Bakıda ticarət obyektləri niyə sığortalanmır? – AÇIQLAMA

Bakıda ticarət obyektləri niyə sığortalanmır? – AÇIQLAMA, Javid

Sahibkarlara kompensasiya verilməlidirmi?

Dünən Bakının Nizami rayonundakı “Diqlas” ticarət mərkəzində baş verən yanğın hadisəsi daşınmaz əmlak sığortasının aktuallığını bir daha gündəmə gətirdi. Ticarət obyekti hansı məbləğdə və necə sığortalanmalıdır? Baş verən yanğında sahibkarlara kompensasiya ödənməlidirmi? Azərbaycanda ticarət obyektlərində sığorta ənənəsinin formalaşmamasına səbəb nədir? Bakucity.az sığorta üzrə peşəkar ekspert Aqşin Əlizadədən bu məsələlər barədə açıqlama alıb. Materialı oxuculara təqdim edirik. 

Sığorta şirkətləri səthi fəaliyyət göstərirlər

Saytımıza açıqlama verən ekspert Aqşin Əlizadə qeyd edib ki, obyektin sığorta pulu onun dəyərinə uyğun müəyyən olunur və daşınmaz əmlakın icbari sığortası icbari sığorta haqqında qanuna uyğun olaraq həyata keçirilir.

Baş verən yanğın hadisələrində sahibkarlara dəyən ziyanı kim ödəməlidir? Ümumiyyətlə, kompensasiya hansı şərtlərə əsasən ödənməlidir? – kimi suallara gəlincə, ekspert bu məqamda özəl sığorta münasibətlərini önə çəkib:

Bakıda ticarət obyektləri niyə sığortalanmır? – AÇIQLAMA, fotoşəkil-1

“Məlum məsələdir ki, sığorta münasibətləri tərtib olunan müqaviləyə əsasən təyin olunur. Əgər müqavilə varsa, təminat var, əgər müqavilə yoxdursa, ortada təminat da yoxdur. Xüsusilə də indiki halda. Çünki hal-hazırda sığorta münasibətləri özəl şəkildə həyata keçirilir. Yəni, kompensasiya yalnız hansısa bir şirkət tərəfindən müqavilə mövcud olduğu halda həyata keçirilə bilər”. 

Aqşin Əlizadə Azərbaycanda sığorta ənənəsinin formalaşmamasının bir çox səbəblərinin olduğunu qeyd edib, amma sığorta şirkətlərinin düzgün rejimdə çalışmamasının əsas səbəb olduğunu vurğulayıb:

“Sığorta alınan yox, satılan məhsuldur və sığorta agentləri əlavə motivasiya tədbirləri həyata keçirməlidirlər. Sığorta vasitəçiləri insanları birbaşa məlumatlandırsalar, mövcud problemlər, risklər barədə onları vaxtında xəbərdar etsələr, problemlərin qarşısını almaq olar. Yəni ən azından insanlar qarşılarına aldıqları riski görər, anlayar və gedib özləri sığortalanarlar. Təəssüf ki, hal-hazırda sığorta vasitəçiləri qeyd etdiyim məqamlara diqqət etmirlər və gördükləri səthi iş onlar üçün kifayət edir". 

Yalnız baş verən bədbəxt hadisələrdən sonra, - ekspert davam edir; məlum olur ki, sahibkarlar məhsullarını sığorta etdirməyib: 

Bakıda ticarət obyektləri niyə sığortalanmır? – AÇIQLAMA, fotoşəkil-2

"“Diqlas” ticarət mərkəzində baş verən yanğın sığorta sahəsində dəyişikliklərə yalnız o halda səbəb ola bilər ki, müvafiq şəxslər məcburi sığortaya cəlb edilsinlər. Yəni, onlar öz əmlaklarını məcburi şəkildə sığorta elətdirsinlər. Çünki əksəriyyət könüllü sığortanı elətdirmir və yaxud da cuzi miqdarda elətdirirlər. Bu dünənki yanğın hadisəsində də açıq-aşkar görsəndi. Hesab edirəm ki, bununla bağlı qanunvericiliyə düzəliş olunması yaxşı olardı. Obyekt sahibləri öz əmlaklarını tam və bazar qiymətlərinə uyğun sığorta elətdirməlidirlər. Qanuna bunu əlavə eləmək lazımıdr. İkincisi isə, əmlakların sığorta olunub-olunmamasına daha ciddi nəzarət olunmalıdır. Bunu da Fövqəladə Hallar Nazirliyi - Yanğına Nəzarət İdarəsi həyata keçirməlidir. Həmçinin obyektin içərisində olan əmlakların da sığortalanmasını vacib amil kimi qanunvericilikdə qeyd eləmək olar. Yəni bu obyektin içərisindəki obyektlər də məcburi şəkildə sığorta etdirilməlidir. Bu məqamlar qanunvericiliyə əlavə olunsa, bəlkə də müsbət dəyişikliklərə nail olmaq olar”.  

Ekspert sonda bir daha vurğulayıb ki, “Diqlas” ticarət mərkəzində baş verən yanğın hadisəsində zərərçəkənlərdən kimlərinsə obyekti sığortalanıbsa, kompensasiya ödənişləri yalnız onlara şamil edilə bilər, əks halda hər hansısa bir kompensasiyanın ödənilməsindən söhbət gedə bilməz. 

Ramilə Qardaşxanqızı

Bakucity.az

“Diqlas” ticarət mərkəzi
Əgər səhv görmüsünüzsə, mətndə səhvi seçin və Ctrl+Enter sıxaraq redaksiyaya göndərin
Şərhlər