Nazirlik əhalini qanunsuz balıq ovu ilə mübarizəyə çağırdı

Nazirlik əhalini qanunsuz balıq ovu ilə mübarizəyə çağırdı

Həvəskar balıq ovçuları üçün yerlər ayrılıb

Son dövrlərdə su hövzələrində balıq ehtiyatlarının artırılması və mühafizəsi sahəsində müsbət işlər görülsə də, təəssüf ki, problemlər hələ də mövcuddur. Hələ də qanunla Azərbaycana idxalına qadağa qoyulmuş sintetik torların qaçaqmalçılıq yolu ilə ölkəyə gətirilməsi, satışı və bu torlardan su hövzələrində istifadə davam edir.

BakuCity.az xəbər verir ki, bunu mətbuat konfransında Ekologiya və Təbii Sərvətlər Nazirliyinin departament direktoru Mehman Axundov deyib.

O bildirib ki, su hövzələrində balıq ehtiyatlarının qorunması, artırılması, mühafizəsinin gücləndirilməsi və akvakulturanın inkişafı məqsədiilə dövlət qurumlarının və ictimaiyyətin birgə fəaliyyətinin təşkili, ictimai dəstəyin formalaşdırılması çox vacibdir. Bu cür vacib məsələlərin həllində ictimaiyyət də kənardan müşahidəçi kimi qalmamalıdır:

"Xahiş edirik, brakonyerliklə üzləşdikdə dərhal hüquq-mühafizə orqanlarına, Su Nəqliyyatında Polis İdarəsinə məlumat verilsin. Çünki balıq ehtiyatlarının daha da artırılmasına nail olmaq, onların mühafizəsini gücləndirmək üçün təkcə dövlət qurumları deyil, bütün ictimaiyyət bu işdə iştirak etməlidir. Sivil balıqçılıq qaydalarının təbliği və təşviqini gücləndirmək də brakonyerliyin qarşısının alınmasında bir vasitədir”.

Nazirliyin sözçüsü həmçinin qeyd edib ki, həvəskar balıq ovçuları üçün çoxlu sayda imkanlar yaradılıb, onlara müxtəlif hövzələrdə yerlər ayrılıb, eyni zamanda, milli park ərazilərində imkanlar yaradılıb:

"Brakonyerliyin qarşısının qısa müddətdə alınması mümkün deyil. Amma təbiətsevərlərlə, həvəskar balıqçılarla, ictimaiyyətin digər nümayəndələri ilə birlikdə qadağan olunmuş vasitələrlə ov edənlərin ictimai qınağa tutulması, sivil balıq ovlanmasının nümayişi və təbliği ilə problemin tədricən həllinə nail olmaq mümkündür. Sənaye balıq ovu kvotalarının alınması bu ildən etibarən “ASAN xidmət”ə keçib. Artıq bu yolla məmurla vətəndaşın birbaşa ünsiyyəti yoxdur, “ASAN xidmət”ə müraciət olunur və balıq ovu kvotaları oradan əldə edilir. Bu da öz növbəsində, şəffaflığa və çevik yolla kvotaların əldə olunmaslina teminat yaradır".

Ramilə Qardaşxanqızı

BakuCity.az

balıq ovu brakonyerlik
Əgər səhv görmüsünüzsə, mətndə səhvi seçin və Ctrl+Enter sıxaraq redaksiyaya göndərin

Şərhlər