Şimali Koreya rəsmisi Bakıda ABŞ-ı sərt tənqid etdi

Şimali Koreya rəsmisi Bakıda ABŞ-ı sərt tənqid etdi

“Koreya yarımadasındakı münaqişənin dinc yolla aradan qaldırılmasını, barıt qoxusunun olmamasını istəyərdik”.

BakuCity.az APA-ya istinadən məlumat verir ki, bunu bu gün Qoşulmama Hərəkatına üzv ölkələrin dövlət və hökumət başçılarının XVIII Zirvə Görüşünün debat müzakirələrində Şimali Koreya Ali Xalq Məclisinin Rəyasət Heyətinin sədri Çoe Ryonq Haen bildirib.

Koreya parlamentinin sədri deyib ki, 12 iyun tarixində ABŞ və Şimali Koreya arasında keçirilən görüşdən sonra danışıqlar dayanıb:

“Təəssüf ki, iki ölkə arasında gərginlik artır. Bu, ABŞ-ın anarxist, köhnəlmiş siyasət aparması ilə bağlıdır. Şimali Koreya lideri Kim Çen In bəyan edib ki, ABŞ yeni yanaşmadan çıxış etməlidir. ABŞ-a təklif etdik ki, yarımadada nüvə silahsızlaşdırılması davam etsin. Ancaq onun düşmən mövqedən əl çəkdiyini müşahidə edə bilmirik. Ötən il Şimali Koreyanın çoxsaylı təşəbbüsü cavabsız qalıb. Həm Şimalda, həm Cənubda, həm də bütövlükdə dünyada olan tərəfdaşlarımız bundan məyus oldu. Ölkəmizin əhalisinə qarşı yönəlmiş addımların səngiməsini görə bilmirik”.

Ç.R.Haen qeyd edib ki, Koreya yarımadasında sülhün bərpa olunması məhz Cənubi Koreya rəhbərliyindən asılıdır:

“Biz yarımadada müharibə istəmirik. Qoşulmama Hərəkatının da bu məqsədlərə xidmət etməsini istəyirik. Qoşulmama Hərəkatının üzvləri təcavüzü pisləməlidirlər. İmperialist dairələrin hücumları bizi suverenlik yolundan döndərə, təsir altına sala bilməyəcək. Biz yarımadada vəziyyətin daimi sabit olmasını arzulayırıq”.

O nəzərə çatdırıb ki, bu gün dünyada birtərəfli hərəkətlər beynəlxalq sistemi sual altında qoyur:

“Suverenlik, ölkələrin daxili işlərinə qarışmamaq, ərazi bütövlüyü prinsipi alt-üst olub. Nə üçün böyük dövlətlər bu prinsiplərə hörmətlə yanaşmır? Axı bu prinsiplər BMT-nin Nizamnaməsində də əks olunub. Nə üçün BMT Nizamnaməsi üzv dövlətlər üçün vacib sayılmalıdır? Əks halda kiçik dövlətlərin taleyi zərbə altına düşür”.

BakuCity.az

Bakı Şimali Koreya ABŞ
Əgər səhv görmüsünüzsə, mətndə səhvi seçin və Ctrl+Enter sıxaraq redaksiyaya göndərin

Şərhlər