Bakıda keçirilən gözəllik müsabiqələrində qalib necə seçilir? – ARAŞDIRMA

Bakıda keçirilən gözəllik müsabiqələrində qalib necə seçilir? – ARAŞDIRMA

Etiraz edənlər nə dərəcədə haqlıdırlar?

Bu ilki “Azərbaycan Gözəli-2019" Milli gözəllik yarışmasının I yer qalibi Melisa Nuriyevanın gözəlliyi ictimaiyyət arasında sual doğurdu və sosaial şəbəkələrdə səs-küyə səbəb oldu, əksəriyyət nəticə ilə razılaşmadı. Qadın gözəlliyinin kriteriyaları əslində necə təyin olunur? Hazırda keçirilən müsabiqələrdə ideal qadın gözəlliyini necə təyin edirlər? Gözəllik müsabiqələrində kimlər münsif olmalıdır əslində? Gözəllik yarışmasına modellərin çıxması nə dərəcədə düzgündür? Bu suallara Azərbaycanda 21 ildir davam edən və məşhur müsabiqələrdən biri və birincisi “Miss & Mister Azerbaijan” Milli gözəllik müsabiqəsinin baş koordinatoru və xoreoqrafı Ayla Mais cavablandırıb. Materialı oxuculara təqdim edirik.

Bakıda keçirilən gözəllik müsabiqələrində qalib necə seçilir? – ARAŞDIRMA, fotoşəkil-1

Ayla Mais: “Model biznesi ilə gözəllik müsabiqəsi eyni deyil”

Saytımıza açıqlamasında “Azərbaycan Gözəli” gözəllik yarışması barədə fikir bildirən Ayla xanım bu qalmaqalın ilk olmadığını və ümumiyyətlə həmin layihənin qara piyara meylli olduğunu qeyd edib: 

“O ki, qaldı münsiflər heyətinin qərarına, müsabiqələrdə verilən bu qərarı heç kim dəqiq bilmir. Çünki bildiyimə görə ballar mənfi olaraq hesablanır. Auditoriyaya gəlincə, çox güman ki, “Azərbaycan Gözəli - 2019” seçilən xanımın dost-tanışı, yaxınları zalda çox olub ona görə də o, səsləri toplaya bilib. Xanımın gözəl olub olmamasına gəlincə, düzü mən sadəcə öz müsabiqəmizlə bağlı düşünürəm, çalışıram deyə başqa müsabiqələrə diqqət yetirməyə zamanım qalmır. Onu deyə bilərəm ki, bizim məktəbin yetirmələri həmişə digər müsabiqələrdə yüksək yerlərə layiq görülürlər və gözəllik kriteriyalarına cavab veriblər”. 

Bakıda keçirilən gözəllik müsabiqələrində qalib necə seçilir? – ARAŞDIRMA, fotoşəkil-2

Gözəlliyin subyektivliyinə toxunan Ayla xanım qadın gözəlliyinin kriteriyalara sığmadığını və bütün qadınların gözəl olduğunu qeyd edib, amma gözəlliyi təmsil edən hər bir sahənin daxilində təbii ki, xüsusi kriteriyalar mövcuddur deyə əlavə edib:

“Məsələn, model biznesi ilə gözəllik müsabiqəsi eyni deyil. Model müsabiqəsində sadəcə peşəkar modellər iştirak edə bilər və həmin yarışmada iştirak etənlərin müəyyən olunmuş kriteriyalara uyğun olmaq lazımdır. Model yarışlarında iştirakçılar gözəlliklərinə görə deyil, boylarına və bədən quruluşlarına görə seçilir. Onların üz quruluşunun gözəl olması vacib deyil. Çünki manekenlər nümayiş etdirdikləri libası izləyənlərə bəyəndirir, malı satır. Gözəllik yarışmalarında isə əsasən gözəllik ön planda tutulur. Burada boy, çəki, sima və digər parametrlər mütləq şəkildə uyunlaşdırılmalıdır. Müsabiqədə iştirak edən xanım doğrudan da gözəl hesab edilirsə, yəni həmin xanım həqiqətən də gözəldirsə və sadəcə hardasa xırda minuslar varsa bu nəzərə alınmır. Çünkin bu zaman həmin xanımın 90-60-90 olması, boyunun 1.75-dən aşağıdır və s. bu sayılmır, o, xanım yenə də gözəllik müsabiqəsində iştirak edə bilər. Bu günün standartları belədir. Gözəllik yarışmalarında modellərin iştirak etməsinə gəlincə, bunun yaxşı tərəfi var ki, pis tərəfi yoxdur. Sadəcə qeyd olunan kriteriyalara cavab verməlidirlər. Seçilən gözəldə harmoniya olmalıdır. Bura xarici görünüş, baxım, intellektuallıq və s. daxildir. Bir-iki nəfərin gözəl dediyini gözəl hesab etmək olmaz. Müraciət edən gözəl təbii olmalıdır, estetik əməlyatlar və makiyaj bu məqamda yolverilməzdir”.

