Bakıdakı təmizlik şirkətləri: xidmət fərqi və QİYMƏTLƏR

Bakıdakı təmizlik şirkətləri: xidmət fərqi və QİYMƏTLƏR

Bakıda peşəkar təmizlik xidmətlərinə nə qədər tələbat var?

Müasir dövrdə bu cür şirkətlərin xidmətləri yalnız ofislərə və ya hotellərə deyil, həm də mənzilini təmizləməyə vaxtı olmayan şəxslərə lazım olur.

“Cleanfix” şirkətinin layihə rəhbəri Ənvər Hüseynov BakuCity.az-a açıqlamasında bildirib ki, belə firmalar müştərilərə geniş xidmətlər təklif edirlər.

Onun sözlərinə görə, təmizlik şirkətləri yalnız binaların təmizlənməsi ilə deyil, həm də mebel, xalça kimi fərdi əşyaların təmizlənməsi və böyük tədbirlərdə xidmət göstərməklə də məşğul olurlar:

“Bakıda insanların təmizlik firmalarının xidmətlərinə marağı ilbəil artır. Bu gün bazarda çox sayda peşəkar şirkətlərin olması belə xidmətlərə tələbatın olduğunu göstərir”. 

Ə.Hüseynovun sözlərinə görə, “Cleanfix” kampaniyası 10 ildən çoxdur xidmət göstərir:

“Bu, rəqabəti daha da artırır. Yüksək rəqabət yalnız və yalnız göstərilən xidmətlərin keyfiyyətini artırır. Müştərilər peşəkar və müasir avadanlıqlarla, yüksək keyfiyyətli kimyəvi maddələrlə işləyən təmizlik şirkətlərinə üstünlük verirlər”.

O, həmçinin qeyd edib ki, çox vaxt mənzili təmizlənməli olan müştərilər əlaqə saxlayır. Bu, təmirdən, əlamətdar günlərdən sonra ümumi təmizlik ola bilər:

“Artıq az hallarda müxtəlif idarə və müəssisələr bu cür şirkətlərin xidmətlərinə müraciət edirlər. Onlar ofislərini, ümumiyyətlə, öz təmizlik xidmətləri olan mərkəzlərdə qurmağa çalışırlar. Müştərilərimizin bizə sadəcə zəng etmələri yetərlidir. Biz hər şeyi özümüz gətirəcəyik: texnika, təmizləyici məhsullar. Bundan əlavə, yaxşı bir şirkət iş zamanı yarana biləcək hər hansı qüsur və ya çatışmazlıq üçün cavabdeh olmağa hazırdır. Biz, əsasən Almaniyanın “Columbus” avadanlıqları ilə işləyirik".

Şirkət mənzillərin, ofislərin, geniş ərazilərin, pəncərələrin və fasadların yuyulması, mebel və xalçanın quru təmizlənməsi üzrə xidmətlər göstərir. Burada həm də abadlıq, parklara qulluq, böyük idman və konsert tədbirlərində xidmət göstərmək də daxildir.

Mənzilin təmizlənməsinin qiyməti kvadratmetrə görə 1,5 - 2 manat arasında dəyişir. Təmirdən sonra təmizlik işləri sahənin çirklənmə dərəcəsindən və otağın vəziyyətindən asılı olaraq bir kvadratmetr üçün 2 manatdan başlayır.

Təmizlik xidmətləri göstərən şirkətlər:

“166” təmizlik şirkəti evləri, ofisləri, bağ evlərini və evin qarşısındakı əraziləri təmizləyir. Həmçinin xalçalar və mebellər də təmizlənir. Hündür binaların pəncərələrini təmizləmək üçün təhlükəsizliklə təmin olunmuş müvafiq hündürlük qurğularından istifadə edilir. Xidmətlərin dəyəri müştəri tərəfindən seçilmiş təmizlik paketinə əsasən hesablanır. Məsələn, “Express” minimal paketinin qiyməti hər kvadratmetr üçün 0,70 AZN-dir.

“188” təmizlik şirkəti gündəlik və daimi təmizlik xidmətləri göstərir. Bundan əlavə, burada arqan (bioloji) tərkibli şampundan istifadə edərək xüsusi avadanlıqla həyata keçirilən xalça yuyulması xidmətini sifariş edə bilərsiniz. Şirkət, həmçinin təmirdən sonra təmizlik xidmətləri göstərir, ofisləri və fasadları təmizləyir. Mənzilin təmizlənməsinin dəyəri otaqların sayına görə hesablanır: 1 otaq - 39 AZN, 2 otaq - 59 AZN, 3 otaq - 79 AZN

“EcoMan” şirkəti evləri, ofisləri və landşaftları təmizləyir. Bu xidmət vasitəsilə, həmçinin avtomobillərin təmizlənməsi, zibillərin çıxarılması, təmirdən və böyük əlamətdar günlərdən sonra zəruri olan təmizlik xidmətləri sifariş edə bilərsiniz. Bundan əlavə, şirkət müştərilərin yaşadığı binaların girişlərini, pilləkənlərini və liftlərini pulsuz təmizləyir. Bir kvadratmetr üçün xidmət haqqı 0,90 AZN-dən başlayır.

“Main Group” şirkəti istənilən binada təmizlik xidmətləri göstərir. Bu xidmət vasitəsilə xalçaların və mebellərin quru təmizlənməsi, həmçinin ətraf ərazilərə qulluq göstərilməsi də mümkündür. Təmizləmə xidmətinin bir kvadratmetr üçün nəzərdə tutulmuş qiyməti 1,50 AZN-dən başlayır.

Züleyxa İsmayılova

BakuCity.az

Bakı təmizlik şirkətlər
Əgər səhv görmüsünüzsə, mətndə səhvi seçin və Ctrl+Enter sıxaraq redaksiyaya göndərin
Şərhlər