Prezidentin tapşırdığı qəsəbədaxili yolların təmiri nə vaxt başa çatacaq?

Prezidentin tapşırdığı qəsəbədaxili yolların təmiri nə vaxt başa çatacaq?

2200 kilometr yolun asfaltlanmasına ehtiyac var

Bakının qəsəbədaxili yollarının asfaltlanması işlərinin yekunlaşacağı müddət açıqlanıb.

Azərbaycan Avtomobil Yolları Dövlət Agentliyinin mətbuat xidmətinin rəhbəri Anar Nəcəfli BakuCity.az-a açıqlamasında bildirib ki, Bakıətrafı qəsəbələrin daxili yollarında artıq uzun müddətdir işlər aparılır:

“Bununla bağlı ölkə başçısının ilin əvvəlindən tapşırığı var idi. Biz Bakı şəhərinin 12 rayonu üzrə siyahıyaalma aparmışıq və məlum olub ki, paytaxtın 60 qəsəbəsində 2200 kilometr yolun asfaltlanmasına ehtiyac var. Bunlar da torpaq əsaslı çınqıl örtüklü yollardır. Bu istiqamətdə işə ilin əvvəlindən başlanılıb və son 9 ay ərzində təqribən 185 kilometr uzunluğunda küçə təmir edilib”.

Onun sözlərinə görə, ilin sonunakək təmir olunan yolların uzuluğu 200 kilometrə çatdırılacaq:

“İlkin olaraq biz Sabunçu rayonunun Kürdəxanı qəsəbəsindən başladıq və qısa müddət ərzində orada 72 kilometr uzunluğunda 122 küçə təmir olunub. Təbii ki, bu, Kürdəxanı qəsəbəsinin bütün küçələrini olmasa da, kifayət qədər böyük bir hissəsini əhatə etdi”.

Həmçinin oxu: Prezidentdən Bakı yolları ilə bağlı tapşırıq: "Torpaq yollar olmamalıdır"

A.Nəcəfli qeyd edib ki, 2023-cü il də daxil olmaqla, növbəti illərdə müəyyən edilən yollar da asfaltlanacaq:

“Bu yollar bizim balansımızda olan yollar deyildi. İcra hakimiyyətləri və bələdiyyələrin balansında olan bu yollarda uzun illər idi problemlər yaşanırdı. Bu ildən ölkə başçısı bizim qarşımıza tapşırıq qoydu və agentlik tərəfindən işlərə başlanıldı. Təbii ki, paytaxtın bütün yollarını qısa müddətdə təmir etmək mümkün deyil, amma bu işlər hissə-hissə görüləcək və 2023-cü ildə Bakı şəhərində torpaq və çınqıl yollar qalmayacaq”.

İşdə növbəliliyin hansı qaydalara əsasən əməl olunmasına gəlincə, mətbuat katibi deyib ki, bu işə başlayanda qəsəbələrdə istifadə olunan əsas yolların təmiri qabağa salındı:

“Əsas yollar dedikdə, sərnişin avtobuslarının hərəkət etdiyi yollar, sosial obyektlərə – məktəb, bağça, tibb məntəqəsi və s. aparan yollar nəzərdə turulur. Bu çərçivədə də işlər davam etdiriləcək. Mərkəzi hissələr yekunlaşdıqca, mərkəzlərə birləşən digər yollar da təmir olunacaq”.

Xatırladaq ki, oktyabrın 17-də Prezident İlham Əliyev Azərbaycan Avtomobil Yolları Dövlət Agentliyinin İdarə heyətinin sədri Saleh Məmmədovu qəbul edərkən bildirmişdi: “Bakının həm qəsəbələrarası, həm də qəsəbədaxili yolları təmir olunmalıdır, yeni yollar çəkilməlidir. Bəzi yerlərdə hələ torpaq yollar mövcuddur. Torpaq yollar olmamalıdır. Qəsəbədaxili yollara asfalt vurulmalıdır”.

Ramilə Qardaşxanqızı

BakuCity.az

Bakı qəsəbədaxili yollar təmir
Əgər səhv görmüsünüzsə, mətndə səhvi seçin və Ctrl+Enter sıxaraq redaksiyaya göndərin

Şərhlər