup səfərlərinin sadələşdirilməsi haqqında Anlaşma Memorandumu” imzalanıb. Beləliklə də yaxın illərdə Azərbaycana gələcək çinli turistlərin sayı 200 min nəfərə çata bilər. 2018-ci ildə bu istiqamətdə 50% artım müşahidə olunub.

Xatırladaq ki, ötən ilin nəticələrinə görə, Azərbaycana 2 milyon 850 min nəfər xarici vətəndaş səfər edib ki, onların da ölkə iqtisadiyyatına ümumi töhfəsi  2 milyard dollara yaxın olub.

Ramilə Qardaşxanqızı

Bakucity.az

Ərəb turistlər
Əgər səhv görmüsünüzsə, mətndə səhvi seçin və Ctrl+Enter sıxaraq redaksiyaya göndərin

Şərhlər