Tural Yusifov: Bakıda ailəmi ictimai nəqliyyata etibar etmərəm - VİDEO

Tural Yusifov: Bakıda ailəmi ictimai nəqliyyata etibar etmərəm - VİDEO

“Bizim şəhər piyadalar üçün deyil”

“Mən ailəmi ictimai nəqliyyata etibar etmirəm. Yaşadığım qəsəbədə üç marşrut var - biri “BakuBus”, digər ikisi daşıyıcılardır və mən onlara heç vaxt ailəmi etibar edə bilmərəm.  

Bakucity.az xəbər verir ki, bu sözləri yol hərəkəti üzrə ekspert Tural Yusifov İTV-də yayımlanan “Sabaha saxlamayaq” verilişində qonaq olarkən deyib.

Aparıcı bildirib ki, əgər Bakı şəhərində tıxacsız, stressiz yol istəyirsinizsə, ilk növbədə ictimai nəqliyyatı düzəltmək lazımdır.

“Bakı şəhərində tramvay yoxdur, ləğv olunub. Dünyanın ən böyük şəhərlərində, hətta çox sıx hərəkət olan Amsterdamda tramvay var.  Bizim metro bir-birindən çox aralı stansiyalardan ibarətdir. Böyük Britaniyaya, Parisə, hara istəyirsinizsə gedək, orada stansiyalar bir-birinə çox yaxındır. Siz metronun “İnşaatçılar” stansiyasından çıxıb İctimai Televiziyaya gəlmək üçün ya gərək avtobusa minəsiniz, ya da Yasamal rayonunun ərazisində bərbad vəziyyətdə olan və ya olmayan səkilərin üzərindən gedəsiniz. Sual yaranır ki, niyə bizim piyadalar yolun ortası ilə gedir. Onlar hara ilə getsinlər? Səki tapa bilmirlər. Bütün səkilər zəbt olunub”.

Sürücü mədəniyyətindən danışan T.Yusifov bildirib ki, ümumiyyətlə ya sürücü mədəniyyəti olur, ya da olmur.

Həmçinin oxu: Vaqif Əsədov: Məktəbə bir uşağın arxasınca dörd avtomobil gedir

“Heydər Əliyev sarayında konsert gedəndə “mədəni” insanlar avtomobillərini 2-3 sıra saxalyırlar. Mədəni tədbirə gedir, lakin heç bir mədəniyyəti yoxdur. Ümumiyyətlə şəhərin mərkəzində parkinq problemini həll etmək ictimai nəqliyyatı düzəltmək və mərkəzə girişi qadağan etmək lazımdır. Müəyyən bir yerə gəlirsən, avtomobilini saxlayırsan, tramvaya və ya velosipedə minib gedirsən”.

Aparıcı həmçinin Bakı şəhərindəki hündür səkilərdən narazılığını bildirib.

“Bəli, başa düşürəm, səkini ona görə hündür edirlər ki, maşınları oraya dırmaşdırmasınlar, amma əlil, uşaq arabası ilə hərəkət edənlər, yaşlı insanlar oraya qalxa bilmir. Biz Bakı şəhərində əlil arabasında hərəkət edən insanları az görürük. Bu, o demək deyil ki, biz spartalıyıq və sağlamıq. Xeyr, ona görə az görürük ki, şəhər o əlil arabasında hərəkət edən insanlara qənim kəsilib. Bizim şəhər piyadalar üçün deyil, dəmirlər üçündür. Bu maşınlar gəlirlər, gəlirlər, ona görə də problem yaranır. İctimai nəqliyyat düzəlməyincə, nə metronun “20 Yanvar” stansiyasında, nə də digər ərazilərdə bu problem həll olunmayacaq”.

Bakucity.az

Bakı ictimai nəqliyyat Tural Yusifov
Əgər səhv görmüsünüzsə, mətndə səhvi seçin və Ctrl+Enter sıxaraq redaksiyaya göndərin
Şərhlər