Bakıda saxta qızıl külçə satan kimlərdir?

Bakıda saxta qızıl külçə satan kimlərdir?, Oral Aliyev

Qızıl külçələri saxtalaşdıran cinayətkar dəstə peyda olub

Bakucity.az xəbər verir ki, bununla bağlı ikinci fakt paytaxtın Yasamal rayonu ərazisində qeydə alınıb. Belə ki, 36 yaşlı Musayev Mirismayıl Mirmusa polisə şikayət edərək bildirib ki,  aprelin 13-də 60 yaşlı T.İ. onu aldadıb. Sonuncu ona 23 min 600 dollar müqabilində 17 saxta qızıl külçə verib. M.Musayev külçələrin saxta olduğunu sonradan müəyyən edib. Saxta külçələr xarici görünüşünə görə əls külçələrə bənzəyib, üzərində əyar göstəricisi (999,9) və digər keyfiyyət nişanları olub.

Bundan əvvəl özünü T.İ. kimi təqdim edən həmin şəxsin Moskva prospektində yerləşən lombarda 19 qızıl külçə girov qoyduğunu və bunun müqabilində 41,363 manat borc götürdüyünü xəbər verilmişdi

29-cu Polis Bölməsinə hadisə ilə əlaqədar lombardın hüquqşünası Vüsal Məmmədov müraciət etmişdi. Onun dediyinə görə, külçələr paslanmayan metaldan hazırlanıb, sonradan qızıl suyuna salınıb.

Əldə olunmuş məlumatlara görə, cinayət-axtarış şöbəsinin əməliyyatçıları artıq T.İ.-ni taparaq onu dindirib. Kişi özü də fırıldağın qurbanı olduğunu bildirib. Onun sözlərinə görə, naməlum şəxslər saxta külçələrə görə ondan iri məbləğdə pul alıb. Ona görə də itirilmiş pullarını qaytarmağın yolunu axtarmağa məcbur olub.

Saxlanılan T.İ.-dən istintaqın gedişi ərzində ölkəni tərk etməməsi barədə iltizam alınıb və sərbəst buraxılıb. Ancaq hüquq-mühafizə orqanı əməkdaşları onun nələrisə gizlədiyindən şübhələnir. Onun saxta sikkələri Azərbaycana gətirən və ya onları burada hazırlayan dəstə ilə əlaqəli olduğuna dair şübhələr var.

Qeyd edək ki, dörd il əvvəl oxşar hadisələr Çexiyanın Zlin rayonunda baş vermişdi. Orada cinayətkarlar 250 qramlıq İsveçrə qızıl sikkələrini saxtalaşdırıblar. İnandırıcı görünməsi üçün qızıla “Argor-Heraeus” şirkətinin kefiyyət sertifikatını döyüblər.

Sonradan məlum olub ki, həmin külçələr ucuz volframdan hazırlanıb. Ancaq sikkələrin çəkisi və forması standartlara uyğun olub. Hətta yerli lombard ekspertləri də bu fırıldağın qurbanına çevrilib. Faktla üzrə 10-a yaxın insan saxlanılıb.

Bakıdakı saxta külçələrin isə hansı metaldan hazırlandığı hələlik aydın deyil. Məhkəmə ekspertizasının nəticələri hələ açıqlanmayıb.

Faktlarla bağlı araşdırma davam edir. (Oxu.az)

Bakucity.az

Qızıl külçələr
Əgər səhv görmüsünüzsə, mətndə səhvi seçin və Ctrl+Enter sıxaraq redaksiyaya göndərin

Şərhlər