Bakının yaşıllaşdırma planı – NƏ ETMƏK VACİBDİR?

Bakının yaşıllaşdırma planı – NƏ ETMƏK VACİBDİR?, Seymur

Yaxın 20-30 il üçün paytaxtın yaşıllaşdırılması planını hazırlamaq mümkündürmü?

Böyük şəhərlərdə hava olduqca çirklidir: avtomobillər, sənaye qazları və s. Buna görə meqapolisdə  mümkün qədər böyük parkların və hər cür yaşıllığın olması vacibdir. Bakının əsas problemlərindən biri də yaşıl sahələrin azlığıdır. Paytaxtımızda kiçik parkların sayı da azdır. Bundan əlavə, sıx bitki örtüyü və iri ağaclar ilə də öyünmək olmur.

Bakucity.az, şəhərimizin gələcək illər üçün abadlaşdırılması planının hazırlanması istiqamətində iş aparıldığını öyrənmək üçün araşdırma aparıb.

Milli Ekologiya və Proqnozlaşdırma Mərkəzinin prezidenti, Azərbaycan QHT forumunun ekoloji şöbəsinin koordinatoru Telman Zeynalov hesab edir ki, Bakıda yaşıllıq siyasəti düzgün aparılmır.

“Əlbəttə ki, Bakı kimi bir meqalopolisin yaşıllaşdırma planı hazırlamaq mümkündür. Hazırda bu cür işlər görülür. Bildiyiniz kimi, bu yaxınlarda keçmiş Sovetski  küçəsində yeni park açıldı, və bu ərazi daha yaxşı hala gəldi. Ancaq problem ondadır ki, Bakı parklarında müxtəlif ekzotik fidanlar gətirmək yox, yerli ağac əkmək lazımdır. Bir qayda olaraq, onlarla birlikdə  ölkəyə zərərli həşəratların yumurtaları və sürfələri daxil olur, və bu da çox vaxt bitki xəstəliklərinin yayılmasına səbəb olur”.

Ekspertin fikrincə, Bakı parkları üçün nəzərdə tutulan yerli ağacların fidanlarının yetişdiriləcəyi xüsusi yerlər yaradılmalıdır: 

“Şəhərimizdə bizim iqlimimizə uyğunlaşmış ağac və bitki əkmək daha yaxşıdır”.

T.Zeynalov hesab edir ki, bu şəkildə biz xarici iqtisadiyyatın böyüməsinə öz töhfəmizi veririk, yerli inkişaf isə o qədər də ürəkaçan deyil:

“Mən bu baradə ETSN-də, radio və televiziyada dəfələrlə demişəm. İş adamlarımız xaricdən fidan alır və yerli bazarda olduqca baha qiymətə satır. Nəticədə şəhərdə xurma, evkalipt və s. ağaclar peyda olur. Bu yerli ekosistemi məhv edir! Müəyyən iqlim şəraitimiz və yerli parkları bəzəməli olan bitki örtüyümüz var. Abşeron yarımadası üçün qovaq, qarağat şamı, nar, alma ağacları, üzüm və ya badam daha yaxşı uyğun gəlir. Birincisi, onlar qalın yaşıllıq yaradır, ikincisi, havanı təmizləyirlər və üçüncüsü, eroziyanın qarşısını alan torpaqda nəm yaradırlar. Torpaqda kifayət qədər nəm olduqda, istilik o qədər də güclü olmur”.

Mütəxəssis, həmçinin, Bakıda ərazinin 30%-nin yaşıllaşdırılmasının məqsədəuyğun olduğunu, bunun havanın kifayət qədər təmizlənməsinə və oksigen səviyyəsinin artmasına töhfə verəcəyini bildirdi.

Şəhərimzin yaşıllaşdırılmasının bütün nüanslarını ətraflı öyrənmək üçün Bakı şəhər İcra Hakimiyyətinin nəzdindəki Yaşıl Təsərrüfat Birliyinə müraciət etdik, amma təəssüf ki, bu şöbə zənglərə cavab vermədi. Sonra saytımız özəl sektordan əlavə, paytaxtımız parkları ilə də məşğul olan  və Nazirlər Kabinetinin rəhbərliyi tərəfindən idarə olunan Bakı Abadlıq Xidməti MMC-yə müraciət etdi. 

Şirkətin direktor müavini Ənvər Hüseynov saytımıza açıqlamasında bildirdi ki, hazırda şirkət paytaxtın otuza yaxın park və meydanlarına xidmət göstərir. Bunlara Heydər Əliyev Mərkəzi Parkı, Şəlalə Parkı, İncəsənət Parkı Muzeyi, Filarmoniya Bağı, Fəvvarələr Meydanı və şəhərin digər məşhur yaşıllıq əraziləri aiddir.

“Bizim əsas vəzifəmiz parkların vəziyyətinə baxmaq və lazım olduqda yeni əkinlər təşkil etməkdir. Böyük Şor gölünün ərazisini abadlaşdırmaq kimi böyük layihələrimiz də var. Bayıl qəsəbəsində yerləşən Bakı Su Mərkəzinin ətrafındakı zonanın tərtibatı ilə də məşğul olduq”, -deyə Ə. Hüseynov qeyd etdi.

Şirkət direktorunun müavini hesab edir ki, digər ölkələrdən Bakıya fidanların gətirilməsi ekologiyamıza mənfi təsir göstərə bilməz.

“Bu sektorda on ilə yaxındır ki, işləyirik və həmişə yerli və idxal olunan ağac növləri əkirik. Bütün bu müddət ərzində heç bir problem olmayıb. Əsas odur ki, əkilən bitkilər yerli iqlimi qəbul edir”.

A.Hüseynov bu cür işlərə çox vəsaitin xərcləndiyini vurğulayıb. Bunun səbəbi, parkların bitki örtüyünə qulluq etməkdən əlavə, onlarda təmizliyi qorumaq, həmçinin bu ərazidə fəvvarələr, işıqlandırma sistemininin idarə olunmasını təmin etmək və  zəruri hallarda müxtəlif təmir işləri aparmaqdır.

Züleyxa İsmaylova

Bakucity.az

Bakı ağaclar yaşıllıq
Əgər səhv görmüsünüzsə, mətndə səhvi seçin və Ctrl+Enter sıxaraq redaksiyaya göndərin
Şərhlər