Bakı Metropoliteni yeni vaqonların qapısındakı "defekt"i necə düzəldəcək?

Bakı Metropoliteni yeni vaqonların qapısındakı "defekt"i necə düzəldəcək?

"Proqram təminatı çaşır və qapıları bloka salır"

"Bakı Metropoliteni" QSC yeni gətirilən vaqonlarda qapıların sıxılma zamanı açılmamasının tənzimlənməsi üçün Rusiyanın “Transmaşholdinq” QSC-nin şirkətlər qrupuna daxil olan “Metrovaqonmaş” ASC-yə məktub göndərməyə hazırlaşır. 

BakuCity.az xəbər verir ki, bunu qurumun baş mühəndisi Əlixan Osmanov “Report”a deyib.

Ə.Osmanovun sözlərinə görə, tezliklə həmin problemlər aradan qaldırılacaq:

“Bu məsələni biz mütəxəssislərlə müzakirə etmişik. Nəinki bundan sonra ölkəyə gətiriləcək qatarlarda, həmçinin bu vaxta qədər gətirilən yeni vaqonlarda proqram təminatını düzəltmək üçün zavoda məktub hazırlamışıq və göndərəcəyik". 

QSC-nin baş mühəndisi hesab edir ki, başqa ölkələrdə də yeni nəsil vaqonların istifadəsi zamanı belə problemlər ortaya çıxa bilər:

"Hər yerdə sərnişin qapını tutub saxlayır, proqram təminatı çaşır və qapıları bloka salır. Onların yenidən işə düşməsi üçün proqram təminatı yenidən yüklənməlidir. Biz artıq zavoda məktub hazırlamışıq və tələb edirik ki, proqram təminatı heç zaman qapıları bloka salmasın. Burada yalnız proqram təminatı qapıların bağlanması ilə bağlı komanda verməlidir. Digər məsələlər maşinist üçün saxlanılır. O, qapıların bağlanması əmrindən imtina edə bilər, yaxud qapıları yenidən açıb-bağlaya bilər". 

Ə.Osmanovun fikrincə, yaxın gələcəkdə bu problem olmayacaq:

"Təzə qatarlarda istehsalçı ilə istismar edənin birgə səyi nəticəsində belə məsələlər tədricən aradan qaldırılır. Köhnə qatarlarda da belə məsələlər var idi. Birinin kronşteyni tez-tez sınırdı, digərinin zənciri yerindən çıxırdı. Bunları da tədricən sahmana saldıq”.

Xatırladaq ki, bu il ərzində Bakıya 30 vaqon gətirilib. Yeni vaqonlarda olan təhlükəsizlik qaydalarına görə, uzun müddət sıxılaraq açıq qalan qapılar bağlandıqdan sonra bloklanır. Bloklanmanı aradan qaldırmaq üçün isə sistem yenidən işə salınmalıdır. Bu zaman isə metro vaqonlarında bir neçə saniyə elektrik enerjisi təchizatı kəsilir.

BakuCity.az

Bakı Metropoliteni vaqonlar qapı
Əgər səhv görmüsünüzsə, mətndə səhvi seçin və Ctrl+Enter sıxaraq redaksiyaya göndərin
Şərhlər