Yol verin: Təcili yardım niyə təcili gələ bilmir?

Yol verin: Təcili yardım niyə təcili gələ bilmir?, Seymur

Yəqin hər birimiz təcili tibbi yardımın, yanğınsöndürmə xidmətinin işıqforun qırmızı işığında durması və yaxud nəqliyyatın sıx olduğu ərazilərdə tıxaca düşməsinin şahidi olmuşuq.

Bəs bu halların qarşısını almaq üçün hansı tədbirlər görülür? 

Bakucity.az mövzu ətrafında kiçik araşdırma aparıb və məsələyə aidiyyətı qurumların rəsmilərinin münasibətini öyrənib.

Bakı Nəqliyyat Agentliyinin (BNA) İctimaiyyətlə əlaqələr şöbəsinin sektor müdiri Mais Ağayev bildirib ki, insanların ictimai nəqliyyatdan istifadəyə marağını artırmaq üçün ilk dəfə Bakıda xüsusi hərəkət zolaqları təşkil edilib. 

“Bunun özü BNA-nın şəhər nəqliyyat sisteminə gətirdiyi yeniliklərdən idi. 

Belə zolaqlar ilk dəfə Füzuli küçəsində, daha sonra Yusif Səfərov küçəsində və Babək prospektində çəkildi. Sözügedən zolaqlardan zərurət olduğu halda operativ nəqliyyat vasitələri də istifadə edə bilərlər. 

Bu istiqamətdə işlər davam etdiriləcək. Məqsəd xüsusi hərəkət zolaqlarının əhatə dairəsini genişləndirmək və şəbəkə halına gətirməkdir. Lakin təəssüf ki, bu zolaqlar təyinatı üzrə istifadə olunmur. Hesab edirəm ki, burda DYP tərəfindən zolaqların tələbinə əməl edilməsinə nəzarət gücləndirilməlidir. Bir daha vurğulamaq istərdim ki, xüsusi hərəkət zolaqları insanların ictimai nəqliyyatdan istifadəsinə marağı artırır ki, bu da həm yollarda sıxlığın aradan qaldırılması həm də şəhərimizin ekoloji durumunun yaxşılaşdırılması baxımından olduqca əhəmiyyətlidir.

Həmçinin oxu: Bakıda taksilərə qadağa - “20 Yanvar”da saxlaya bilməyəcəklər

Öz növbəsində Bakı Şəhər Baş Polis İdarəsi (BŞBPİ) Dövlət Yol Polisi İdarəsinin (DYPİ) Yol hərəkəti təhlükəsizliyinin təbliği və ictimai qurumlarla əlaqə bölməsinin rəisi, polis polkovniki Vaqif Əsədov qeyd edib ki, məsələ barədə mütəmadi olaraq təbliğat aparılır.

“Hökümət və qeyri-hökümət təşkilatları ilə birgə sosial roliklər də çəkmişik. Təhlükəsizlik qaydalarının sürücü və hərəkət iştirakçılarının yaddaşında uzun müddət qalmaq üçün bütün profilaktik tədbirlər də keçirmişik. 

Hesab edirəm ki, yanğınsöndürmə, təcili tibbi yardım, polis maşınlarının hadisə yerinə təcili getməsi lazım olursa, bir çox sürücülər yol verirlər, onların hərəkətinə şərait yaradırlar. 

Lakin, əgər keçid üstünlüyü hüququna malik olan nəqliyyat vasitələrinin sürücüləri çağırışa getdikləri zaman qırmızı işıqda dururlarsa, təcrübə azlığından qəza şəraiti yaratmaqdan qorxurlarsa, özləri vəziyyətdən asılı olaraq hərəkət edirlər. 

Biz onların işinə qarışa bilmərik. Qanunla qırmızı işıq yanırsa, onlar dayanmalıdır, çünki əks halda qəza yarada bilərlər. Təbii ki, çağırışa gedən nəqliyyatın sürücüsü təcili olaraq hadisə baş verən yerə çatmalıdırsa, onun üçün işıqfor olmamalıdır. Xüsusi səs, qırmızı və ya göy sayrışan işıq siqnalı verib hərəkət etməlidir, ancaq maşınların dayanıb ona yol verməsinə diqqət etməlidir. 

Yəni dediyim budur ki, həmin xidməti avtomobilin sürücüsü qırmızı işıqda dayanıb gözləyirsə, demək ki, digər avtomobillərin ona yola verib-verməyəcəyindən tam əmin deyil. 

Həqiqətən, təbliğatı çox vacib bir mövzuya toxunmusuz. Maarifləndirmə xarakterli görülən işlər, profilaktik söhbətlər, aparılan görüşlər bunu deməyimə əsas verir ki, 80% hərəkət üstünlüyünə malik olan nəqliyyat vasitələrinin hərəkətinə əksər hallarda sürücülər də, piyadalar da yol verir. Sadəcə, bəzi ərazilərdə həddindən artıq süni sıxlıq yaşanır və hətta bu sıxlıq zamanını nəzərdə saxlayan sosial roliklərimiz var. Sürücülər belə vəziyyətdə də avtomobillərini sola-sağa çəkməklə təcili yardım maşınları üçün yol açırlar. 

Qeyd edək ki, İnzibati Xətalar məcəlləsinin 29-cu fəslinin 331-ci maddəsində əsasən, keçid üstünlüyü hüququna malik olan nəqliyyat vasitələrinə, xüsusi səs, qırmızı və ya göy sayrışan işıq siqnalı verən, keçid üstünlüyü hüququna malik olan nəqliyyat vasitələrinə yol verilməməsinə və ya belə nəqliyyat vasitəsinin müşayiət etdiyi mütəşəkkil nəqliyyat dəstəsinə qoşularaq hərəkət edilməsinə görə yüz manat məbləğində cərimə edilir.

Arzu Murad

Bakucity.az

Bakı sürücü təcili tibbi yardım
Əgər səhv görmüsünüzsə, mətndə səhvi seçin və Ctrl+Enter sıxaraq redaksiyaya göndərin

Şərhlər