Bakıda vaxtilə sökülən binaların memarlıq nümunələri sərgiləndi - FOTO

Bakıda vaxtilə sökülən binaların memarlıq nümunələri sərgiləndi - FOTO

“Fantazia” Mədəni İrs Festivalının açılışı olub

Bakıda "Fantazia" festivalı çərçivəsində Fransa-Azərbaycan Universitetində (UFAZ) "Memarlıq və mədəni irs: Avropa və Azərbaycan təcrübələri" mövzusunda konfrans keçirilib.

BakuCity.az xəbər verir ki, konfransda Avropa İttifaqının Azərbaycandakı nümayəndiliyinin rəhbəri Kestutis Yankauskas, birinci müşaviri Denis Daniilidis, Fransanın Azərbaycandaki səfiri Zakari Qros, Azərbaycan Memarlıq İttifaqının idarə heyyətinin sədr müavini, memar Elçin Əliyev mədəni irsin qorunaraq gələcək nəsillərə ötürməyin vacibliyindən danışıblar.

K.Yankauskas çıxışında qeyd edib ki, Azərbaycanda artıq ikinci dəfə “Fantazia” mədəni irs festivalı keçirilir:

“Ölkənizin tarixi irsi çox zəngindir. Bakı isə gündən-günə müasirləşir, gözəlləşir. Mədəni irsin qorunması üçün Azərbaycan və Avropa İttifaqı birgə platformadan çıxış edirlər. İnanıram ki, biz bu tərəfdaşlığı gələcək nəsillərə ötürə biləcəyik”.

E.Əliyev “Bakının 1920-1930-cu illər arxitekturası” mövzusunda çıxış edərək bu illər ərzində paytaxtda konstruktivizm üslubunda inşa olunan tikililər haqqında məlumat verib.

Konfransdan sonra “Fantazia” Mədəni İrs Festivalının açılışı olub.

Sərgidə qonaqlar “Bakının qorunub saxlanılan inciləri - POP UP” muzeyi ilə tanış olublar. Elçin Əliyev bu sərgini illərdir arzuladığını qeyd edib:

“Sərgidə Bakının təxminən 25 əsrlik tarixini, şəhərin, mədəniyyətin və memarlıq tarixinin inkişafına töhfə vermiş bəzi tanınmış memarların əl işlərini əks etdirən materiallar nümayiş olunur. Bu materiallar paytaxtda zaman-zaman sökülən tikililərin qalıqlarından ibarətdir. Mən bu nümunələrin əksəriyyətini pulla almışam. Artıq uzun illərdir ki, bu əsərlər məndədir. Muzeylərimizə dəfələrlə müraciət etmişəm, amma heç biri qəbul etməyib”.

Xatırladaq ki, məşhur Bakı hamamının mühafizə olunan binasının şərəfinə adlandırılan "Fantazia" festivalının məqsədi mədəni irsin nümayişi və qorunması zəruriliyi barədə məlumatlılığın artırılmasıdır.

“Fantazia” Mədəni İrs Festivalı Avropa İttifaqının nümayəndəliyi tərəfindən Aİ-nin üzv dövlətləri və üçüncü ölkələr, yəni Fransa, Bolqarıstan, İtaliya, Latviya, Finlandiya, Belçika, Niderland, Macarıstan, Moldova, Meksika, Argentina, Tacikistan və Venesuela ilə tərəfdaşlıq çərçivəsində təşkil olunur.

Festivala Azərbaycan Mədəniyyət Nazirliyi, Bakı şəhər Baş Mədəniyyət İdarəsi, “İçərişəhər” Dövlət Tarix-Memarlıq Qoruğu Aİ tərəfindən maliyyələşdirilən müqavilə çərçivəsində təşkilati dəstək göstərir.

Festival oktyabrın 15-dək davam edəcək.

Ramilə Qardaşxanqızı

FOTO: Nicat Alili

BakuCity.az

Bakı FANTAZIA festival
Əgər səhv görmüsünüzsə, mətndə səhvi seçin və Ctrl+Enter sıxaraq redaksiyaya göndərin
Şərhlər