Xanımın dediyinə görə, bu günki müsabiqələrin balları adətən münsiflər heyətinin və auditoriyanın rəyinə əsasən hesablanır. Bəzən onlayn səsvermələr də olur ki, Ayla xanım bu qaydanı ümumiyyətlə düzgün hesab etmir və bu qaydanın illər öncə “Miss & Mister Azerbaijan” Milli gözəllik müsabiqəsində tətbiq olduğunu vurğulayır.

Gözəllik müsabiqələrində kimlərin münsif heyyətində oturmasına gəlincə, - Ayla xanım davam edir; bütün dünyada artıq sözünü demiş gözəllik müsabiqələrin münsiflər heyətində təşkilat komitəsinin üzvlərindən və keçmiş illərin birincilərindən başqa heç kim yoxdur.  Bu dəqiqdir. Bizdə isə çox və müxtəlif sahələri təmsil edən insanlar əyləşir münsiflər heyətində. Onların arasında gözəllik mütəxəssisləri – bu sahə üzrə titulları olanlar, təşkilat üzvləri, müğənnilər və s. başqa tanınmış insanlar olurlar. 

A. Maisin qeyd etdiyinə görə, hal-hazırda ölkəmizdə çox sayda gözəllik müsabiqələri keçirilir, amma onların hamısı yüksək səviyyə nümaiş etdirmirlər. Sadəcə bunlardan “Miss & Mister Top Model Azerbaijan” və “Miss & Mister Grand Azerbaijan” kimi bir neçə gözəllik müsabiqəsi var ki, onları normal saymaq olar:

Bakıda keçirilən gözəllik müsabiqələrində qalib necə seçilir? – ARAŞDIRMA, fotoşəkil-3

“Miss Azerbaijan” Milli gözəllik müsabiqələri, yəni bizim təşkil etdiyimiz müsabiqələr ölkədə 21 ildir keçirilir və yarandığı ilk illərdə Mədəniyyət Nazirliyinin (Əvvəlki adı Mədəniyyət və Turizm Nazirliyi)  lisenziyası əsasında fəaliyyət göstərib. Sonradan isə Azerbaycanda müsabiqələrə bu növ təşkilatçılıq ləğv edildiyindən hal-hazırda Nazirlik tərəfindən lisenziyalanmış hesab edilən yeganə müsabiqədir. Qaliblərimiz və finalçılarımız beynəlxalq podiumlarda çıxış edir, televiziya verilişləri aparıcısı, özəl şirkətlərin reklam siması olur, model və yaxud foto agentliklər, internet saytları, jurnallar və s. yaradırlar.  2015-ci ildə keçirilən müsabiqədə oğlanlar da iştirak etdiyindən müsabiqə “MISS & MISTER AZERBAIJAN” adı ilə tanınmağa başlayıb” deyə xanım fikrini tamamlayıb.

Texas universiteti alimlərinin 2017-ci ildə apardıqları araşdırmanın nəticəsi olaraq yeni standartları elan ediblər. Həmin standartlara görə 1.68 sm boyunda olan bir qadın üçün 99-63-91 ölçüləri qəbul edilib. Araşdırmalarını təbii gözəlliklə əsaslandıran alimlər, əslində 90-60-90 ölçüsünun moda, geyim, dəbdəbə nəhənglərinin uydurması olduğunu vurğulayıblar. Hətta qeyd ediblər ki, firmalar öz geyimlərinin daha cazibədar görsənməsi üçün bu ölçülərin ideal qəbul edilməsi üçün dəridən-qabıqdan çıxır, xeyli pullar xərcləyir və bir sıra kampaniyaları diqqət mərkəzində saxlayırlar.

Bakıda keçirilən gözəllik müsabiqələrində qalib necə seçilir? – ARAŞDIRMA, fotoşəkil-4

Araşdırmamızdan belə məlum oldu ki, hal-hazırda paytaxtda reallaşan gözəllik müsabiqələrində konkret kriteriyalar mövcud deyil və seçilən gözəllər münsiflər heyəti ilə auditoriyanın səsverməsinə əsasən müəyyənləşir. Tənqid olunan müsabiqənin təşkilatçısı olan “Şou Pradakşn”dan verilən məlumata görə də qalib müsabiqənin münsifələr heyəti, auditoriya və iştirakçı xanımların özlərinin biri-birlərinə vermiş olduğu səslərə görə müəyyən olunub. Bu məqamda isə bizə, “dünyanı gözəllik xilas edəcək” dekək qalır. 

Ramilə Qardaşxanqızı

Bakucity.az 

Müsabiqə
Əgər səhv görmüsünüzsə, mətndə səhvi seçin və Ctrl+Enter sıxaraq redaksiyaya göndərin

Şərhlər