Prezidentdən Bakı yolları ilə bağlı tapşırıq: "Torpaq yollar olmamalıdır"

Prezidentdən Bakı yolları ilə bağlı tapşırıq: "Torpaq yollar olmamalıdır"

Azərbaycan Prezidenti İlham Əliyev oktyabrın 17-də Azərbaycan Avtomobil Yolları Dövlət Agentliyinin idarə heyətinin sədri Saleh Məmmədovu qəbul edib.

BakuCity.az-ın məlumatına görə, yol tikintisinin Azərbaycanda geniş vüsət aldığını deyən dövlət başçısı deyib ki, yol infrastrukturuna qoyulan sərmayə öz səmərəsini verir:

“Bu il, eyni zamanda, şəhərlərarası yolların çəkilişinə və kənd yollarının tikintisinə vəsait nəzərdə tutulub. O cümlədən son dəfə mən sizə tapşırıq verdim ki, Bakı qəsəbələrinin yollarına da diqqət yetirilsin. Bakının həm qəsəbələrarası, həm də qəsəbədaxili yolları təmir olunmalıdır, yeni yollar çəkilməlidir. Bəzi yerlərdə hələ torpaq yollar mövcuddur. Torpaq yollar olmamalıdır. Qəsəbədaxili yollara asfalt vurulmalıdır”.

İlham Əliyev vurğulayıb ki, qəsəbədaxili yollara da mütləq fikir vermək lazımdır:

“Bu yaxınlarda Kürdəxanı qəsəbəsinin yolları demək olar ki, tam həcmdə təmir olunub. Bu gözəl nümunə bütün qəsəbələrdə öz əksini tapmalıdır”.

Məruzə edən Saleh Məmmədov isə bildirib ki, bu il Bakının qəsəbələrində 242 kilometr daxili yollar asfaltlanaraq tam istifadəyə verilib:

“İndi həmin qəsəbələrin əhalisi çox rahat yollardan istifadə edirlər. Bundan əlavə, ilin sonunadək qəsəbələrdə daha 57 kilometr yolun çəkilişi başa çatdırılacaq. Yəni, biz Sizin tövsiyənizlə qəsəbədaxili müasir yolların uzunluğunu bu il təqribən 300 kilometrə çatdıracağıq. Buna da Sizin tərəfinizdən vəsait ayrılmışdır. Biz çalışırıq ki, ayrılmış vəsait hesabına həmin yolların çəkilişini yüksək səviyyədə başa çatdıraq”.

Prezidentdən Bakı yolları ilə bağlı tapşırıq: "Torpaq yollar olmamalıdır", fotoşəkil-1

BakuCity.az

İlham Əliyev Bakı yollar
Əgər səhv görmüsünüzsə, mətndə səhvi seçin və Ctrl+Enter sıxaraq redaksiyaya göndərin

Şərhlər