• Ana səhifə
  • “Baku Jazz Festival”a həsr olunmuş mətbuat konfransı keçirilib - FOTO
18:27, 14 oktyabr 2019

“Baku Jazz Festival”a həsr olunmuş mətbuat konfransı keçirilib - FOTO

“Baku Jazz Festival”a həsr olunmuş mətbuat konfransı keçirilib - FOTO

Landmark Hotel Baku-da XIV “Baku Jazz Festival”ın başlanması münasibətilə mətbuat konfransı keçirilib.

BakuCity.az xəbər verir ki, illik caz musiqisi festivalının təşkilatçıları jurnalistlərə qarşıdakı tədbirin proqramı, iştirakçıları və "I am Jazzman" müsabiqəsi barədə məlumat veriblər.

Festivalın direktoru Leyla Əfəndiyeva qeyd edib ki, bu il festival çərçivəsində 25-dən çox konsert, master-klass, seminar, caz filmləri günləri, həmçinin üç festival günü ayrılmış “I am Jazzman” adlı gənc ifaçılardan ibarət müsabiqə planlaşdırılır:

“Bu müsabiqə bizim üçün xüsusi əhəmiyyət kəsb edir. Bundan sonra Azərbaycanı dünyanın müxtəlif ölkələrində təmsil edən caz musiqiçiləri və ifaçıları özlərinə yol tapırlar. Gənc ifaçıların müsabiqəsini Azərbaycanın məşhur caz vokalçısı Elnarə Həsənli idarə edir”.

Festivalın direktoru onu da əlavə edib ki, Bakıda caz günləri əlamətdar tarixə - 18 oktyabr Azərbaycanın Müstəqillik Gününə təsadüf edir:

“Bu, bizim üçün ikiqat bayramdır. Azərbaycan özünü ifadə edir, bunu həm də caz musiqisi haqqında demək olar. Təbii ki, bu musiqidə, həmçinin improvizasiyalar mövcuddur, buna görə də hər il proqramımızı şaxələndirməyə çalışırıq. Bu baxımdan 18 oktyabrda İçərişəhərdə açıq ərazidə konsertimiz olacaq”.

Onun sözlərinə görə, Qız Qalası yaxınlığında üç saatlıq konsert keçiriləcək. Həmin konsertdə həm yerli, həm də xarici musiqiçilər çıxış edəcəklər. Konsertdən sonra festival qonaqlarını sürpriz gözləyir:

“Paytaxt sakinləri və qonaqları üçün təşkil edilən konsertdən sonra Qız Qalası yaxınlığında ilk dəfə caz üslubunda “3D mapping” adlı ART qurğusu təqdim ediləcək. Bu, kiçik ART performansı olacaq”. 

Bakıda caz festivalının tərəfdaşı olan A+A Events kampaniyasının nümayəndəsi Kamran Quliyev də, öz növbəsində, festivalın təşkilatçıları ilə böyük məmnuniyyətlə əməkdaşlıq etdiyini vurğulayıb: 

“Bu il festivalın açılışı “Open Air” rejimində keçiriləcək və həm paytaxt sakinləri, həm də qonaqlar üçün çox maraqlı olacaq. Sözügedən caz festivalını lazımi işıqlandırma effektləri ilə təmin etməyə hər zaman hazırıq. Tərtibatın özü də olduqca maraqlıdır. Mütləq gəlin, hamınızı gözləyirik”. 

Caz ifaçısı Elnarə Həsənli isə jurnalistlərə müsahibəsində deyib ki, bu il "I am Jazzman" müsabiqəsi Azərbaycan, Honq Konq, Almaniya, Braziliya, Rusiya və Ukraynadan musiqiçi və vokalçıları bir araya gətirəcək.

“Mükafatlara gəlincə, birinci yerin qalibi 1000, ikinci yer 500, üçüncüsü 200 ABŞ dolları miqdarında pul mükafatı alacaq və onlara diplomlar da təqdim olunacaq. İştirakçıların yaş həddi 16-30 arası olur, amma bu il istisnalar etdik. Bu il bir yarışmaçımızın cəmi 11 yaşı var, lakin çox istedadlıdır”.

Mətbuat konfransında Azərbaycanın caz musiqiçisi Elbəy Məmmədzadə də iştirak edib:

“Bu il rusiyalı saksofonçu Andrey Konstantinovla birlikdə virtuoz ifa edəcəyəm. Ümid edirəm ki, dinləyicilər ifamızdan zövq alacaqlar. Bu möhtəşəm festivalın bütün təşkilatçılarına da təşəkkür edirəm”.

L.Əfəndiyeva xatırladıb ki, Rain Sultanov 2005-ci ildə Bakıda caz festivalını təşkil etdi və hazırda musiqiçi İspaniyadadır, Bakı Caz Festivalını təmsil edir: 

“Bizə xoşdur ki, festival günlərində “Euronews” komandası tədbiri lentə almaq üçün paytaxtımıza təşrif buyuracaq. Bu, bizim üçün böyük qələbədir. Bundan əlavə, dünya caz sənətçisi, hazırda YUNESKO-nun mədəniyyətlərarası dialoq üzrə xoşməramlı səfiri və Beynəlxalq Caz Gününün təsisçisi Herbi Henkokdan təşəkkür məktubu aldıq. Məktubda Henkok Bakı Caz Festivalının dünya cazının inkişafına verdiyi əvəzsiz töhfəni də vurğulayıb. Bu, bizim üçün böyük dəyərdir”. 

Bu il festival “Landmark” biznes mərkəzində, Beynəlxalq Muğam Mərkəzində, Azərbaycan Dövlət Akademik Musiqili Teatrında, Azərbaycan Dövlət Filarmoniyasının kamera və orqan musiqisi zalında keçiriləcək.

İnformasiya dəstəyi – BakuCity.az

Züleyxa İsmayılova

Foto: Nicat Alili

BakuCity.az

#Bakı #caz #festival

Şərhlər

Elan
live comments feed...