Bakıda bu binaların sakinləri köçürüləcək - SİYAHI

Bakıda bu binaların sakinləri köçürüləcək - SİYAHI, Seymur

Köçürülmə prosesi niyə tamamlanmır?

Bakıda “xruşovka” və fransız layihəli tikililərin sökülməsi davam edir, lakin şəhərdə onlardan daha qədim və daha təhlükəli vəziyyətdə olan binalar da var. 

Paytaxtda qəzalı vəziyyətdə olan tikililərdən biri də Səbail rayonu, Arif İsmayılov küçəsi, 6-cı mədən ərazisində yerləşən və bir əsrdən çox yaşı olan binadır ki, sakinlərin buradan köçürülməsi hələ də yekunlaşmayıb. 

Bakucity.az məsələyə aydınlıq gətirmək üçün Səbail Rayon İcra Hakimiyyətinə müraciət edib. 

Səbail RİH-dən verilən məlumatda bildirilib ki, Arif İsmayılov 51 ünvanında yerləşən bina vaxtı ilə yataqxana olub. Səbail RİH-nin müraciəti ilə Nazirlər Kabineti tərəfindən qəbul olunan qərara əsasən buranın bina sakinlərinin köçürülməsinə başlanılıb:

“Yataqxanada yaşayan 30 ailədən 26-sı nə Səbayıl rayonunda qeydiyyatda deyil, nə də mülkiyyət sənədləri var. Buna baxmayaraq, Nazirlər Kabineti sakinlərə maddi yardım vəsaiti ayıraraq köçürülmələrini həyata keçirir.  Hazırda binada  köçürülmə işləri yekunlaşmaq üzrədir. Ola bilsin ki, yaxın günlərdə sonuncu sakin binadan çıxdıqdan sonra bina tamamilə sökülsün”.

Sakinlərin köçürülmə ilə bağlı müraciət etdikləridaha bir bina 2-ci mədən ərazisində yerləşir. Hazırdaburada  köçürülmə prosesi getmir. 

Səbail RİH-dən bildiriblər ki, bu ərazi “Bibiheybətneft” NQÇİ-nin mədən ərazisidir:

“Vaxtı ilə vətəndaşlar burada da qeyri-qanuni tikinti işləri apararaq yaşamağa başlayıblar. Burada 2011/2012-ci illərdə Su İdmanı Sarayının tikintisi ilə bağlı köçürülmə olub. Hazırda isə heç bir köçürülmə prosesi getmir”.

 Qəzalı vəziyyətində olan binalardan biri də Yasamal rayonu, Mirzə Ağa Əliyev küçəsi 150 ünvanında yerləşən 3 mərtəbəli, 43 mənzilli  binadır.

Bakıda bu binaların sakinləri köçürüləcək - SİYAHI, fotoşəkil-1

Yasamal Rayon İcra Hakimiyyətindən verilən məlumata görə, bu bina 1889-cu ildə inşa edilib və uzun müddət əsaslı təmir olunmadığından qəzalı, yaşayış üçün yararsız vəziyyətə düşüb:

“Vaxtı ilə Bakı Şəhər XDS İcraiyyə Komitəsinin 16.06.1989-cu il tarixli, 5/195 saylı Qərarı ilə bina qəzalı hesab edilərək sakinlərin oradan köçürülməsinə başlanmışdır. Həmin ildə binadan 23 ailə köçürülmüş, sonradan isə işlər yarımçıq qaldığından burada boşalmış mənzillər qaçqın və məcburi köçkünlər tətəfindən zəbt olunmuşdur. 

Son illərdə binada vəziyyət daha da pisləşmiş, 2011 və 2017-ci illərdə  Fövqəladə Hallar Nazirliyi, “Azərdövləttikintilayihə” Dövlət Layihə İnstitutunun mütəxəssislərinin burada keçirdikləri təkrar baxışlar bina ilə bağlı əvvəlki rəyləri bir daha təsdiqləmiş, sakinlərin təhlükəsizliyinin təmin edilməsi məqsədi ilə onların dərhal köçürülməsi, ərazinin hasarlanması və həyətə girişin məhdudlaşdırılması ilə bağlı akt tərtib olunmuşdur. 

Hazırda binadan sakinlərin müvafiq qaydada maddi yardım verilməsi ilə köçürülməsi işləri davam edir. Burada məskunlaşmış məcburi köçkün ailələri Qaçqınların və Məcburi Köçkünlərin İşləri Üzrə Dövlət Komitəsi tərəfindən ayrılan hazır mənzillərə yerləşdiriliblər". 

Nazirlər Kabinetinin qərarına əsasən paytaxtda köçürülməsi nəzərdə tutulan digər bina və mənzillər:

1. Bakı şəhəri,  Binəqədi rayonu, 8-ci mkr., Ağasadıq Gəraybəyli küçəsi, 41

2. Bakı şəhəri, Binəqədi rayonu, Koroğlu Rəhimov küçəsi, 53A

3. Bakı şəhəri, Yasamal rayonu, M.A.Əliyev küçəsi, 150

4. Bakı şəhəri, Səbail ray. 20-ci sahə, A.İsmayılov küçəsi, 51

5. Bakı şəhəri, Sabunçu rayonu, Zabrat qəsəbəsi, Nərimanov küçəsi, ev 6

6. Bakı şəhəri, Sabunçu rayonu, Sabunçu qəsəbəsi, A.Əsədullayev küçəsi, 27

7. Bakı şəhəri, Sabunçu rayonu, Sabunçu qəsəbəsi, M.Rəsulzadə dalan 3, ev 2

8. Bakı şəhəri, Sabunçu rayonu, Sabunçu qəsəbəsi, B.Bünyatov küçəsi, 7A

9. Bakı şəhəri, Sabunçu rayonu, Sabunçu qəsəsəbəsi, 2 Aprel küçəsi, ev 8A

10. Bakı şəhəri, Sabunçu rayonu, Sabunçu qəsəbəsi 2 Aprel küçəsi, 18

11. Bakı şəhəri, Sabunçu rayonu, Sabunçu qəsəbəsi D.Pişəvari küçəsi, 13Q

12. Bakı şəhəri, Sabunçu rayonu, Sabunçu qəsəbəsi D.Pişəvari küçəsi, 15

13. Bakı şəhəri, Suraxanı rayonu, Park küçəsi, 32

14. Bakı şəhəri, Suraxanı rayonu, S.Bəhlulzadə döngəsi, 17 ev 15

15. Bakı şəhəri, Suraxanı rayonu, İ.Məmmədov küçəsi 6

16. Bakı şəhəri, Suraxanı rayonu, İ. Məmmədov küçəsi 8

17. Bakı şəhəri, Xətai rayonu, General Şıxlinski küçəsi 42.

Qeyd edək ki, qəzalı binaların köçürülməsi Nazirlər Kabinetinin qərarı ilə rayon icra hakimiyyətləri tərəfindən həyata keçirilir. BŞİH-i prosesə ümumi nəzarət edir

Ramilə Qardaşxanqızı

Bakucity.az

Bakı qəzalı bina sakinlər köçürüləcək
Əgər səhv görmüsünüzsə, mətndə səhvi seçin və Ctrl+Enter sıxaraq redaksiyaya göndərin

Şərhlər