Bakıda Xalça Muzeyində fiziki imkanları məhdud şəxslər üçün yenilik olacaq

Bakıda Xalça Muzeyində fiziki imkanları məhdud şəxslər üçün yenilik olacaq

Sərhədsiz muzey

Hər il dünyada 13 noyabr Beynəlxalq Gözdən Əlillər Günü kimi qeyd edilir.

BakuCity.az xəbər verir ki, bu münasibətlə noyabrın 8-də Azərbaycan Milli Xalça Muzeyinin fiziki imkanları məhdud şəxslərə uyğunlaşdırılmış ikinci mərtəbəsinin açılış mərasimi keçiriləcək.

Muzeydən saytımıza verilən məlumata görə, görmə qabiliyyəti məhdud olan insanlar üçün muzeyin eksponatları barədə mətnlər muzeyin ikinci mərtəbəsində Brayl əlifbası ilə təqdim olunur:

“Həmçinin, burada xovlu və xovsuz texnologiyanın birlikdə tətbiqi ilə üzərində həndəsi və nəbati elementlər, zoomorf və antropomorf təsvirlər olan kiçik ölçülü xalça nümunələri nümayiş etdirilir. Bununla da muzeyin Ənənəvi texnologiya şöbəsinin toxucuları tərəfindən hazırlanan hər bir xalça növünün toxunuş müxtəlifliyini görmə qabiliyyəti məhdud insanlar taktil (toxunma) üsulla duya bilirlər”.

Mədəniyyət Nazirliyi və Azərbaycan Milli Xalça Muzeyinin təşkilatçılığı ilə keçirilən tədbir fiziki məhdudiyyətli insanların ictimai-mədəni mühitdə bərabərliyinin təmin olunması, onlara psixoloji və mənəvi dəstək məqsədi daşıyır.

Qeyd edək ki, Azərbaycan Milli Xalça Muzeyində əlil arabalarının ekspozisiyada maneəsiz hərəkəti üçün lazımi şərait var.

2019-cu ilin əvvəlindən isə muzeyin birinci mərtəbəsində təqdim edilən eksponatlarla taktil üsulla, həmçinin Azərbaycan və ingilis dillərində xüsusi audioyazı və Brayl şrifti ilə hazırlanan yazılı materiallar vasitəsilə tanış olmaq mümkündür. 

Eyni zamanda, həmin dövrdən etibarən muzeyin Ənənəvi texnologiya və Uşaq şöbələrinin əməkdaşları xüsusi qayğıya ehtiyacı olan şəxslər üçün ustad dərsləri keçirlər.

Nicat Alili

BakuCity.az

Bakı muzey
Əgər səhv görmüsünüzsə, mətndə səhvi seçin və Ctrl+Enter sıxaraq redaksiyaya göndərin

Şərhlər