Bakıda solo konsertə hazırlaşan Xalq artistini qəzəbləndirən xəbər – AÇIQLAMA

Bakıda solo konsertə hazırlaşan Xalq artistini qəzəbləndirən xəbər – AÇIQLAMA

Gülyanaq Məmmədovanın Leyli obrazına görə pul ödədiyi deyilir, amma...

Əməkdar artist Nigar Şabanova ilə Azərbaycan Dövlət Akademik Opera və Balet Teatrı arasında yaşanan qalmaqal "Hər şey daxil" verilişində üzə çıxıb.

BakuCity.az xəbər verir ki, N.Şabanova teatrın "Leyli və Məcnun" tamaşasında Leyli obrazını oynamaq üçün ondan 4 min manat rüşvət istənildiyini deyib. Əməkdar artist iddia edib ki, Xalq artisti Gülyanaq Məmmədova da Leyli obrazını oynamaq üçün pul ödəyib.

Məsələ ilə bağlı G.Məmmədova ilə əlaqə saxladıq. Xalq artisti yayılan xəbəri təkzib edərək Leyli obrazına görə qonorar aldığını deyib:

“Opera və Balet Teatrının qapıları mənim üçün dünən açılmayıb. Düz 25 ildir Opera Teatrında oynamaq üçün dəvətlər alıram.

Həmçinin oxu: Xalq artistləri Heydər Əliyev Sarayında ilk dəfə konsert verəcək: "Həyəcanlıyıq"

Gülyaz xanım da (Xalq artisti Gülyaz Məmmədova – red.) 1993-cü ildən bu günə kimi bütün milli tamaşalarımızda baş rollarda oynayır. Akif müəllim (Teatrın direktoru Akif Məlikov – red.) hər dəfə məni görəndə deyirdi ki, Leyli sizin kimi sənətkarlar üçündür. “Bacın da oynadığı obrazlarla hər kəsi heyran edir, sən niyə gəlib oynamırsan?” Bu sualın qabağında həmişə utanırdım ki, direktor özü təklif edir. Dəfələrlə təklif aldıqdan sonra, 2014-cü ildə ilk dəfə qərar verib Leylini iki dəfə ardıcıl oynadım və öz möhürümü vurub çıxdım. Bunun üçün bir insana bir qəpik də olsun pul verməmişəm, əksinə, mənim özümə qonorar verilib.

Bildiyiniz kimi, oktyabrın 30-u Heydər Əliyev Sarayında Gülyaz xanımla birlikdə solo konsertimiz olacaq. Konsert qabağı belə məlumatların yayılması isə düzgün deyil!”

Xalq artisti N.Şabanovanın bu xəbəri təkzib etdiyini deyir:

“Nigarın dediyinə görə, o, belə bir söz işlətməyib. Özünə də demişəm, əgər doğrudan da deməyibsə, xəbərin yalan olması ilə bağlı özü mediaya açıqlama verməlidir. Nigarın özünə də, sənətinə də hörmətim var. Səsi də, görünüşü də Leylini oynamasına imkan verir, amma niyə belə danışıb, anlaya bilmirəm. Bildiyim odur ki, heç bir halda məni bu söhbətə qatmamalıdırlar. Mənim bu məsələyə heç bir yaxınlığım yoxdur”.

G.Məmmədova bu xəbərləri yayan media qurumlarına da müraciət edib:

“Xalq artistinin adına yaraşmayan məlumatların dəqiqləşdirilmədən, üstəlik, biabırçı başlıqlarla yayılması təkcə ayıb deyil, üstəlik, həmin medianın nə qədər zəif olduğunu göstərir”.

Ramilə Qardaşxanqızı

BakuCity.az

Bakı qalmaqal opera
Əgər səhv görmüsünüzsə, mətndə səhvi seçin və Ctrl+Enter sıxaraq redaksiyaya göndərin
Şərhlər