Bakının ayıq sürücüləri - RİSKLƏR + QİYMƏTLƏR

Bakının ayıq sürücüləri - RİSKLƏR + QİYMƏTLƏR

Eyni məsafəni fərqli qiymətə qət edən ayıq sürücülər

Dünyanın bir çox ölkələrində olduğu kimi, Azərbaycanda da müxtəlif şirkətlər və fərdi şəxslər “ayıq sürücü” xidməti təklif edirlər. Bakıda “ayıq sürücülər” fərdi (qeyri-qanuni), şirkət, eləcə də  taksi şirkətlərinin tərkibində fəaliyyət göstərirlər. Ekspertlər hesab edir ki, son zamanlar bu bazara tələbatın azalması şirkətlərin bağlanmasına səbəb olub. 

Bakucity.az paytaxtda fəaliyyət göstərən “ayıq sürücü” şirkətləri və bu xidmət növünün vacib nüanslarını araşdırıb.

“Ayıq sürücü”lər zamanla azalmaqdadır

Mövzu ilə bağlı suallarımıza cavab verən nəqliyyat məsələləri üzrə ekspert Azər Allahverənov bildirib ki, qanuni fəaliyyət göstərən şirkətlər vergidən yayına bilmədikcə fəaliyyətlərini dayandır, bu zaman isə qanunsuz fəaliyyət göstərən “ayıq sürücü”lər çoxalır:

Bakının ayıq sürücüləri - RİSKLƏR + QİYMƏTLƏR, fotoşəkil-1

“Bu gün paytaxtda istənilən restoran və şadlıq evlərinin qarşısında kifayət qədər çox sayda gənc sürücülər görə bilərsiniz. Əksəriyyəti qeyri-qanuni “ayıq sürücü” xidməti göstərir.  “189 taxi”, “Rahat ayıq sürücü” (qanuni) və s. kimi şirkətlərinin sayı isə ötən illərə nisbətən azalıb. Qeyri-qanuni müstəvidə çalışanlar isə xoşagəlməz hadisələrin baş verməsinə səbəb olurlar. Sosial şəbəkələrdə aparılan müzakirələrdən də bəlli olur ki, müxtəlif şəxslər müxtəlif vaxtlarda heç bir şirkətin işçisi olmayan bu şəxslər tərəfində zərərə uğrayırlar. Maşın vurma və sairə kimi müəyyən qəzalar baş verir”. 

“Haradan bilək ki, onun sürücülük vəsiqəsi nə dərəcədə etibarlıdır...”

Ekspert hesab edir ki, heç nəyə baxmayaraq bu sistem təkmilləşdirilməli, göstərilən xidmətlərin keyfiyyəti artırılmalıdır:

“Ayıq sürücü” xidməti göstərən şəxslərin peşə bacarıqları inkişaf etdirilməlidir. Çünki sürücülük vəsiqəsi olan hər kəs sərnişin daşıyacaq qədər peşəkar deyil, və insanlar onlara həyatlarını etibar edə bilməz. 

Fərz edək ki, spirtli içki içdiyimə görə ayıq sürücüyə müraciət etmişəm, və cavan bir oğlan gəlib deyir sürücüyəm. Haradan bilək ki, onun sürücülük vəsiqəsi nə dərəcədə etibarlıdır və ya onun peşə qabiliyyəti ünvana təhlükəsiz çatmağım üçün yetərlidir. Bütün bu məqamlar hamısı bir-biri ilə bağlıdır deyə daha çox etibar olunan şirkətlərlə iş qurulmalıdır.

Həmçinin oxu: Bakıda ən sərfəli taksi xidmətləri hansılardır? - QİYMƏTLƏR

Şirkətlər isə öz imicləri, reputasiyaları barədə düşünürsə göstərdikləri xidmətin keyfiyyətinin yüksək olmasında həmişə maraqlı olurlar. Əks halda, şəxsən mən heç bir şirkətə etibar etməyəcəm. Həmçinin də digər insanlar. Bu gün bu sahədə fəaliyyət göstərmək istəyən şirkətlər göstərdikləri xidmətin keyfiyyətinin artırılması, yaxşılaşdırılması ilə bağlı təbii ki, müxtəlif addımlar atmalıdırlar”.

“Bu xidmət növünün populyarlaşmamasına qiymətlərin yüksəkliyi nə dərəcədə təsir göstərir?” sualına isə ekspert belə cavab verib:

“Şirkətlər ilk növbədə sahələşdirilmiş, dövriyyə qazandıqdan sonra isə ƏDV vergi ödəyiciləri olurlar. Təbii ki, ƏDV ödəyicisi olduqda gəlirlərinin 18%-i hökumətə ödənilir. Bu zaman digər vergi ödəmələrini də əlavə etsək, nəticə etibarı ilə qiymətlərdə artım olacaq. Bu bir neçə illik təcrübə onu göstərir ki, qiymət fərqi ilə mübarizə aparan insanların ən optimal seçimi spirtli içki içəcəkləri təqdirdə həmin məclisə şəxsi avtomovilləri ilə yox taksi ilə getməkdir ki, bu zaman da “ayıq sürücü”yə ehtiyac qalmır”, - deyə ekspert Azər Allahverənovun fikrini tamamlayıb. 

Saytımız paytaxtda fəaliyyət göstərən üç “ayıq sürücü” şirkəti ilə əlaqə saxlayıb. Şirkətlərin təklif etdiyi xidmət eyni olsa da, qiymətlər fərqlənir. Belə ki, şirkətlərin “Nəriman Nərimanov” metrostansiyasından “İçərişəhər” metrostansiyasına (şəhər daxili) və “İçərişəhər” metrostansiyasından Hövsan (Nehrəm marketin yanına) qəsəbəsinə (şəhər ətrafı) qədər məsafə üçün təklif etdikləri qiymətlər fərqlidir.

Yuxarıda qeyd edilən məsafəyə üç fərqli şirkətin təklif etdiyi qiymətləri təqdim edirik:

“Rahat ayıq sürücü” (*5151)

“189 Taxi” (189)

“Felix taxi” (*5959)

şəhərdaxili - 8,00  AZN

şəhərdaxili - 7,00 AZN

şəhərdaxili - 4,89 AZN

şəhər ətrafı - 12,00 AZN

şəhər ətrafı - 20 AZN

şəhər ətrafı – 9,59 AZN

Ramilə QARDAŞXANQIZI

Bakucity.az

Bakı ayıq sürücü qiymətlər
Əgər səhv görmüsünüzsə, mətndə səhvi seçin və Ctrl+Enter sıxaraq redaksiyaya göndərin
Şərhlər