Bakı sakinlərinin içdiyi su təhlükəlidirmi? - ARAŞDIRMA

Bakı sakinlərinin içdiyi su təhlükəlidirmi? - ARAŞDIRMA

Bakının içməli suyu ilə bağlı ekspertlərin maraqlı fikirləri var

Su əsas həyat mənbəyidir. Biz sutka ərzində nə qədər sərf edildiyini düşünmədən xörək hazırlayanda, içəndə, texniki məqsədlər üçün sudan istifadə edirik. Yaxın gələcəkdə su resurslarının xeyli tükənəcyi haqqında informasiyalar yayılır.  Bakucity.az bu problemin paytaxt Bakı üçün təhlükə yaratması, yerli içməli suyun dünya standartlarına uyğun gəlməsi haqqında araşdırma aparıb. 

Paytaxta verilən suyu təmiz adlandırmaq olarmı?

Azərbaycan Ekoloji Proqnozlaşdırma Mərkəzinin prezdenti, ekspert Telman Zeynalov suallarımıza cavab verərkən bildirib ki, paytaxt sakinlərinə verilən su hələ də dünya standartlarına uyğun deyil:

Bakı sakinlərinin içdiyi su təhlükəlidirmi? - ARAŞDIRMA, fotoşəkil-1

“Azərbaycanda suyun özünün təmizləməsinə hələ keçilməyib. Bizdə çox vaxt xlordan istifadə olunur. Əlbəttə ki, o insan orqanizmi üçün böyük təhlükə yaratmır, amma orqanizmdə toplanır.  Bu haqda həkimlər deməlidirlər, amma onların fikrincə bizə verilən su kifayət qədər təmizdir. Necə kifayət qədər təmiz ola bilər ki, yeni çaydandan bir ay istifadə etdikdən sonra içi qalın ərp ilə örtülür. Həmin ərp isə orqanizmdə qalaraq böyrəklərdə daş halında toplanır”.

Ekspertin fikrincə təbii su mənbələri kifayət qədər təmizdir və onu texniki məqsədlər üçün istifadə etmək düzgün deyil. 

“İçməli suyun tərkibində olan bəzi kimyəvi elementlər isə insan orqanizmi üçün xeyirlidir. Yaxşı olardı ki, su heç bir çöküntü verməsin deyə bizdə xüsusi təmizləyici qurğular quraşdırılsın. Bu zaman insanlar onu qaynatmadan da içə bilər. Şəxsən mən çiy su içməyə çalışıram və son vaxtlarda suda çoxlu çöküntü olduğunu hiss edirəm”.

T. Zeynalovun sözlərinə görə, ölkəmizdə tərkibinə bioloq və ekoloq alimlər daxil olan çoxlu qeyri-hökumət təşkilatlar vardır ki, onların yerli mağazalarda  satılan suların keyfiyyətinə nəzarət etməsi yaxşı olardı:

“Əfsuslar olsun ki, mağazalarda butulkalarda satılan sular dünya standartlarına uyğun deyil. Bu istiqamətdə də ciddi nəzarət lazımdır”.

Bakı içməli su ehtiyatı ilə bağlı çətinlik çəkirmi?

Ekspert su ehtiyatlarının tükənməsi ilə bağlı fikri cəfəngiyat adlandırdı:

“Suyun heç bir çatışmazlığı ola bilməz! Sadəcə olaraq, hal-hazırda 20-30 ilə ölkəmizin su çatışmazlığı ilə üzləşəcəyi haqqında informasiyalar yayılır, amma göstərilən zaman aralığı üçün bu cür proqanozlaşdırma mümkün deyil. Bu informasiya suyun qiymətini qaldıqmaq üçün kommersiya məqsədilə təbliğ edilir”, deyə T. Zeynalov fikrini tamamlayır. 

Saytımza açıqlama verən Ekolgiya və Təbii Sərvətlər Nazirliyinin Ekologiya və Təbiətin Mühafizəsi sektorunun  müdiri Mütəllim Əbdülhəsənov da  Telman Zeynalovun su ehtiyatlari ilə bağlı fikrini təsdiqlədi: 

Bakı sakinlərinin içdiyi su təhlükəlidirmi? - ARAŞDIRMA, fotoşəkil-2

“Azərbaycanda içməli su ehtiyatları 28 milyard kubmetr təşkil edir. Ölkədə yeraltı suların həcmi 9 milyarda kubmetrə yaxındır və su mənbələrimizdən 12 milyard kubmetr su götürülür. Təbii ki, ölkə çaylarında iqlim dəyişikliklərilə su ehtiyatı azalır. Bu problemlə mübarizə üçün Azərbaycanda su anbarları tikilir. İstənilən halda  əgər su çatışmazlığı olarsa, yeraltı su ehtiytlarından istifadə imkanı var”.

M. Əbdülhəsənov həmçinin qeyd etdi ki, bu gün Bakıda içməli su ehtiyatı çətinliyi yaşanmır və yaxın zamanda da gözlənilmir. 

“Hazırda nazirliyin əsas məqsədi suyun təmizliyinin qayğısına qalmaq, həmçinin su ehtiyatlarına ola biləcək təhlükələrin qarşısını almaqdır. Vətəndaşalrın su ehtiyatının tükənməməsi üçün qənaətlə su işlətmələri vacibdir”

“Bizim su Ümumdünya Səhiyyə Təşkilatının standartlarına cavab verir”

“Azərsu” ASC-nin mətbuat xidmətinin rəhbəri Anar Cəbrayıllı isə saytımıza açıqlamasında  əhaliyə verilən içməli suyun təhlükəsiz olduğunu deyir:

Bakı sakinlərinin içdiyi su təhlükəlidirmi? - ARAŞDIRMA, fotoşəkil-3

“Bakıda və regionlarda əhaliyə verilən su tam standartalara uyğundur və içməyə yaralıdır. Ceyranbatanda ultrafiltr su təmizləyici kompleks fəaliyyət göstərir. Ultrafiltrlə emal olunan su Ümumdünya Səhiyyə Təşkilatının  və digər beynəlxalq qurumların tələblərinə tam cavab verir. Onun hər hansı kimyəvi təmizləmə olmadan mexaniki üsulla emal olunmasını qeyd etmək vacibdir”.

İçək, yoxsa içməyək?

Araşdırma zamanı paytaxta verilən içməli suyun tam təhlükəsiz olduğuna 100% əmin ola bilmədik, amma ekspertlərin fikrincə əhaliyə verilən suyu krandan birbaşa içmək mümkündür. Müasir təmizləyici sistemlərə gəlincə, bu ölkədə çoxdan qurulub, amma bütün rayonlarda fəaliyyət göstərmir. Bu da o deməkdir ki, bu məsələ üzərində işləmək lazımdır. O ki, qaldı içməli su ehtiyatının çatışmazlığına, bakılıların bununla bağlı narahatçılığına əsas yoxdur. Çünki mövcud olan su hələ uzun müddət əhaliyə bəs edəcək.

Züleyxa İsmayılova

Bakucity.az

Bakıda içməli su problemi
Əgər səhv görmüsünüzsə, mətndə səhvi seçin və Ctrl+Enter sıxaraq redaksiyaya göndərin
Şərhlər