Bakının ölümə aparan qaranlıq yolları - VİDEO

Bakının ölümə aparan qaranlıq yolları - VİDEO, Seymur

Kimlər tədbir görməlidir?

Bakının mərkəzi küçələri günün qaranlıq saatlarında işıqlandırılsa da, təəssüf ki, bunu bütün yollara şamil etmək olmur. Ətraf qəsəbələrdə isə vəziyyət daha da acınacaqlıdır. Müəyyən ərazilər var ki, avtomobillərin intensiv hərəkət etdiyi yollarda belə işıqlandırma yoxdur. Və təbii ki, bu da həmin yollarda qəzaları qaçılmaz edir.

Bakucity.az xəbər verir ki, ARB TV əməkdaşları məsələni araşdırmaq üçün üz tutublar Bakının işıqsız qalan yollarına.

Hal-hazırda Zığ - Hövsan şosesində dirəklərin quraşdırılmasına baxmayaraq heç birində işıq yanmır. Bu yolda sürücülərə çətin anlar yaşadan digər səbəb isə gecə saatlarında dairənin mövcudluğunu göstərən işıq dirəklərinin heç birində işığın yanmamasıdır. 

Yolu tanımayan sürücü üçün bunun nə demək olduğu məlum məsələdir. Bu yoldan mütəmadi istifadə etməyən şəxs son anda gördüyü dairədə qəzadan yayınmaq, yaxud geriyə dönmək üçün qəfl əyləci basır və bu zaman özü ilə bərabər həm də arxada hərəkət edən digər nəqliyyat vasitəsi üçün qəza şəraiti yaratmış olur. 

Zülmət qaranlığa bürünən digər yol isə Abşeron rayonunun Höküməli, Qobu, Güzdək qəsəbələri, eləcə də Qaradağ rayonu istiqamətində gedən magistral yoldur.  Bəs yolların işıqlandırılması işi hansı qurumun üzərindədir? Kim bu işə əncam çəkməlidir?

Həmçinin oxu: Yol polisi qayda pozur, sonra eyni səhvə görə sürücüləri cərimələyir - VİDEO

“Yolda servis tərəfindən işlər tam başa çatmayıb, işlər tam yekunlaşdırıldıqdan sonra işıqlar yandırılacaq. Mərdakan, Qala yolu, dairəvi yol, Hövsan yolu və digər yerlərdə təmir işləri tam başa çatmayıb. Sözügedən yollar bizim idarənin balansına verilmədiyi üçün həmin yerlərdə işıqlar yanmır”, - deyə Bakı Şəhər İşıqlandırma İdarəsinin baş mühəndisi Məhərrəm Babayev bildirib.

Adıçəkilən qurumun - Avtomobil Yolları Dövlət Agentliyinin də məsələ ilə bağlı mövqeyini öyrəndik. Qurum rəsmisi deyir ki, Bakı Şəhər İşıqlandırma İdarəsinin fikirlərilə razılaşmaq mümkün deyil. 

“Düzdür Bakı şəhərində hər yerdə işıqlandırma sistemi yoxdur. Ancaq o bizim xidmətimizdə vəya bizim balansımızda deyil. Yolu biz yenidən qurduğumuza görə o mənada deyirlər ki biz baxırıq”, - deyə Hidayət Rüstəmov – AAYDA-nın rəsmisi vurğulayıb.

Bakucity.az

Bakı qaranlıq yollar
Əgər səhv görmüsünüzsə, mətndə səhvi seçin və Ctrl+Enter sıxaraq redaksiyaya göndərin

Şərhlər