Bakı sakinləri hansı filmlərə üstünlük verirlər?

Bakı sakinləri hansı filmlərə üstünlük verirlər?, Seymur

Budəfəki mövzumuz kinoteatrlar və onların tamaşaçılarıdır. 

Son zamanlar Azərbaycanda film bazarında canlanma var. Bu canlanma kinoteatr və kino mərkəzlərinə də təsirsiz ötüşmür. Film bazarında uğurlu filmlər də özünü təsdiq etməyə çalışır, uğursuz filmlər də. Lakin Azərbaycan tamaşaçısı artıq hər filmi həzm etmir, tükü tükdən seçməyi bacarır. Qısacası onları aldatmaq mümkün deyil.

Görəsən, insanların kinoya və kinoteatra marağını qüvvədə saxlamaq üçün hansı yeniliklər edilir? 

Ümumiyyətlə tamaşaçıların yerli filmlərə marağı çoxdur, yoxsa xarici filmlərə? Kinoteatrda filmə baxmaq neçəyə başa gəlir?

Bakucity.az mövzu haqda oxucularını məlumatlandırmaq üçün paytaxtın məşhur kino mərkəzlərinin nümayəndələri ilə danışıb. 

Nizami Kino Mərkəzinin direktor müavini Arzu Əhədova:

- Nizami Kino Mərkəzi 2011-ci ildə əsaslı təmirdən çıxıb. O zamandan bu günə kimi tamaşaçılar mütəmadi olaraq kinoteatrımızda film izləməyə gəlirlər və xidmətdən çox razıdırlar. Bunun üçün biz durmadan çalışırıq, istər səs, istərsə də görüntü baxımdan filmlərin ekranda yayınlanma keyfiyyətinə önəm veririk.

Zallarımızın rahatlığına və təmizliyinə, yayda və qışda kondisionerlərin fəaliyyətinə nəzarət edirik. Afişalarımızı tez-tez yeniləyir, nümayiş olunacaq filmlərdən tamaşaçıları xəbərdar edirik. Janr sarıdan filmləri çeşidləməyə çalışırıq ki, tamaşaçıların zövqlərini təmin edə bilək. Hər həftənin cümə axşamı repertuarımızı dəyişirik. Premyeralarımız demək olar ki, dünya kinoteatrları ilə eyni vaxtda nümayiş olunur.

Yerli və xarici filmləri müqayisə etsək, son 2-3 ildə yerli filmlərə maraq daha çoxdur. Tamaşaçılar film seçən zaman, əsasən komediya janrında olan milli filmlərimizə üstünlük verirlər. Lakin dram və qorxu filmlərinə də maraq az deyil. 

Seansa zamanından tez gələn qonaqlarımızın da rahatlığını düşünmüşük. Bunun üçün foyelərimizdə divan və kreslolar, stol-stullar yerləşdirmişik. Həmçinin ikinci mərtəbəmizda kafe-bar fəaliyyət göstərir ki, qonaqlarımız öz dostları və ailə üzvləri ilə birgə rahat əyləşə bilərlər. Biletlərimizin qiyməti isə seansa görə dəyişir. Minimum 4 manat, maksimum 8 manatdır.

Həmçinin oxu: Pərdələri qaldırın: Bakıda yeni teatr mövsümü başlayır - QİYMƏTLƏR

Park Cinema kinoteatrlar şəbəkəsinin piar meneceri Rüstəm Fətəliyev

- Hər həftənin bazar ertəsi, çərşənbə axşamı və çərşənbə günləri “Metro Park”da olan kinoteatrımızda qiymətlər 3.3 manatdan başlayır. Bu da o deməkdir ki, hal-hazırda kino bazarında ən ucuz biletlər məhz “Metro Park”dadır. “Park Bulvar” filialımızda isə adi günlərdə 25 manata olan VİP biletlər hər həftənin çərşənbə axşamı 10 manata satılır. Bundan əlavə bütün şəbəkələrimizdə həftənin 2-ci günləri 50%-a qədər endirimlər olur.

Tələbə tarifimiz var ki, bu da film sevən tələbələrimizin büdcəsinə xidmət edir. Onlar öz tələbə biletlərini təqdim etməklə istənilən filialımızda və istənilən seansa xüsusi qiymətlərlə bilet əldə edə bilərlər. Paralel olaraq ailə tarifimiz də var. Ailəvi filmə gəlmək istəyənlər üçün bu tarif daxilində bilet almaq daha əlverişlidir, nəinki ailə üzvləri üçün tək-tək bilet almaq. Biz tamaşaçılarımızın büdcəsini, zövqünü, marağını və rahatlığını nəzərə almaq üçün imkanlarımız daxilində hər cür şərait yaradırıq.

Son vaxtlar həm yerli filmlər, həm də xarici filmlər tamaşaçıların maraq dairəsindədir. Hal-hazırda isə Azərbaycanda, bu il ərzində film bazarına çıxarılan “Kral şir” və “Qisasçılar”  filmi çox populyardır. Azərbaycan filmlərindən isə nümunə üçün “Sonuncu Pərdə” filmini deyə bilərəm ki, böyük marağa səbəb olub. Milli filmlərimizdən daha çox komediya janrında çəkilənlərə maraq var. Biletlərimizin qiyməti isə minimum 3.3 manatdan 25 AZN-ə qədər dəyişir. 

Bundan əlavə, kinoya baxmağa gələn tamaşaçılar təkcə bilet almaqla kifayətlənmirlər. Kinonun vazkeçilməzi sayılan məzələr və fəst-fud yeməklərə də pul xərcləyirlər. Ona görə bunu da nəzərə alıb, Bakı kinoteatrlarında kinoya baxmağın orta hesabla neçə başa gəldiyi barədə sizi məlumatlandırmaq istədik:

Alkoqolsuz içkilər minimum 1 manatdan başlayır, maksimum 6 manata qədər.

Pivələr 2,5 AZN-dən 6 AZN-ə qədər. Qəlyanaltılar minimum 1,5 manatdan 8 manata. Dondurmalar isə 2-4 AZN.

Arzu Murad

Bakucity.az

Bakı kinoteatr tamaşaçı
Əgər səhv görmüsünüzsə, mətndə səhvi seçin və Ctrl+Enter sıxaraq redaksiyaya göndərin

Şərhlər